ଭୁବନେଶ୍ୱର,୧୭।୨(ବ୍ୟୁରୋ): ରାଜଧାନୀ ରାସ୍ତାକଡ଼ରୁ ଉଠାଦୋକାନ ଉଚ୍ଛେଦକୁ ନେଇ ଗୁରୁବାର ଉଠାଦୋକାନୀ ଏବଂ ଏନ୍ଫୋର୍ସମେଣ୍ଟ ସ୍କ୍ବାଡ୍ (ଉଚ୍ଛେଦକାରୀଦଳ) ମଧ୍ୟରେ ହାତାହାତି ପରିସ୍ଥିତି ସୃଷ୍ଟି ହୋଇଛି। ପ୍ରଥମେ ବିରୋଧ ଓ ପରେ ପାଟିତୁଣ୍ଡ ଏବଂ ଶେଷରେ ହାତାହାତି ପର୍ଯ୍ୟନ୍ତ କଥା ଯାଇଥିଲା। ଉଠାଦୋକାନୀ ରମେଶ ନାୟକ ଏବଂ ତାଙ୍କ ପୁଅ ମନୋରଞ୍ଜନ ନାୟକ ଉଚ୍ଛେଦ କରିବାକୁ ଆସିଥିବା ସ୍କ୍ବାଡ୍ ଉପରକୁ ପ୍ରଥମେ ହାତ ଉଠାଇଥିଲେ। ପରେ ଏକ ବାଡ଼ିରେ ଏନ୍ଫୋର୍ସମେଣ୍ଟ ଆସିଷ୍ଟାଣ୍ଟ ହେମନ୍ତ ସାହୁଙ୍କୁ ବାଡ଼େଇଥିଲେ। ତାଙ୍କୁ ଅଟକାଇବାକୁ ଯାଇ ହେମନ୍ତ ମଧ୍ୟ ସମ୍ପୃକ୍ତ ଦୋକାନୀଙ୍କୁ ପିଟିଥିଲେ। ପରିସ୍ଥିତି ବିଗିଡ଼ିବାରୁ ଉଚ୍ଛେଦକାରୀ ଟିମ୍କୁ ଖାଲି ହାତରେ ଫେରିବାକୁ ପଡ଼ିଥିଲା। ପରେ ଏନେଇ ହେମନ୍ତ ଲିଙ୍ଗରାଜ ଥାନାରେ ଲିଖିତ ଅଭିଯୋଗ କରିଛନ୍ତି।
ଅଭିଯୋଗ ଅନୁଯାୟୀ, ପୂର୍ବାହ୍ନ ପ୍ରାୟ ୯ଟା ୩୦ରେ ମାଉସୀମା ଛକ ନିକଟରେ ଥିବା ଉଠାଦୋକାନ ହଟାଇବାକୁ ଟିମ୍ ସହିତ ହେମନ୍ତ ଯାଇଥିଲେ। ଉଚ୍ଛେଦକୁ ବିରୋଧ କରି ସମ୍ପୃକ୍ତ ବାପପୁଅ ଲୁହାରଡ୍ରେ ହେମନ୍ତଙ୍କୁ ବାଡେଇବା ସହିତ ତାଙ୍କ ଉପରକୁ ତତଲା ତେଲ ଫୋପାଡ଼ିିବାକୁ ଉଦ୍ୟମ କରିଥିଲେ। ଏନେଇ ହେମନ୍ତଙ୍କ ଏତଲା କ୍ରମେ ସମ୍ପୃକ୍ତ ବାପ ପୁଅଙ୍କ ବିରୋଧରେ ୮ଟି ଦଫାରେ ଏକ କେସ୍ ରୁଜୁ ହୋଇଛି। ପରେ ସନ୍ଧ୍ୟାରେ ରମେଶ ଓ ମନୋରଞ୍ଜନଙ୍କୁ ଥାନାକୁ ଡକାଯାଇଥିଲା। ପୁନର୍ବାର ଏପରି ନ କରିବା ସହିତ ତାଗିଦ୍ କରି ଛଡ଼ାଯାଇଥିବା ସୂଚନା ମିଳିଛି। ଅପରପକ୍ଷେ ଶୁକ୍ରବାର ଉଠାଦୋକାନୀ ମହାସଂଘ ପକ୍ଷରୁ ଥାନାରେ ଏତଲା ଦିଆଯିବ ବୋଲି ନିଖିଳ ଓଡ଼ିଶା ରାସ୍ତାପାର୍ଶ୍ୱ ଉଠାଦୋକାନୀ ମହାସଂଘ ସଭାପତି ପ୍ରତାପ ସାହୁ ସୂଚନା ଦେଇଛନ୍ତି।
