ବାରାଣସୀ,୧୩ ।୧୨: ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ସୋମବାର ତାଙ୍କ ନିର୍ବାଚନ ମଣ୍ଡଳୀ ବାରାଣସୀ ଗସ୍ତ କରିଛନ୍ତି । ସେଠାରେ ସେ ଶ୍ରୀ କାଶୀ ବିଶ୍ୱନାଥ କରିଡରର ଉଦ୍ଘାଟନ କରିଛନ୍ତି । ସୋମବାର ପ୍ରଥମେ ମୋଦି କାଳ ଭୈରବ ମନ୍ଦିରରେ ପହଞ୍ଚି ପୂଜାର୍ଚ୍ଚନା କରିଥିଲେ ଭଗବାନଙ୍କ ଆଶୀର୍ବାଦ ନେଇଥିଲେ । ଏହାପରେ ସେ କ୍ରୁଜ୍ରେ ଗଙ୍ଗା ମାର୍ଗ ଦେଇ ଲଳିତାଘାଟ ଯାଇଥିଲେ । ସେଠାରେ ସେ ସମ୍ପୂର୍ଣ୍ଣ ଗେରୁଆ ବସ୍ତ୍ର ପରିଧାନ କରି ଗଳାରେ ରୁଦ୍ରାକ୍ଷ ପିନ୍ଧି ଗଙ୍ଗାରେ ବୁଡ ପକାଇବା ସହିତ ଜଳାଭିଷେକ ପାଇଁ ଗଙ୍ଗାର ପବିତ୍ର ଜଳ ନେଇ କାଶୀ ବିଶ୍ୱନାଥଙ୍କ ନିକଟରେ ପହଞ୍ଚି ପୂଜାର୍ଚ୍ଚନା କରିଥିଲେ । ଏହାପରେ ସେ କାଶୀ ବିଶ୍ୱନାଥ ଧାମର କରିଡର ଉଦ୍ଘାଟନ କରିଥିଲେ । ସୂଚନାଯୋଗ୍ୟ, କାଳ ଭୈରବଙ୍କ ଦର୍ଶନ କରିବା ପରେ ମୋଦି ବାହାରକୁ ଆସିବା ବେଳେ ସେଠାରେ ତାଙ୍କୁ ପଗଡି ଉପହାର ଦିଆଯାଇଥିଲା । ଏଥିପାଇଁ ମୋଦି ସୁରକ୍ଷା ପ୍ରୋଟୋକଲକୁ ଭାଙ୍ଗି ପଗଡି ଗ୍ରହଣ କରିଥିଲେ । ସେହିପରି କାଶୀ ବିଶ୍ୱନାଥ ଯିବା ବାଟରେ ସେ ବିଭିନ୍ନ ସ୍ଥାନରେ ପ୍ରୋଟୋକଲ ଭାଙ୍ଗିଥିବା ଦେଖାଯାଇଥିଲା ।
