ବ୍ରହ୍ମପୁର ଅଫିସ,୧୦ା୨: ଗଞ୍ଜାମ ଜିଲା ଗୋପାଳପୁର ନିର୍ବାଚନ ମଣ୍ଡଳୀ ରଙ୍ଗେଇଲୁଣ୍ଡା ବ୍ଲକରେ ତ୍ରିସ୍ତରୀୟ ପଞ୍ଚାୟତ ନିର୍ବାଚନ ପାଇଁ ଆସନ୍ତା ୧୮ରେ ଭୋଟଗ୍ରହଣ ହେବ। ଆଉ ମାତ୍ର ୮ ଦିନ ଥିବାରୁ ସବୁ ଦଳର ପ୍ରଚାର ଜୋରଦାର ହୋଇଛି। ଏହି ବ୍ଲକରେ ୩ ଜିଲା ପରିଷଦ ଜୋନ୍ ଅଛି। ସବୁ ଜୋନ୍ରେ ଶାସକ ବିଜେଡି ଓ ମୁଖ୍ୟ ବିରୋଧୀ ଭାଜପା ମଧ୍ୟରେ କଡ଼ା ମୁକାବିଲା ହେଉଛି। କଂଗ୍ରେସ ମଧ୍ୟ ୩ଟି ଯାକ ଜୋନ୍ରେ ଲଢ଼େଇ କରୁଛି। ତେଣୁ ବ୍ଲକର ସମସ୍ତ ୩୨ ପଞ୍ଚାୟତରେ ଭୋଟ ପ୍ରଚାର ସରଗରମ ହୋଇଯାଇଛି। ନିର୍ବାଚନ ବେଳେ ଗୋଳନ୍ଥରାରେ
ତୈଳ ଡିପୋ ପ୍ରସଙ୍ଗ ଉଠିଛି। ବିଜେଡି ଏହାକୁ ନେଇ ପ୍ରଚାର କରୁଛି। ତେଣୁ ଭାଜପାକୁ ଅଡ଼ୁଆ ହୋଇଛି।
ସୂଚନାଯୋଗ୍ୟ, ୨୦୧୭ ପଞ୍ଚାୟତ ନିର୍ବାଚନୀ ପ୍ରଚାର ପାଇଁ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ରଙ୍ଗେଇଲୁଣ୍ଡା ବ୍ଲକକୁ ଆସିଥିଲେ। ସେତେବେଳେ ସେ ପେଟ୍ରୋଲିୟମ ଓ ପ୍ରାକୃତିକ ଗ୍ୟାସ୍ ମନ୍ତ୍ରୀ ଥିଲେ। କନିଷି ହାଟ ନିକଟ ପଡ଼ିଆରେ ଆୟୋଜିତ ସଭାରେ ଖୁବଶୀଘ୍ର ଗୋଳନ୍ଥରାରେ ଆଇଓସିଏଲ, ବିପିସିଏଲ ଓ ଏଚପିସିଏଲ ମିଳିତ ତୈଳ ଡିପୋ ପ୍ରତିଷ୍ଠା ହେବାର ଘୋଷଣା କରିଥିଲେ। ଏ ବାବଦରେ ପ୍ରାୟ ୩୦ ହଜାର କୋଟି ଟଙ୍କା ବ୍ୟୟ ହେବା ଦର୍ଶାଇଥିଲେ। ମନ୍ତ୍ରୀଙ୍କ ଭାଷଣ ଶୁଣି ଅଞ୍ଚଳବାସୀ ଖୁସି ହୋଇଥିଲେ। ଏହାଦ୍ୱାରା ବହୁ ସଂଖ୍ୟକ ଲୋକଙ୍କୁ କାମଧନ୍ଦା ମିଳିବା ସହ ଜିଲାର ଅର୍ଥନୀତି ବିକାଶ ଲାଗି ସହାୟକ ହେବାର ଆଶା ପ୍ରକଟ କରିଥିଲେ। ଘୋଷଣାର ଏବେ ୫ ବର୍ଷ ବିତିଛି ଏବଂ ଡିପୋର ନଁା ଗନ୍ଧ ନ ଥିବାରୁ ଅସନ୍ତୋଷ ବଢ଼ିଛି। ଅପରପକ୍ଷରେ ଦୀର୍ଘ ବର୍ଷ ତଳୁ ବ୍ରହ୍ମପୁର ରେଳଷ୍ଟେଶନ ପାର୍ଶ୍ୱରେ ଥିଲା ତୈଳ ଡିପୋ। ଗୋଳନ୍ଥରାକୁ ଦୃଷ୍ଟିରେ ରଖି ସେଠାରୁ ହଟାଇ ଦିଆଗଲା। ଫଳରେ ଏହା ଉପରେ ନିର୍ଭର କରୁଥିବା ଶତାଧିକ ଶ୍ରମିକଙ୍କ ପେଟପାଟଣାକୁ ପ୍ରଭାବିତ ସାଙ୍ଗକୁ ଟ୍ୟାଙ୍କ ମାଲିକଙ୍କ କ୍ଷତି ଘଟିଲା। ପରବର୍ତ୍ତୀ ପର୍ଯ୍ୟାୟରେ ପେଟ୍ରୋଲ ଓ ଡିଜେଲ ଗଞ୍ଜାମ ସମେତ ଦକ୍ଷିଣାଞ୍ଚଳ ଜିଲାଗୁଡ଼ିକ ନିମନ୍ତେ ଜଟଣୀ ଓ ପାରାଦୀପରୁ ଆସୁଛି। ଫଳରେ ପରିବହନ ଖର୍ଚ୍ଚ ବଢ଼ିବାରୁ ଗ୍ରାହକଙ୍କୁ ମହଙ୍ଗା ମାଡ଼ ହେଉଛି। ତେଣୁ ଜନ ଅସନ୍ତୋଷ ଅବ୍ୟାହତ ରହିଛି। ପ୍ରତିକ୍ରିୟା ମଧ୍ୟ ପ୍ରକାଶ ପାଉଛି। ଏବେ ପଞ୍ଚାୟତ ନିର୍ବାଚନରେ ବିଜେଡି ପକ୍ଷରୁ ଏହାକୁ ପ୍ରସଙ୍ଗ କରାଯାଇଛି। ଭାଜପାକୁ କାଠଗଡ଼ାରେ ଠିଆ କରିଛି। ଜିଲା ପ୍ରଶାସନ ପକ୍ଷରୁ ଜମି ଯୋଗାଇ ଦିଆ ନ ଯିବାରୁ ଗୋଳନ୍ଥରାରେ ହୋଇପାରି ନ ଥିବା କାଉଣ୍ଟର ପ୍ରଚାର କରୁଛି ଭାଜପା।
ଭାଜପା ନେତାଙ୍କ କହିବାନୁସାରେ ଗଞ୍ଜାମ ଜିଲା ରଙ୍ଗେଇଲୁଣ୍ଡା ନିକଟରେ ଟାଟା କମ୍ପାନୀର ସ୍ବତନ୍ତ୍ର ଅର୍ଥନୈତିକ ଜୋନ୍(ଏସ୍ଇଜେଡ)ପରିସରରେ ତୈଳ ଡିପୋ ସ୍ଥାପନ ଲାଗି ପଦକ୍ଷେପ ନିଆଯାଇଛି। ତେବେ ଏହାକୁ ନେଇ ବିଜେଡି ରଜାନୀତି କରଣରେ ଅଯଥା ଅପପ୍ରଚାର କରୁଛି। ଏହାର ଜବାବରେ ବିଜେଡି ନେତା କହିବାନୁସାରେ ଏସ୍ଇଜେଡ ଏବେବି ଅସମ୍ପୂର୍ଣ୍ଣ ଥିବାରୁ ଅନିଶ୍ଚିତ ହୋଇଯାଇଛି। ଅନ୍ୟପକ୍ଷରେ ବ୍ଲକର ୩୨ ପଞ୍ଚାୟତରେ ଶାସକ ଦଳ ପକ୍ଷରୁ ମୁଖ୍ୟମନ୍ତ୍ରୀଙ୍କ ବହୁମୁଖୀ ବିକାଶ ଯୋଜନାର ବାର୍ତ୍ତା ଘରେ ଘରେ ବାଣ୍ଟୁଥିବା ବେଳେ ରାଜ୍ୟ ସରକାରଙ୍କ ଅପାରଗ ଓ ଭ୍ରଷ୍ଟ ଶାସନ ସମ୍ପର୍କରେ ଗଁା ଗଣ୍ଡା ଲୋକଙ୍କୁ ସଚେତନ କରାଇ
ଭାଜପା ଭୋଟ ମାଗୁଛି। ଏହି ବ୍ଲକର ସବୁ ଜୋନ ଓ ପଞ୍ଚାୟତରେ କଂଗ୍ରେସ ପ୍ରାର୍ଥୀ ଦେଇଥିଲେ ମଧ୍ୟ ପ୍ରଚାର କ୍ଷେତ୍ରରେ ପଛରେ ପଡ଼ିଛି। ବିଜେଡି ଓ ଭାଜପା ମଧ୍ୟରେ ଭୋଟ ଯୁଦ୍ଧ ଘମାଘୋଟ ହୋଇଛି।
