ଧାମନଗର, ୧୧।୭ (ଡି.ଏନ.ଏ.): ଭଦ୍ରକ ଜିଲା ଧାମନଗର ଅଞ୍ଚଳରେ ବେଆଇନ କବାଡ଼ିଆ ଦୋକାନ ବୃଦ୍ଧି ପାଉଛି। କବାଡ଼ିଆ ଦୋକାନ ବୃଦ୍ଧି ଯୋଗୁ ଚୋରି ମଧ୍ୟ ବଢ଼ିବାରେ ଲାଗିଛି। ବିଭିନ୍ନ ସମୟରେ ଚୋରମାନେ ବିଭିନ୍ନ ଛୋଟ ବଡ଼ ଦୋକାନ ଓ ଅଫିସରୁ ଚୋରି କରି ସାମଗ୍ରୀ କବାଡ଼ିଆ ଦୋକାନରେ କମ୍ ମୂଲ୍ୟରେ ବିକୁଛନ୍ତି। କବାଡ଼ିଆ ଦୋକାନୀ ଚୋରି ସାମଗ୍ରୀ କିଣି ମାଲେମାଲ ହେଉଛନ୍ତି। ଫଳରେ ଦିନକୁ ଦିନ ଏହି ଦୋକାନ ଛତୁ ଫୁଟିଲା ପରି ବିଭିନ୍ନ ସ୍ଥାନରେ ଖୋଲି ଚାଲିଛି। ଶନିବାର ରାତିରେ କବାଡ଼ିଆ ଦୋକାନରେ ଚୋରି ସାମଗ୍ରୀ ବିକ୍ରି ପାଇଁ ଯୋଜନା କରୁଥିବା ବେଳେ ଦୁଇ ଚୋରଙ୍କୁ ଧରି ଲୋକେ ପୋଲିସ ଜିମା ଦେଇଛନ୍ତି। ଧାମନଗର ଥାନା ପୋଲିସ ଦୁଇଜଣଙ୍କୁ ଗିରଫ କରି ସୋମବାର କୋର୍ଟ ଚାଲାଣ କରିଛି। ସେମାନେ ହେଲେ ଧାମନଗର ହବିବିନଗରର ସେକ୍ ଟିପୁ ଓ ମୁନସୀପାଟଣାର ସେକ୍ ସାହା ସାଜୁ। ଚୋରି ହୋଇଥିବା ୧୫ଟି ସିଲିଂ ଫ୍ୟାନ ସେମାନଙ୍କଠାରୁ ପୋଲିସ ଜବତ କରିଛି। ଏନେଇ ମାମଲା (ନଂ.୨୮୦/୨୨) ରୁଜୁ କରି ପୋଲିସ ତଦନ୍ତ ଜାରି ରଖିଛି।
ସୂଚନା ଅନୁଯାୟୀ, ମୁଲଣାସାହି ଛକ ନିକଟରେ ଏକ କବାଡ଼ିଆ ଦୋକାନରେ ଚୋରି ସାମଗ୍ରୀ ବିକ୍ରି ପାଇଁ ଦୁଇଜଣ କଥା ହେଉଥିବା ବେଳେ ସ୍ଥାନୀୟ ଲୋକେ ଖବର ପାଇ ସେମାନଙ୍କୁ ଧରିଥିଲେ। ଖବରପାଇ ପୋଲିସ ପହଞ୍ଚି ଦୁଇଜଣଙ୍କୁ ଗିରଫ କରିଥିଲା। ହବିବନଗରସ୍ଥିତ ସର୍ପରାଜ କାଦରି ତାଙ୍କ ଦୋକାନରେ ଫ୍ୟାନ୍ ମରାମତି କରି ରଖିଥିବା ବେଳେ ଗତ ୨ ତାରିଖରେ ଏହି ଚୋରମାନେ ଚୋରି କରିନେଇଥିଲେ। ଏନେଇ ସର୍ପରାଜ ଥାନାରେ ଅଭିଯୋଗ କରିଥିଲେ।
