ଭବାନୀପାଟଣା,୩୦।୧୦(ସ୍ବ.ପ୍ର.): ପୋଲ ଭୁଶୁଡି ପଡିବାରୁ ୨ ଚଳନ୍ତା କାର୍ ବ୍ରିଜ୍ ତଳକୁ ଖସିପଡିଛି। ଏପରି ଏକ ଅଭାବନୀୟ ଘଟଣା ଘଟିଛି କଳାହାଣ୍ଡି ଜିଲା ଭବାନୀପାଟଣା ସହର ନିକଟ ଭାଗୀରଥି ପାର୍କ ନିକଟରେ। କାର୍ରେ ଥିବା ୫ ଜଣଙ୍କୁ ଉଦ୍ଧାର କରାଯାଇ ଡାକ୍ତରଖାନାରେ ଭର୍ତ୍ତି କରାଯାଇଛି।
ଏଥିରେ ନବରଙ୍ଗପୁର ଜିଲା ନନ୍ଦିଘୋଷ ପ୍ରତିନିଧି ଅଜିତ ନାଏକଙ୍କ କାର୍ ପୋଲ ତଳକୁ ଖସିପଡିଛି। ଫଳରେ ତାଙ୍କ ଝିଅର ମୁଣ୍ଡରେ ଆଘାତ ଲାଗିଥିବା ବେଳେ ପୁଅଙ୍କ ଶରୀରର ବିଭିନ୍ନ ସ୍ଥାନରେ କ୍ଷତ ସୃଷ୍ଟି ହୋଇଛି। ଅନ୍ୟ କାର୍ରେ ଥିବା ଯାତ୍ରୀଙ୍କ ସମ୍ପର୍କରେ ସୂଚନା ମିଳିପାରି ନାହିଁ । ମିଳିଥିବା ସୂଚନା ମୁତାବକ, କଳାହାଣ୍ଡି ଜିଲା ସଦର ମହକୁମା ଭବାନୀପାଟଣାରୁ ଥୁଆମୂଳ ରାମପୁର ୪୪ ନମ୍ବର ରାଜ୍ୟ ରାଜପଥରେ ଏହି ଅଘଟଣ ଘଟିଛି।
ଅନ୍ୟଦିନ ଭଳି ରବିବାର ଅପରାହ୍ନରେ ବ୍ରିଜ୍ ଉପରେ ଯାନବାହନ ଓ ଲୋକେ ଯିବା ଆସିବା କରୁଥିଲେ। ହେଲେ ହଠାତ୍ ବ୍ରିଜ୍ଟି ଭୁଶୁଡି ପଡିଥିଲା। ସେତିକିବେଳେ ବ୍ରିଜ୍ ଉପରେ ଯାଉଥିବା ୨ଟି କାର୍ ମଧ୍ୟ ତଳକୁ ଖସି ପଡିଥିଲା। ୨ଟି କାର୍ରେ ୫ଜଣ ଥିଲେ। ସ୍ଥାନୀୟ ଲୋକଙ୍କଠାରୁ ଖବର ପାଇ ପୋଲିସ ଓ ଦମକଳ ବାହିନୀ ଘଟଣାସ୍ଥଳରେ ପହଞ୍ଚି ଆହତଙ୍କୁ ଉଦ୍ଧାର କରିଥିଲେ।
