ନୂଆଦିଲ୍ଲୀ,୨୧ ।୧୧: କେନ୍ଦ୍ର ସରକାରଙ୍କ ପକ୍ଷରୁ ମଙ୍ଗଳବାର ଏକାସାଙ୍ଗରେ ୭୧ ହଜାର ଯୁବବର୍ଗଙ୍କ୍ୁ ସ୍ଥାୟୀ ଚାକିରିର ନିଯୁକ୍ତି ପତ୍ର ଦିଆଯିବ । ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ୨୨ ନଭେମ୍ବରରେ ଭିଡିଓ କନଫରେନସିଂ ଜରିଆରେ ଲାଭାର୍ଥିଙ୍କୁ ନିଯୁକ୍ତି ପତ୍ର ଦେବେ । ଏହା ପୂର୍ବରୁ ପ୍ରଧାନମନ୍ତ୍ରୀ ମୋଦି ଦିପାବଳୀରେ ରୋଜଗାର ମେଳା ଜରିଆରେ ପ୍ରାୟ ୭୫ ହଜରା ଯୁବବର୍ଗଙ୍କୁ ନିଯୁକ୍ତି ପତ୍ର ଦେଇଥିଲେ । କେନ୍ଦ୍ର ସରକାରଙ୍କର ପ୍ରୟାସ ହେଉଛି ବିଭିନ୍ନ ମନ୍ତ୍ରଣାଳୟ ଓ ବିଭାଗରେ ଖାଲି ପଡିଥିବା ପଦକୁ ମିଶନ ମୋଡରେ ଦେଢ ବର୍ଷ ମଧ୍ୟରେ ପୂରଣ କରି ଦିଆଯିବ । ଏଥିପାଇଁ ଯୁଦ୍ଧକାଳୀନ ଭିତ୍ତିରେ କାମ ଚାଲିଛି ।
ସୂଚନାଯୋଗ୍ୟ, ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଜୁନରେ କେନ୍ଦ୍ରର ସମସ୍ତ ମନ୍ତ୍ରଣାଳୟ ଓ ବିଭାଗକୁ ଏହି ଦିଗରେ କାମ କରିବାକୁ ନିର୍ଦ୍ଦେଶ ଦେଇଥିଲେ । ଦୀପାବଳିରେ ଆୟୋଜିତ ହୋଇଥିବା ରୋଜଗାର ମେଳାରେ ସାରା ଦେଶର ଚୟନ କରାଯାଇଥିବା ଯୁବକଙ୍କୁ ନିଯୁକ୍ତି ପତ୍ର ଦିଆଯାଇଥିଲା । ଏଥିରେ ଗ୍ରୁପ-ଏ, ଗ୍ରୁପ-ବି(ଗେଜେଟେଡ), ଗ୍ରୁପ-ବି(ଅଣଗେଜେଟେଡ) ଏବଂ ଗ୍ରୁପ-ସି ନିଯୁକ୍ତି ସହିତ କେନ୍ଦ୍ରୀୟ ସଶସ୍ତ୍ର ବାହିନୀ, ସବ-ଇନ୍ସପେକ୍ଟର, କନଷ୍ଟେବଳ, ଜୁନିୟର କ୍ଲର୍କ(ଏଲଡିସି), ଷ୍ଟେନୋ, ପିଏ, ଆୟ ଅନ୍ତର୍ଭୁକ୍ତ ଟ୍ୟାକ୍ସ ଇନ୍ସପେକ୍ଟର, ରେଲୱେ ଏମଟିଏସ ପୋଷ୍ଟ ସାମିଲ ଥିଲା ।
ରୋଜଗାର ମେଳାରେ କେନ୍ଦ୍ର ସରକାରଙ୍କ ବହୁ ମନ୍ତ୍ରୀ ମଧ୍ୟ ଭାଗ ନେଇଥିଲେ । ଏହି ମନ୍ତ୍ରୀମାନେ ବିଭିନ୍ନ ରାଜ୍ୟରେ ପ୍ରଧାନମନ୍ତ୍ରୀଙ୍କ ଭିଡିଓ କନଫରେନସିଂ ସହିତ ଜଡିତ ଥିଲେ । ସେମାନେ ରାଜ୍ୟରେ ରହି ନିଯୁକ୍ତି ପତ୍ର ପ୍ରଦାନ କରିଥିଲେ । ନିଯୁକ୍ତି ମେଳାରେ ଓଡ଼ିଶାରୁ ଧର୍ମେନ୍ଦ୍ର ପ୍ରଧାନ, ଚଣ୍ଡିଗଡ଼ରୁ ଅନୁରାଗ ଠାକୁର, ମହାରାଷ୍ଟ୍ରର ପିୟୁଷ ଗୋଏଲ ଏବଂ ଗୁଜରାଟରୁ ମାନସୁଖ ମାଣ୍ଡବିୟ ଯୋଗ ଦେଇଥିଲେ । ଏହାସହ ଅନ୍ୟ ମନ୍ତ୍ରୀ ଏବଂ ଏମପିମାନେ ବି ନିଜ ନିଜ ଅଞ୍ଚଳରେ ଉପସ୍ଥିତ ରହି ନିଯୁକ୍ତ ପତ୍ର ପ୍ରଦାନ କରିଥିଲେ ।
