ପିପିଲି, ୪।୪(ସ୍ବ.ପ୍ର.): ପିପିଲିରେ ଚାଲିଛି ଜୋରଦାର ପ୍ରଚାର। ବିଜେଡି ଗଡ଼କୁ ଦଖଲ କରିବା ପାଇଁ ଜୋର ଲଗାଇଛନ୍ତି ବିରୋଧୀ ଭାଜପା ଓ କଂଗ୍ରେସ। ଗାଁ ଗାଁ ବୁଲି ପ୍ରଚାର କରୁଛନ୍ତି। ପିପିଲିରେ ପରିବର୍ତ୍ତନ ପାଇଁ ଭାଜପା ଆହ୍ବାନ ଦେଇଥିବାବେଳେ ଗଡ଼ ଫେରି ପାଇବାକୁ ଏକାଠି ହୋଇଛନ୍ତି କଂଗ୍ରେସ ନେତା। ସେପଟେ ଗଡ଼ ବଜାୟ ରଖିବାକୁ ରଣନୀତି ପ୍ରସ୍ତୁତ କରି ବିଜେଡି ଦଳୀୟ ନେତାମାନେ ପ୍ରଚାରକୁ ସରଗରମ୍ କଲେଣି। ପିପିଲିରେ ପୁଣିଥରେ ଶଙ୍ଖନାଦ ବୋଲି ଦୃଢ଼ୋକ୍ତି ପ୍ରକାଶ କଲେଣି। ଶନିବାର ପିପିଲି ଏନ୍ଏସି ଅଞ୍ଚଳରେ ବିଜେଡି ପକ୍ଷରୁ ପ୍ରଚାର କରାଯାଇଥିଲା। ୱାର୍ଡକୁ ୱାର୍ଡ ବୁଲି ଲୋକଙ୍କ ସମର୍ଥନ ଲୋଡିଛନ୍ତି ପ୍ରାର୍ଥୀ ରୁଦ୍ର ପ୍ରତାପ। ତାଙ୍କ ସହ ୪ଜଣ ନେତା ତଥା ବିଧାୟକ ସୁଧୀର ସାମଲ, ପ୍ରଣବ କୁମାର ବଳବନ୍ତରାୟ, ସଞ୍ଜୀବ କୁମାର ମଲ୍ଲିକ, ରାଜେନ୍ଦ୍ର କୁମାର ସାହୁ ପ୍ରମୁଖ ସାମିଲ ହୋଇଥିଲେ।
ଭାଜପା ପକ୍ଷରୁ ମଧ୍ୟ ଜୋରଦାର ପ୍ରଚାର ଚାଲିଛି। ୨୩ନଂ ଜିଲାପରିଷଦ ଜୋନ ଅନ୍ତର୍ଗତ କୁଳଶିଖର ପାଟଣା, ଦାଣ୍ଡମକୁନ୍ଦପୁର, ହାଟସାହି ପଞ୍ଚାୟତରେ ଶତାଧିକ କର୍ମୀଙ୍କ ସହ ପ୍ରାର୍ଥୀ ଆଶ୍ରିତ ଗାଁ ଗାଁ ବୁଲି ଭୋଟ ଭିକ୍ଷା କରିଛନ୍ତି। ଭାଜପା ଆଦର୍ଶରେ ଅନୁପ୍ରାଣିତ ହୋଇ ପିପିଲି ନିର୍ବାଚନ ମଣ୍ଡଳୀର ବିକାଶ ନିମନ୍ତେ ଦୃଢ ସଂକଳ୍ପ ନେଇଛନ୍ତି। ଦୀର୍ଘ ୩୫ ବର୍ଷର ବଂଶବାଦ ଶାସନକୁ ସମାପ୍ତ କରି ପରିବର୍ତ୍ତନର ସ୍ବରରେ ଜନସାଧାରଣ ସାମିଲ ହୋଇ ଭାଜପାକୁ ବିଜୟୀ କରାଇବେ ବୋଲି ଆଶ୍ରିତ କହିଛନ୍ତି। ଅନ୍ୟପଟେ କଂଗ୍ରେସ ମଧ୍ୟ ଜୋର ପ୍ରଚାର ଚଳାଇଛି। କଂଗ୍ରେସ ପ୍ରାର୍ଥୀ ଅଜିତ୍ ମଙ୍ଗରାଜ ଡେଲାଙ୍ଗ ଅଞ୍ଚଳର ଚାଇଁପୁର, ଗଡ଼ମୋଟରି ସମେତ ବିଭିନ୍ନ ପଞ୍ଚାୟତ ଗାଁ ଗାଁ ବୁଲି ଭୋଟ ଭିକ୍ଷା କରିଛନ୍ତି। ପିପିଲି ନିର୍ବାଚନ ମଣ୍ଡଳୀ ପାଇଁ ଦଳକୁ ପୁନର୍ବାର ଆସନ ଜିତେଇବାର ଆଶା ରଖିଛନ୍ତି। ପ୍ରଚାର ବେଳେ ପିପିଲି-ଡେଲାଙ୍ଗର ଜନସାଧାରଣଙ୍କ ବିପୁଳ ଜନସମର୍ଥନ ମିଳୁଛି ବୋଲି ପ୍ରାର୍ଥୀ ଅଜିତ କହିଛନ୍ତି।
