ଲକ୍ଷ୍ନୌ,୨୪ ।୨: ଉତ୍ତର ପ୍ରଦେଶର ପଞ୍ଚମ ପର୍ଯ୍ୟାୟ ନିର୍ବାଚନ ପାଇଁ ଷ୍ଟାର ପ୍ରଚାରକ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଗରୁବାର ପ୍ରୟାଗରାଜରେ ଏକ ଜନସଭାକୁ ସମ୍ବୋଧନ କରିଛନ୍ତି । ଏହି ଅବସରରେ ସେ ବିରୋଧିଙ୍କ ଉପରେ ଖୁବ୍ ବର୍ଷିଛନ୍ତି । ସେ କହିଛନ୍ତି ୨୧ଶ ଶତାବ୍ଦିର ୟୁପି ଏବେ ଆଶାବାଦୀ ଅଛି । ୟୁପି ଏବେ ବଡ ବଡ ସ୍ୱପ୍ନ ନେଇ ଆଗକୁ ବଢୁଛି । ଡବଲ ଇଞ୍ଜିନ ସରକାର ଉତ୍ତର ପ୍ରଦେଶର ବିକାଶ ପାଇଁ ଦିନ ରାତି ଏକାଠି କରି ଦେଇଛି । ୟୁପିର ସ୍ୱପ୍ନ ପୁରଣ ହେବାକୁ ହେଲେ ନେତୃତ୍ୱର ଆବଶ୍ୟକତା ଅଧିକ ରହିଛି । ଏଠି ପ୍ରଶ୍ନ ଉଠୁଛି ନେତୃତ୍ୱ କିଭଳି ହେବା ଦରକାର । ବଦଳୁଥିବା ବିଶ୍ୱ ବ୍ୟବସ୍ଥା ମଧ୍ୟରେ ଭାରତ ମଜଭୁତ ହେବା କେତେ ଜରୁରୀ ତାହା ବି ଜାଣିବା ଆବଶ୍ୟକ ।
ବିରୋଧୀଙ୍କୁ ଟାର୍ଗେଟ କରି ମୋଦି କହିଛନ୍ତି ଆଜି ଯେଉଁ ପରିବାରବାଦୀ ଆପଣଙ୍କ ନିକଟକୁ ଆସି ଭୋଟ ମାଗୁଛନ୍ତି ସେଭଳି ବ୍ୟକ୍ତି ସଶକ୍ତ ଓ ଆଧୁନିକ ଉତ୍ତର ପ୍ରଦେଶର ନିର୍ମାଣ କରିପାରିବେ ନାହିଁ । ଏମାନେ ମିଥ୍ୟାବାଦୀ, ପଳାୟନବାଦୀ ଓ ଏମାନେ ଘୋର ଅବିଶ୍ୱାସୀ । ଆସନ ଚାଲି ନ ଯାଉ ସେଥିପାଇଁ ଏମାନେ ନୋଏଡା ଓ ବିଜନୌର ଆସୁ ନାହାନ୍ତି । ଏହିପରି ଭାବେ ମୋଦି ବିରୋଧିଙ୍କୁ ଟାର୍ଗେଟ କରିବା ସହ ଉତ୍ତର ପ୍ରଦେଶରେ ପୁଣିଥରେ ଯୋଗୀ ସରକାର ଉତ୍ତମ ଶାସନ ଯୋଗାଇ ଦେବେ ବୋଲି ସେ କହିଛନ୍ତି ।
