ଭୁବନେଶ୍ୱର,୫ା୨(ବ୍ୟୁରୋ): ରାଜ୍ୟ ପ୍ରଦୂଷଣ ନିୟନ୍ତ୍ରଣ ବୋର୍ଡ (ଏସ୍ପିସିବି)ର ମୁଖ୍ୟଯନ୍ତ୍ରୀ ରବି ନାରାୟଣ ପୃଷ୍ଟିଙ୍କ ଘରେ ଭିଜିଲାନ୍ସ ଚଢ଼ାଉ ପରେ ତାଙ୍କ ନିକଟରୁ ବିପୁଳ ପରିମାଣର ଆୟ ବହିର୍ଭୂତ ସମ୍ପତ୍ତି ମିଳିଛି। ଉକ୍ତ ସମ୍ପତ୍ତିର ସନ୍ତୋଷଜନକ ଉତ୍ତର ଦେଇ ନ ପାରିବାରୁ ଭିଜିଲାନ୍ସ ଏକ ମାମଲା (ନଂ.୧/୨୨) ରୁଜୁ କରି ଶୁକ୍ରବାର ରବି ନାରାୟଣଙ୍କୁ ଗିରଫ କରିଛି। ଏହାପରେ ତାଙ୍କୁ ଭିଜିଲାନ୍ସ କୋର୍ଟରେ ହାଜର କରାଯାଇଥିଲା। ଜାମିନ ନାମଞ୍ଜୁର ହେବାରୁ ତାଙ୍କୁ ବିଚାର ବିଭାଗୀୟ ହାଜତକୁ ପଠାଇ ଦିଆଯାଇଛି।
ଭିଜିଲାନ୍ସ କୋର୍ଟ ସ୍ପେଶାଲ ଜଜ୍ଙ୍କ ନିର୍ଦ୍ଦେଶକ୍ରମେ ଗୁରୁବାର ରବିଙ୍କ ଭୁବନେଶ୍ୱର ପଟିଆରେ ଥିବା ରେସିଡେନ୍ସିଆଲ ଫ୍ଲାଟ୍, ଜାଗମରାର ଗଜପତି ପ୍ୟାଲେସ୍ରେ ଥିବା ଫ୍ଲାଟ, ଖଣ୍ଡଗିରି ବାରଭୁଜା ମାର୍କେଟ କମ୍ପ୍ଲେକ୍ସରେ ଥିବା ଏକ ଶପ୍, ଶ୍ରୀରାମ ବିହାରସ୍ଥିତ ସମ୍ପର୍କୀୟଙ୍କ ଘର, ପୁରୀ ଶ୍ରୀକ୍ଷେତ୍ର ଭକ୍ତ ନିବାସରେ ଥିବା ଫ୍ଲାଟ, ଗଞ୍ଜାମ ଜିଲା ନୂଆଗାଁ ଥାନା ନୂଆପଡ଼ାରେ ଥିବା ପୈତୃକ ଘର ଓ ଭୁବନେଶ୍ୱରସ୍ଥିତ ଏସ୍ପିସିବି କାର୍ଯ୍ୟାଳୟରେ ଥିବା ତାଙ୍କ ଚାମ୍ବର ଆଦି ୭ ସ୍ଥାନରେ ଏକକାଳୀନ ଚଢ଼ାଉ କରାଯାଇଥିଲା। ଏଥିରେ ଭିଜିଲାନ୍ସର ଜଣେ ଏସ୍ପି, ୨ ଜଣ ଅତିରିକ୍ତ ଏସ୍ପି, ୧୭ ଡିଏସ୍ପି ସାମିଲ ଥିଲେ। ଯାଞ୍ଚ ପରେ ଭିଜିଲାନ୍ସ ପକ୍ଷରୁ ଶୁକ୍ରବାର ଠାବ ହୋଇଥିବା