ନୂଆଦିଲ୍ଲୀ,୩୧।୧: ପାର୍ଲାମେଣ୍ଟର ବଜେଟ ଅଧିବେଶନ ସୋମବାରଠାରୁ ଆରମ୍ଭ ହୋଇଛି। ଏହାପୂର୍ବରୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଗଣମାଧ୍ୟମ ସହ କଥା ହୋଇଥିଲେ। ଏହି ସମୟରେ ସେ ବଜେଟ ଅଧିବେଶନକୁ ଫଳପ୍ରଦ କରିବାକୁ ଏମ୍ପିମାନଙ୍କୁ ନିବେଦନ କରିଥିଲେ। ଆମେ ସମସ୍ତେ ଏହି ଅଧିବେଶନକୁ ଯେତେ ଫଳପ୍ରଦ କରିବା, ଦେଶର ଅର୍ଥନୀତି ସେତେ ଉଚ୍ଚତାରେ ପହଞ୍ଚିବ। ନିର୍ବାଚନ ଅଧିବେଶନ ଆଲୋଚନା ଉପରେ ପ୍ରଭାବ ପକାଇଥାଏ, କିନ୍ତୁ ମୁଁ ସମସ୍ତ ଏମ୍ପିଙ୍କୁ ଅନୁରୋଧ କରୁଛି ଯେ ର୍ନିବାଚନ ଯିବ-ଆସିବ, କିନ୍ତୁ ବଜେଟ ଅଧିବେଶନ ବର୍ଷର ବ୍ଲୁ ପ୍ରିଣ୍ଟ ଆଙ୍କେ। ତେଣୁ ଏହାକୁ ଫଳପ୍ରଦ କରନ୍ତୁ। ଆଜିଠାରୁ ବଜେଟ ଅଧିବେଶନ ଆରମ୍ଭ ହେଉଛି। ଏହି ଅଧିବେଶନରେ ମୁଁ ସମସ୍ତ ଏମ୍ପିଙ୍କୁ ସ୍ବାଗତ କରୁଛି। ଚଳିତ ଅଧିବେଶନ ଦେଶର ଅର୍ଥନୈତିକ ପ୍ରଗତି, ଟିକାକରଣ କାର୍ଯ୍ୟକ୍ରମ, ମେଡ ଇନ ଇଣ୍ଡିଆ ଟିକାକୁ ନେଇ ବିଶ୍ୱରେ ଆତ୍ମବିଶ୍ୱାସ ସୃଷ୍ଟି କରେ ବୋଲି ପ୍ରଧାନମନ୍ତ୍ରୀ କହିଛନ୍ତି।
ପ୍ରଧାନମନ୍ତ୍ରୀ ମୋଦି ଆହୁରି ମଧ୍ୟ କହିଛନ୍ତି, ସମସ୍ତ ସାଂସଦ ଏବଂ ରାଜନୈତିକ ଦଳ ଖୋଲା ମନରେ ଗୁଣାତ୍ମକ ଆଲୋଚନା କରିବା ଉଚିତ୍। ଦେଶକୁ ଦ୍ରୁତ ଅଭିବୃଦ୍ଧି ପଥରେ ନେବାରେ ସାହାଯ୍ୟ କରନ୍ତୁ ବୋଲି ପ୍ରଧାନମନ୍ତ୍ରୀ ଏମ୍ପିମାନଙ୍କୁ ଅନୁରୋଧ କରିଛନ୍ତି।