ଥିରୁଭାନନ୍ତପୁରମ୍,୧୦ା୫: କେରଳର କବି କେ. ସତ୍ଚିଦାନନ୍ଦନ ଫେସ୍ବୁକ୍ରେ ଏକ ଭିଡିଓ ପୋଷ୍ଟ କରିଥିଲେ। ରାଜ୍ୟରେ ସଦ୍ୟ ଅନୁଷ୍ଠିତ ବିଧାନସଭା ନିର୍ବାଚନରେ ଭାଜପା ହାରିବ ବୋଲି ଏଥିରେ ବ୍ୟଙ୍ଗ କରାଯାଇଥିଲା। ଉକ୍ତ ପୋଷ୍ଟ ପରେ ଫେସ୍ବୁକ୍ ତାଙ୍କ ଆକାଉଣ୍ଟକୁ ୨୪ ଘଣ୍ଟା ପାଇଁ ବ୍ଲକ୍ କରିଦେଇଥିଲା। ଏନେଇ ସତ୍ଚିଦାନନ୍ଦନ କହିଛନ୍ତି, ତାଙ୍କ ପାଖକୁ ହ୍ବାଟ୍ସଆପ୍ରେ ଆସିଥିବା ମେସେଜ୍କୁ ସେ ସୋସିଆଲ ମିଡିଆ ପ୍ଲାଟ୍ଫର୍ମରେ ଶେୟାର କରିଥିଲେ। ସେଥିରେ ଜର୍ମାନୀର ଏକଚ୍ଛତ୍ରବାଦୀ ଶାସକ ଆଡୋଲ୍ଫ ହିଟ୍ଲର ନିଜ ପରାଜୟ ପରେ ସୈନ୍ୟମାନଙ୍କୁ ସମ୍ବୋଧିତ କରୁଥିବା ଦେଖାଯାଇଥିଲା। ମାଲୟାଲମ୍ ଭାଷାରେ କୁହାଯାଇଥିଲା, କେରଳ ନିର୍ବାଚନରେ ପରାଜୟ ପରେ ସ୍ବରାଷ୍ଟ୍ରମନ୍ତ୍ରୀ ଅମିତ୍ ଶାହା ଓ ଭାଜପାର ବରିଷ୍ଠ ନେତାମାନେ ଦଳୀୟ କର୍ମୀଙ୍କୁ ସମ୍ବୋଧନ କରୁଛନ୍ତି। ଏହା ବ୍ୟଙ୍ଗାତ୍ମକ ହୋଇଥିଲେ ହେଁ କାହାକୁ ଅପମାନିତ କଲାଭଳି ନୁହେଁ। ତେବେ ଭାରତ ଫେସ୍ବୁକ୍ର ଏକ ବଡ଼ ମାର୍କେଟ ହୋଇଥିବାରୁ କେନ୍ଦ୍ରରେ କ୍ଷମତାସୀନ ଭାଜପା କଥା ମାନି ତାଙ୍କ ଆକାଉଣ୍ଟକୁ ବ୍ଲକ୍ କରିଥିଲା ବୋଲି କବି ଅଭିଯୋଗ ଆଣିଛନ୍ତି। ବରିଷ୍ଠ କଂଗ୍ରେସ ନେତା ତଥା ଥିରୁଭାନନ୍ତପୁରମ୍ ଏମ୍ପି ଶଶୀ ଥରୁର କହିଛନ୍ତି, ସତ୍ଚିଦାନନ୍ଦନ୍ କେରଳର ଜଣେ ମହାନ୍ କବି। ରାଜନୀତିରେ ସେନ୍ସରଶିପ୍କୁ ଅନୁମତି ଦିଆଯିବା ଅନୁଚିତ।