ସମ୍ପତ୍ତିର ତଥ୍ୟ ଦିଆଯାଇଛି। ପୁରୀ ଶ୍ରୀକ୍ଷେତ୍ର ନିବାସ ଫ୍ଲାଟ୍କୁ ୧ କୋଟିରୁ ଊର୍ଦ୍ଧ୍ୱ ଟଙ୍କାରେ ହିସାବ କରାଯାଇଥିବାବେଳେ ନଖରାସ୍ଥିତ ଗ୍ରାଣ୍ଡ୍ ଆୱାସରେ ଥିବା ଫ୍ଲାଟ୍ର ମୂଲ୍ୟ ୬୦ ଲକ୍ଷରୁ ଊର୍ଦ୍ଧ୍ୱ, ଭୁବନେଶ୍ୱର ଓ ଆଖପାଖ ଅଞ୍ଚଳରେ କୋଟିଏରୁ ଊର୍ଦ୍ଧ୍ୱ ଟଙ୍କାର ୩ଟି ପ୍ଲଟ୍ , ୮୯ ଲକ୍ଷ ୪୬ ହଜାର ଟଙ୍କାର ବ୍ୟାଙ୍କ ଡିପୋଜିଟ୍ ଓ ଇନ୍ସ୍ୟୁରାନ୍ସ ରହିଛି। ତେବେ ପଟିଆରେ ଥିବା ଫ୍ଲାଟ୍, ଖଣ୍ଡଗିରିରେ ଥିବା ସପ୍, ୩୫୫ ଗ୍ରାମ ସୁନା ଅଳଙ୍କାର, ୬୯୨ ଗ୍ରାମ ରୁପା ଅଳଙ୍କାର, ଗୋଟିଏ ୪ ଚକିଆ ଯାନ, ଦୁଇଟି ବାଇକ୍ର ମୂଲ୍ୟ ଦିଆଯାଇନାହିଁ।
ଅନ୍ୟପକ୍ଷରେ ରବି ଓଡ଼ିଶା ବାହାରେ ଥିବା ରିୟଲ୍ ଇଷ୍ଟେଟ୍ରେ ବହୁ ଟଙ୍କା ଲଗାଇଥିବା ତଦନ୍ତବେଳେ ଜଣାପଡିଛି। ସେସବୁ ବେନାମି ସମ୍ପତ୍ତି ହୋଇଥିବାରୁ ଭିଜିଲାନ୍ସ ଯାଞ୍ଚ ଜାରି ରଖିଛି। ଜବତ ଟଙ୍କା ଓ କାଗଜପତ୍ରକୁ ଚାର୍ଟାର୍ଡ ଆକାଉଣ୍ଟାଣ୍ଟ ଏବଂ ବ୍ୟାଙ୍କିଙ୍ଗ୍ କନ୍ସଲ୍ଟାଣ୍ଟ ଯାଞ୍ଚ କରୁଛନ୍ତି। ଏହାର ତଦନ୍ତ ଚାଲୁ ରହିଥିବା ଭିଜିଲାନ୍ସ ପକ୍ଷରୁ ସୂଚନା ଦିଆଯାଇଛି। ତେବେ ରିପୋର୍ଟ ଲେଖାହେବା ପର୍ଯ୍ୟନ୍ତ ହିସାବ ସରି ନ ଥିବାରୁ ଠାବ ସମ୍ପତ୍ତି ଓ ଆୟ ବହିର୍ଭୂତ ସମ୍ପତ୍ତିର ମୋଟ ମୂଲ୍ୟ ସମ୍ପର୍କରେ ସ୍ପଷ୍ଟ ହୋଇନାହିଁ। ତେବେ ରବିଙ୍କ ସମ୍ପତ୍ତିର ମୂଲ୍ୟ ୬ କୋଟିରୁ ଊର୍ଦ୍ଧ୍ୱ ଟଙ୍କା ହେବ ବୋଲି ଭିଜିଲାନ୍ସର ଜଣେ ଅଧିକାରୀ ଅନୁମାନ କରିଛନ୍ତି।
