ନୂଆଦିଲ୍ଲୀ,୨୬।୭: କେନ୍ଦ୍ର ସରକାରଙ୍କ କୃଷି ଆଇନକୁ ବିରୋଧ କରି କଂଗ୍ରେସ ନେତା ରାହୁଲ ଗାନ୍ଧୀ ସୋମବାର ଟ୍ରାକ୍ଟର ଚଳାଇ ସଂସଦରେ ପହଞ୍ଚିଥିଲେ। ଯାହାକୁ ନେଇ ଦିନତମାମ ରାହୁଲ ଚର୍ଚ୍ଚାରେ ରହିଥିଲେ। ତେବେ ରାହୁଲଙ୍କ ପରେ ଏବେ ଉକ୍ତ ଟ୍ରାକ୍ଟର ଚର୍ଚ୍ଚାର ପରିସରକୁ ଆସିଛି। କାରଣ ଦିଲ୍ଲୀ ପୋଲିସ ଉକ୍ତ ଟ୍ରାକ୍ଟରକୁ ଜବତ କରିଛି। ସବୁଠାରୁ ବଡ଼ କଥା ହେଲା ଉକ୍ତ ଟ୍ରାକ୍ଟରରେ କୌଣସି ନମ୍ବର ପ୍ଲେଟ୍ ନ ଥିବା lପୋଲିସ ସୂଚନା ଦେଇଛି। ସୂଚeନାଯୋଗ୍ୟ, ମୌସୁମୀ ଅଧିବେଶନ ଯୋଗୁ ଏହି ଅଞ୍ଚଳରେ ୧୪୪ଧାରା ବଳବତ୍ତର ରହିଛି। ଏଭଳି ସ୍ଥିତିରେ ରାହୁଲ ପୂର୍ବରୁ କୌଣସି ସୂଚନା ନ ଦେଇ ଟ୍ରାକ୍ଟର ଚଳାଇ ସଂସଦରେ ପହଞ୍ଚିଥିଲେ। ରାହୁଲଙ୍କ ସହ ରଣଦୀପ ସୁର୍ଜଓ୍ବୋଲା, ଶ୍ରୀନିବାସ ବି.ଭି., ଦୀପେନ୍ଦ୍ର ହୁଡ୍ଡାଙ୍କ ସମେତ ଅନ୍ୟ ନେତାମାନେ ମଧ୍ୟ ଉକ୍ତ ଟ୍ରାକ୍ଟରରେ ବସିଥିବାର ଦେଖିବାକୁ ମିଳିଥିଲା। ରାହୁଲ ଗାନ୍ଧୀ ସଂସଦ ଭବନ ଭିତରକୁ ପଳାଇଥିବା ବେଳେ ପୋଲିସ କିନ୍ତୁ ସୁର୍ଜଓ୍ବୋଲା ଓ ଶ୍ରୀନିବାସଙ୍କୁ ଗିରଫ କରି ପୁଣି ଛାଡ଼ିଦେଇଥିଲା। ନୂଆଦିଲ୍ଲୀ ଅଞ୍ଚଳରେ ଟ୍ରାକ୍ଟର ଚଳାଇବା ଓ ଆଣିବା ଉପରେ ନିଷେଧାଦେଶ ରହିଛି। ହେଲେ ରାହୁଲ ମୋଟରଯାନ ଆଇନର ଉଲ୍ଲଂଘନ କରିଥିବା ଅଭିଯୋଗ ହୋଇଛି। ତେଣୁ ଆଇନ ଉଲ୍ଲଂଘନ ଅଭିଯୋଗରେ ଉକ୍ତ ଟ୍ରାକ୍ଟରକୁ ଜବତ କରାଯାଇଛି।
