ବେଙ୍ଗାଲୁରୁ,୭।୫: କର୍ନାଟକ ବିଧାନସଭା ନିର୍ବାଚନ ପାଇଁ ଭାରତୀୟ ଜନତା ପାର୍ଟି(ଭାଜପା) ତା’ର ସମସ୍ତ ଶକ୍ତି ଲଗାଇ ଦେଇଛି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ରବିବାର ଲଗାତାର ଦ୍ୱିତୀୟ ଦିନ ବେଙ୍ଗାଲୁରୁରେ ମେଗା ରୋଡ ଶୋ’ରେ ବାହାରିଛନ୍ତି। ଏହି ରୋଡ ଶୋ’ ସମୟରେ ମୋଦି ୧୦ କିଲୋମିଟର ଅତିକ୍ରମ କରିବେ। ଏଥିରେ ସାମିଲ ହେବା ଲାଗି ବହୁ ସଂଖ୍ୟାରେ ଲୋକେ ପହଞ୍ଚିଛନ୍ତି। ଏହାପରେ ପ୍ରଧାନମନ୍ତ୍ରୀ ଶିବମୋଗା ଓ ମୌସୁରରେ ଦୁଇଟି ଜନସଭା କରିବେ।
ରୋଡ ଶୋ’ରେ ଲୋକ କଳାକାରମାନେ ବିଭିନ୍ନ ପ୍ରକାର ଅଭିନୟ କରିଛନ୍ତି। ଏହି ସମୟରେ ଭାଜପା ସମର୍ଥକଙ୍କ ମଧ୍ୟରେ ଅତ୍ୟଧିକ ଉତ୍ସାହ ଦେଖିବାକୁ ମିଳିଛି। ରାଜ୍ୟରେ ନିଟ ପରୀକ୍ଷା ନିର୍ଦ୍ଧାରିତ ଥିବାରୁ ପ୍ରଧାନମନ୍ତ୍ରୀ ୧୧ଟା ୩୦ ମଧ୍ୟରେ ଏହି ରୋଡ ଶୋ’କୁ ଶେଷ କରିବେ। ପ୍ରଧାନମନ୍ତ୍ରୀ ନ୍ୟୁ ତିପ୍ପାସଂନ୍ଦ୍ରା ରୋଡ ସ୍ଥିତ କେମ୍ପୋଗୌଡା ପ୍ରତିମାରୁ ସକାଳ ୧୦ଟାରେ ରୋଡ ଶୋ’ ଆରମ୍ଭ କରିଥିଲେ। ଏହାପୂର୍ବରୁ ପ୍ରଧାନମନ୍ତ୍ରୀ ୨୬ କିଲୋମିଟରର ରୋଡ ଶୋ’ କରିଥିଲେ।
