ନୂଆଦିଲ୍ଲୀ,୩୦।୧: ଲୋକଙ୍କ ନିକଟକୁ ଯାଇ ସରକାରୀ ଯୋଜନା ବିଷୟରେ ବୁଝାଇବାକୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ତାଙ୍କ ସରକାରର ସମସ୍ତ ମନ୍ତ୍ରୀଙ୍କୁ ନିର୍ଦ୍ଦେଶ ଦେଇଛନ୍ତି। ସଂସଦର ବଜେଟ ଅଧିବେଶନ ପୂର୍ବରୁ ପ୍ରଧାନମନ୍ତ୍ରୀ ତାଙ୍କର ସମସ୍ତ ମନ୍ତ୍ରୀଙ୍କ ସହ ଏକ ବୈଠକ କରିଥିଲେ। ଧାରା ୩୭୦ ରଦ୍ଦ ଏବଂ ରାମ ମନ୍ଦିର ବିବାଦର ଶାନ୍ତିପୂର୍ଣ୍ଣ ସମାଧାନ ଭଳି ପ୍ରସଙ୍ଗକୁ ଦର୍ଶାଇ ପ୍ରଧାନମନ୍ତ୍ରୀ ନିର୍ଦ୍ଦେଶ ଦେଇଛନ୍ତି ଯେ, ଏହି ନିଷ୍ପତ୍ତି ସାଧାରଣ ଲୋକଙ୍କ ମଧ୍ୟରେ ନିଆଯାଉ।
ସରକାରଙ୍କ ଦ୍ୱାରା ପରିଚାଳିତ କଲ୍ୟାଣମୂଳକ ଯୋଜନା ସମ୍ପର୍କରେ ପ୍ରଧାନମନ୍ତ୍ରୀ କହିଛନ୍ତି, ଜାତି, ଧର୍ମ ଏବଂ ଭୋଟ ବ୍ୟାଙ୍କ ନିର୍ବିଶେଷରେ ସରକାର ସେହି ନିଷ୍ପତ୍ତି ଗ୍ରହଣ କରିଛନ୍ତି, ଯାହା ଦ୍ୱାରା ସମସ୍ତ ଧର୍ମ ଏବଂ ଶ୍ରେଣୀ ଉପକୃତ ହେବ। ଏହା ଉଜ୍ଜଳା ଯୋଜନା ଅଧୀନରେ ମାଗଣା ଗ୍ୟାସ ସିଲିଣ୍ଡର ହେଉ କିମ୍ବା ପ୍ରଧାନମନ୍ତ୍ରୀ ଆବାସ ଯୋଜନା ରହିଛି। ତେଣୁ ମନ୍ତ୍ରୀମାନେ ଲୋକଙ୍କ ନିଟକୁ ଯାଇ ସରକାରଙ୍କର ପ୍ରତ୍ୟେକ ଯୋଜନା ବିଷୟରେ ବୁଝାଇବା ଆବଶ୍ୟକ। ଆସନ୍ତା ୨୫ ବର୍ଷ ମଧ୍ୟରେ ଦେଶର ଅଗ୍ରଗତି ପାଇଁ ସମସ୍ତେ କଠିନ ପରିଶ୍ରମ କରିବା ଆବଶ୍ୟକ ବୋଲି ଏହି ବୈଠକରେ ପ୍ରଧାନମନ୍ତ୍ରୀ କହିଛନ୍ତି।
ସୂଚନାନୁସାରେ, ଏହି ବୈଠକରେ ପ୍ରଧାନମନ୍ତ୍ରୀ ମଧ୍ୟ ସୋସିଆଲ ମିଡିଆରେ କିଛି ମନ୍ତ୍ରୀଙ୍କ କମ୍ ସକ୍ରିୟତାକୁ ନେଇ ବିରକ୍ତି ପ୍ରକାଶ କରିଥିଲେ। ସେ କହିଛନ୍ତି ଯେ, କିଛି ମନ୍ତ୍ରୀଙ୍କ ଇନଷ୍ଟାଗ୍ରାମରେ ମଧ୍ୟ ଆକାଉଣ୍ଟ ନାହିଁ। ସୋସିଆଲ ମିଡିଆରେ ସରକାରଙ୍କ ବାର୍ତ୍ତା ଲୋକମାନଙ୍କ ତଥା ବିଶେଷ କରି ଯୁବକମାନଙ୍କ ନିକଟରେ ପହଞ୍ଚାଇବାରେ ସବୁଠାରୁ ବଡ ବାହକ ହୋଇପାରେ, କାରଣ ଯୁବକମାନେ ସର୍ବଦା ମୋବାଇଲ ସହିତ ସଂଯୁକ୍ତ ଅଟନ୍ତି।
