ନୂଆଦିଲ୍ଲୀ,୩୧ା୧(ପି.ଟି.): ସାଧାରଣତନ୍ତ୍ର ଦିବସରେ ଟ୍ରାକ୍ଟର ରାଲି ବେଳେ ଲାଲକିଲ୍ଲା ହିଂସାକୁ ନେଇ କଠୋର ହୋଇଛି ଦିଲ୍ଲୀ ପୋଲିସ। ପୋଲିସକୁ ବର୍ତ୍ତମାନ ସୁଦ୍ଧା ଦିଲ୍ଲୀ ହିଂସା ସମ୍ପର୍କିତ ୧,୭୦୦ ଭିଡିଓ କ୍ଲିପ୍ ଏବଂ ସିସିଟିଭି ଫୁଟେଜ୍ ମିଳିଛି। ଫୋରେନ୍ସିକ୍ ବିଶେଷଜ୍ଞଙ୍କ ସହାୟତାରେ ସେଗୁଡ଼ିକୁ ବିଶ୍ଳେଷଣ ସହ ଅଭିଯୁକ୍ତମାନଙ୍କୁ ଚିହ୍ନଟ ପାଇଁ ଉଦ୍ୟମ ଚାଲିଛି।
ପୋଲିସ ଯୁଗ୍ମ କମିଶନର (ଅପରାଧ) ବି.କେ. ସିଂ ଶନିବାର କହିଛନ୍ତି, ଲାଲକିଲ୍ଲା ଏବଂ ଆଇଟିଓ ହିଂସା ସମେତ ୯ଟି ମାମଲାର ତଦନ୍ତ କ୍ରାଇମ୍ବ୍ରାଞ୍ଚ କରୁଛି। ହିଂସା ଭିଆଇଥିବା ବ୍ୟକ୍ତିମାନଙ୍କୁ ଧରିବା ଲାଗି ସନ୍ଦିଗ୍ଧଙ୍କ ମୋବାଇଲ୍ ଫୋନ୍ କଲ୍ ଓ ସେମାନେ ବ୍ୟବହାର କରିଥିବା ଟ୍ରାକ୍ଟରଗୁଡ଼ିକର ରେଜିଷ୍ଟ୍ରେଶନ ନମ୍ବର ଯାଞ୍ଚ କରାଯାଉଛି। ୩୯୪ ପୋଲିସ କର୍ମଚାରୀ ଆହତ ଓ ଜଣେ ବିକ୍ଷୋଭକାରୀଙ୍କ ମୃତ୍ୟୁ ଘଟିଥିବା ଏହି ହିଂସା ସହ ଜଡ଼ିତ ସିସିଟିଭି ଫୁଟେଜ୍କୁ ବିଶ୍ଳେଷଣ କରିବା ଲାଗି ନ୍ୟାଶନାଲ ଫୋରେନ୍ସିକ୍ ସାଇନ୍ସ ୟୁନିଭର୍ସିଟିର ଏକ ଟିମ୍କୁ ଅନୁରୋଧ କରାଯାଇଛି। ହିଂସା ସମ୍ପର୍କରେ ଲୋକଙ୍କୁ ତଥ୍ୟ ମାଗିବା ପାଇଁ ପ୍ରମୁଖ ଖବରକାଗଜଗୁଡ଼ିକୁ ଅନୁରୋଧ କରାଯାଇଛି। ଏକ ଫୋରେନ୍ସିକ୍ ଟିମ୍ ଶନିବାର ଲାଲକିଲ୍ଲା ଯାଇ ପ୍ରମାଣ ସଂଗ୍ରହ କରିଛି।