ମାଉସୀ ମା’ ଛକ ଭଳି ଏକ ବ୍ୟସ୍ତବହୁଳ ସ୍ଥାନରେ ଏଭଳି ଗଣ୍ଡଗୋଳ ପରସ୍ଥିତି ଯୋଗୁ କିଛି ସମୟ ରାସ୍ତା ଜାମ୍ ହୋଇଯାଇଥିଲା। ଫଳରେ ଲୋକେ ଯିବା ଆସିବା କରିବାରେ ସମସ୍ୟା ଭୋଗିଥିଲେ। ଶେଷରେ ସ୍କ୍ବାଡ୍ ଫେରିଯିବା ପରେ ସ୍ଥିତି ସୁଧୁରିଥିଲା। ତେବେ ପୂର୍ବରୁ ମଧ୍ୟ ଉଚ୍ଛେଦକୁ ନେଇ ଏଭଳି ସ୍ଥିତି ସୃଷ୍ଟି ହୋଇଥିଲା। ଗତ ୧୩ ତାରିଖରେ ମଧ୍ୟ ସମାନ ଢଙ୍ଗରେ ଏଭଳି ବିରୋଧ କରାଯାଇଥିଲା। ରାଜମହଲରୁ କଳ୍ପନା ଛକ ପର୍ଯ୍ୟନ୍ତ ରାସ୍ତାର ତଳ ପାର୍ଶ୍ୱରେ ଥିବା ଫଳଦୋକାନୀ ଏବଂ ଅନ୍ୟ ଉଠାଦୋକାନୀଙ୍କୁ ଉଚ୍ଛେଦ କରିବାକୁ ଟିମ୍ ପହଞ୍ଚତ୍ଥିଲା। ସେଠାରେ ଦୋକାନ ଦେଇଥିବା ୬୦ରୁ ୭୦ ଦୋକାନୀ ଏହାକୁ ବିରୋଧ କରିବା ପରେ ଟିମ୍ ଖାଲି ହାତରେ ଫେରିଥିଲା। ଉଠାଦୋକାନୀମାନଙ୍କୁ ଭେଣ୍ଡିଂ ଜୋନ୍ ମାଧ୍ୟମରେ ଥଇଥାନ କରାଯିବା ପାଇଁ ବାରମ୍ବାର ଦାବି ହୋଇ ଆସୁଥିଲେ ମଧ୍ୟ ତାହା କାର୍ଯ୍ୟକାରୀ ହୋଇପାରୁନାହିଁ। ସହରରେ ହଜାର ହଜାର ଉଠାଦୋକାନୀ ଥିବାବେଳେ ମାତ୍ର ହାତଗଣତି ଭେଣ୍ଡିଂ ଜୋନ୍ କରିଦେଇ ବିଏମ୍ସି ବାହାବା ନେଉଥିବାବଳେ ଅନେକଙ୍କୁ ଉଚ୍ଛେଦ କରାଯାଉଛି। ଫଳରେ ବାରମ୍ବାର ଏହାକୁ ନେଇ ଉଠାଦୋକାନୀ ଏବଂ ସ୍କ୍ବାଡ୍ ମଧ୍ୟରେ ଗଣ୍ଡଗୋଳ ହେବା ସହ ଅପ୍ରୀତିକର ପରିସ୍ଥିତି ସୃଷ୍ଟି ହେଉଛି। ତେଣୁ ଏହାର ସ୍ଥାୟୀ ସମାଧାନ ସହିତ ଉଠାଦୋକାନୀମାନଙ୍କୁ ଥଇଥାନ କରିବା ପାଇଁ ସାଧାରଣରେ ଦାବି ହେଉଛି।
