ନୂଆଦିଲ୍ଲୀ,୯।୪: ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ରବିବାର କର୍ନାଟକର ବାନ୍ଦିପୁର ଟାଇଗର ରିଜର୍ଭ ପହଞ୍ଚିଛନ୍ତି। ସୂଚନାଯୋଗ୍ୟ, ମୋଦି ସେଠାରେ ବାନ୍ଦିପୁର ନ୍ୟାଶନାଲ ପାର୍କରେ ଇଣ୍ଟରନ୍ୟାଶନାଲ ବିଗ କ୍ୟାଟସ୍ ଏଲାଏନ୍ସର ଶୁଭାରମ୍ଭ କରିବେ।
ଇଣ୍ଟରନ୍ୟାଶନାଲ ବିଗ କ୍ୟାଟସ୍ ଏଲାଏନ୍ସ(ଆଇବିସିଏ) ବିଶ୍ୱର ୭ଟି ବଡ ବିଲେଇ ବାଘ, ସିଂହ, ଚିତାବାଘ, ହିମ ଚିତାବାଘ, ପୁମା, ଜାଗୁଆର ଓ ଚିତା ଉପରେ ସଂରକ୍ଷଣ ଓ ସୁରକ୍ଷା ଉପରେ ଧ୍ୟାନ ଦେବ।
ପ୍ରଧାନମନ୍ତ୍ରୀ ମୋଦି ଜୁଲାଇ ୨୦୧୯ରେ ବିଶ୍ୱ ନେତାଙ୍କଠାରୁ ଏହି ପଦକ୍ଷେପ ପାଇଁ ଆହ୍ବାନ କରିଥିଲେ, ଯାହାଦ୍ୱାରା ଏସିଆରେ ଏହି ଜୀବମାନଙ୍କର ଅବୈଧ ଶିକାର ଓ ବ୍ୟାପାର ବନ୍ଦ ହୋଇପାରିବ। ସୂଚନାଯୋଗ୍ୟ, ୨୦୧୪ ପରଠାରୁ ଦେଶରେ ଏହି ୭ଟି ଜୀବଙ୍କର ସଂଖ୍ୟା ବୃଦ୍ଧି ହୋଇଛି। ଏଥିମଧ୍ୟରୁ ଟାଇଗର ଜନସଂଖ୍ୟା ୨୦୧୮ରେ ୩୩ ପ୍ରତିଶତ ବୃଦ୍ଧି ପାଇ ୨,୯୬୭ରେ ପହଞ୍ଚିଛି, ୨୦୧୪ରେ ଏହା ୨,୨୨୬ ଥିଲା। ବାଘଙ୍କର ଶେଷ ଗଣନା ୨୦୧୮ରେ ହୋଇଥିଲା।
ପ୍ରୋଜେକ୍ଟ ଟାଇଗରର ୫୦ ବର୍ଷ ପୂର୍ତ୍ତି ଅବସରରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ରବିବାର ୨୦୨୨ର ଜନଗଣନା ଆଧାରରେ ବାଘଙ୍କ ସଂଖ୍ୟାର ନବିନତମ ସଂଖ୍ୟା ଜାରି କରିବେ। ଏହା ବ୍ୟତୀତ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଶନିବାର ବାନ୍ଦିପୁର ଟାଇଗର ରିଜର୍ଭରେ ସଂରକ୍ଷଣର ପ୍ରୟାସରେ ସାମିଲ ଫ୍ରଣ୍ଟ ଲାଇନ ଫିଲ୍ଡ ଷ୍ଟାଫ ଓ ସ୍ବୟଂ ସହାୟତା ଗ୍ରୁପ ସହ କଥା ହେବେ।
