ଜୟପୁର,୧ ।୧୦: ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଶୁକ୍ରବାର ରାଜସ୍ଥାନର ଆବୁ ରୋଡରେ ଆୟୋଜିତ କାର୍ଯ୍ୟକ୍ରମରେ ସାମାନ୍ୟ ବିଳମ୍ବରେ ପହଞ୍ଚିଥିଲେ । ଏହି ସମୟରେ ସେଠାରେ ମୋଦିଙ୍କୁ ଦେଖିବାକୁ ଓ ଶୁଣିବାକୁ ବହୁ ସଂଖ୍ୟାରେ ଜନତା ଉପସ୍ଥିତ ଥିଲେ । ସେଠାରେ ମୋଦି ଜନତାଙ୍କୁ ଅଭିବାଦନ ଜଣାଇବା ସହ ବିନା ଲାଉଡ ସ୍ପିକରରେ ବିଶାଳ ଜନସଭାକୁ ସମ୍ବୋଧିତ କରିଥିଲେ । ଏହାର କାରଣ ଦର୍ଶାଇ ମୋଦି କହିଥିଲେ, ରାତି ୧୦ଟା ପରେ ମୁଁ ଲାଉଡ ସ୍ପିକର ବ୍ୟବହାର କରି ନିୟମ ଭାଙ୍ଗିବାକୁ ଚାହୁଁନି ।
ମୋଦି କହିଥିଲେ ଏଠାରେ ପହଞ୍ଚିବାକୁ ମୋର ବିଳମ୍ବ ହୋଇଯାଇଛି । ତେଣୁ ମୋର ଆତ୍ମା କହୁଛି ମୁଁ ନିୟମ ଭାଙ୍ଗିବା ଅନୁଚିତ । ଅର୍ଥାତ୍ ରାତି ୧୦ଟା ପରେ ଲାଉଡ ସ୍ପିକର ବ୍ୟବହାର କରିବା ଅନୁଚିତ । ହେଲେ ଆପଣମାନଙ୍କ ଭଲ ପାଇବାକୁ ଦେଖି ମୁଁ କଥା ଦେଉଛି ପୁଣିଥରେ ଏଠାକୁ ଆସିବ ଓ ଆପଣଙ୍କ ଭଲପାଇବାର ଋଣ ସୁଧମୂଳ ସହ ସୁଝିବି ।
ସୂଚନାଯୋଗ୍ୟ, ୨ ବର୍ଷପରେ ରଜସ୍ଥାନ ଯାଇଥିବା ମୋଦିଙ୍କର ଆବୁ ରୋଡରେ ମାତ୍ର ୭ ମିନିଟ ବିଳମ୍ବ ହୋଇଥିଲା । ବିଳମ୍ବରେ ପହଞ୍ଚିବା କାରଣରୁ ବିନା ମାଇକରେ ଜନସଭାକୁ ସମ୍ବୋଧିତ କରିଥିଲେ । ଏହାସହ ମଞ୍ଚଉପରେ ଆଣ୍ଠୁମାଡି ୩ ଥର ପ୍ରଣାମ କରିଥିଲେ । ଏହାପରେ ମଞ୍ଚରୁ ଓହ୍ଲାଇ ଜନତାଙ୍କ ନିକଟକୁ ଆସିଥିଲେ ଓ ଅଭିବାଦନ ଜଣାଇଥିଲେ । ପ୍ରାୟ ୧୦ଟା ୨୫ରେ ସେ ସେଠାରୁ ବାହାରି ଯାଇଥିଲେ ।
