ଚଣ୍ଡିଗଡ,୨୦ ।୧୧: ଗୁରୁପର୍ବ ଅବସରରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ୩ ନୂଆ କୃଷି ଆଇନକୁ ପ୍ରତ୍ୟାହାର କରିନେବା ଘୋଷଣା କରିବା ପରେ ପଞ୍ଜାବ ରାଜନୀତିର ସମିକରଣ ବଦଳି ଯିବା ପରି ଲକ୍ଷ୍ୟ କରାଯାଇଛି । ଆଗାମୀ ୨୦୨୨ରେ ହେବାକୁ ଥିବା ୧୧୭ ଆସନ ବିଶିଷ୍ଟ ବିଧାନସଭା ନିର୍ବାଚନରେ ଭାରତୀୟ ଜନତା ପାର୍ଟି(ଭାଜପା) ଗେମ ଚେଞ୍ଜର ହୋଇପାରେ ବୋଲି କୁହାଯାଉଛି । ଏହାର ଆଉ ଏକ ବଡ କାରଣ ହେଉଛି ରାଜ୍ୟର କୃଷି କାର୍ଯ୍ୟ କରୁଥିବା ୭୫ ପ୍ରତିଶତ ଜନସଂଖ୍ୟାର ୭୭ ବିଧାନସଭା ଆସନରେ ଏହି ନୂଆ କୃଷି ଆଇନ ଅଧିକ ପ୍ରଭାବ ପକାଇଥାଆନ୍ତା । ହେଲେ ଏବେ ଏହା ବଦଳି ଯାଇଛି । ତେଣୁ ଆଗାମୀ ନିର୍ବାଚନରେ ଭାଜପା ଏହି ଆସନରେ ତା’ର ଲାଭ ଉଠାଇପାରେ ବୋଲି କୁହାଯାଉଛି ।
କୃଷି ଆଇନକୁ ନେଇ ପଞ୍ଜାବର ରାଜନୀତି ଭାଜପା ପାଇଁ କଠିନ ହୋଇଯାଇଥିଲା । ପାର୍ଟି ନେତାଙ୍କୁ ଲଗାତାର ଭାବେ କୃଷକମାନେ ବିରୋଧ କରି ଆସୁଥିଲେ । ନେତାଙ୍କ ଘର ବାହାରେ କୃଷକମାନେ ଡେରା ପକାଇଥିଲେ । ସଡ଼କ ଉପରକୁ ଆସୁଥିବା ନେତାଙ୍କୁ ବି କୃଷକଙ୍କ ବିରୋଧର ସାମ୍ନା କରିବାକୁ ପଡୁଥିଲା । ନିକଟରେ ସେଠାରେ ହୋଇଥିବା ନଗର ନିଗମର ନିର୍ବାଚନରେ କୃଷକଙ୍କ ବିରୋଧ ଯୋଗୁ ଦଳକୁ ପ୍ରାର୍ଥୀ ମିଳିବା ବି କଷ୍ଟକର ବ୍ୟାପାର ହୋଇ ଯାଇଥିଲା । ବାଧ୍ୟ ହୋଇ ଦଳ କେତେଜଣ ପଦାଧିକାରୀଙ୍କୁ ନିର୍ବାଚନ ମଇଦାନକୁ ଓହ୍ଲାଇଥିଲା । ଏହି ସମୟରେ କୃଷି ଆଇନକୁ ପ୍ରତ୍ୟାହାର କରିନେବା ଜରୁରୀ ଥିଲା । କରତାରପୁର କରିଡର ଖୋଲିବା ଠାରୁ ପଞ୍ଜାବର ଅନ୍ୟ ସମସ୍ୟାକୁ ନେଇ କେନ୍ଦ୍ରୀୟ ନେତୃତ୍ୱ ଲଗାତାର ଭାବେ ପଞ୍ଜାବର ନେତାଙ୍କଠାରୁ ଫିଡବ୍ୟାକ ବି ନେଉଥିଲେ । ଏହାକୁ ନେଇ ଦିଲ୍ଲୀରେ କିଛି ବୈଠକ ବି ଆୟୋଜନ କରାଯାଇଥିଲା । ନିକଟରେ ପଞ୍ଜାବ ନେତାଙ୍କ ଏକ ପ୍ରତିନିଧିମଣ୍ଡଳ ପ୍ରଧାନମନ୍ତ୍ରୀ ନରନ୍ଦ୍ର ମୋଦି, ରାଷ୍ଟ୍ରୀୟ ଅଧ୍ୟକ୍ଷ ଜେପି ନଡ୍ଡା, ସ୍ୱରାଷ୍ଟ୍ର ମନ୍ତ୍ରୀ ଅମିତ ଶାହ ଓ ପ୍ରତିରକ୍ଷାମନ୍ତ୍ରୀ ରାଜନାଥ ସିଂଙ୍କ ସହ ସାକ୍ଷାତ୍ କରି ପଞ୍ଜାବରେ ପରିବର୍ତ୍ତିତ ରାଜନୈତିକ ସମିକରଣର ସୂଚନା ଦେଇଥିଲେ । ଏହାପରେ ପ୍ରଧାନମନ୍ତ୍ରୀ ନୂଆ କୃଷି ଆଇନକୁ ପ୍ରତ୍ୟାହାର କରିନେବା ଘୋଷଣା କରିବା ପରେ ଏବେ ପଞ୍ଜାବ ରାଜନୀତିର ସମିକରଣ ବଦଳି ଯାଇଥିବା କୁହାଯାଉଛି । ତେଣୁ ଏବେ ଭାଜପା ପଞ୍ଜାବ ରାଜନୀତିରେ ଗେମ ଚେଞ୍ଜର ହୋଇପାରେ ବୋଲି ଅନୁମାନ କରାଗଲାଣି ।
