ଡେରାଡୁନ,୨୧।୧୦: ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଶକ୍ରବାର ୬ଷ୍ଠ ଥର ପାଇଁ ବାବା କେଦାରନାଥ ଗସ୍ତ କରିଛନ୍ତି। ସେଠାରେ ପହଞ୍ଚିବା ପରେ ମୋଦିଙ୍କୁ ତୀଥପୁରୋହିତମାନେ ତାଙ୍କୁ ସ୍ବାଗତ କରିଥିଲେ। ଏହାପରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏସ୍ପିଜିଙ୍କ ସହ ମନ୍ଦିର ପରିସରରେ ପହଞ୍ଚିଥିଲେ। ବାବା କେଦାରନାଥଙ୍କୁ ଦର୍ଶନ କରିବା ସହ ସେ ମନ୍ଦିରର ଗର୍ଭଗୃହକୁ ମଧ୍ୟ ପରିଦର୍ଶନ କରିଛନ୍ତି। ଏହି ସମୟରେ ମୋଦିଙ୍କୁ ନିଆରା ଲୁକ୍ରେ ଦେଖିବାକୁ ମିଳିଥିଲା। ଧଳା ରଙ୍ଗର ପୋଷାକ, ଲାଲ ପାହାଡି ଟୋପି ଏବଂ ଅଣ୍ଟାରେ ସାଫା ଏକ ଭିନ୍ନ ଲୁକ୍ରେ ନଜର ଆସିଲେ ମୋଦି। ଯେତେବେଳେ ବି ମୋଦି କେଦାରନାଥ ଧାମକୁ ଆସନ୍ତି, ସେତେବେଳେ ତାଙ୍କ ପୋଷାକ ସ୍ବତନ୍ତ୍ର ରହିଥାଏ। ତାଙ୍କର ଏହି ସ୍ବତନ୍ତ୍ର ଅନ୍ଦାଜକୁ ମଧ୍ୟ ଲୋକେ ବେଶ୍ ପସନ୍ଦ କରିଥାନ୍ତି। ସୂଚନାଯୋଗ୍ୟ, ଆଜି ପ୍ରଧାନମନ୍ତ୍ରୀ ମୋଦି ପିନ୍ଧିଥିବା ପୋଷାକକୁ ହିମାଚଳର ଚାମ୍ବାରେ ନିର୍ମିତ ଏକ ବିଶେଷ ପୋଷାକ ଚୋଲା ଡୋରା ବୋଲି କୁହାଯାଏ। କୁହାଯାଉଛି, ଏହି ପୋଷାକ ତାଙ୍କୁ ହିମାଚଳର ଜଣେ ମହିଳା ଉପହାର ଦେଇଥିଲେ। ଏହାପୂର୍ବର ୩ଥର ପ୍ରଧାନମନ୍ତ୍ରୀ ମୋଦି ଯେତେବେଳେ କେଦାରନାଥ ଆସିଥିଲେ, ସେତେବେଳେ ବି ତାଙ୍କ ପୋଷାକ ଚର୍ଚ୍ଚାରେ ରହିଥିଲା।
