ଭୁବନେଶ୍ୱର,୪।୧୧(ବ୍ୟୁରୋ): ଭୁବନେଶ୍ୱର କଳିଙ୍ଗ ଷ୍ଟାଡିୟମରେ ଚାଲିଛି ପ୍ରୋ-ହକି ଲିଗ୍ ଟୁର୍ନାମେଣ୍ଟ। ଖେଳାଳିମାନେ ବସ୍ ଯୋଗେ ଷ୍ଟାଡିୟମକୁ ଯିବାଆସିବା କରୁଛନ୍ତି। ଗୁରୁବାର ଅପରାହ୍ନରେ ଫାଟକ ନଂ.୮ ସମ୍ମୁଖରେ ନ୍ୟୁଜିଲ୍ୟାଣ୍ଡ୍ ଟିମ୍ ଖେଳାଳିଙ୍କ ଫଟୋ ଉତ୍ତୋଳନ କରୁଥିବାବେଳେ ରାସ୍ତା ଉପରେ ଫଟୋ ସାମ୍ବାଦିକ ରାକେଶ ରାଉଳଙ୍କୁ ଆକ୍ରମଣ ହୋଇଛି। ଜଣେ ସୁରକ୍ଷା କର୍ମୀ ବସରୁ ଓହ୍ଲାଇ ତାଙ୍କୁ ଧକ୍କାମାରି ତଳେ ପକାଇ ଦେବା ପରେ କ୍ୟାମେରା ଛଡ଼ାଇ ନେଇ ଭାଙ୍ଗି ଦେଇଛନ୍ତି। ଏଥିସହ ଅଶ୍ରାବ୍ୟ ଭାଷାରେ ଗାଳିଗୁଲଜ କରିଥିଲେ ମଧ୍ୟ ଘଟଣାସ୍ଥଳରେ ଥିବା ଅନ୍ୟ ପୋଲିସ ଅଧିକାରୀମାନେ ଦେଖଣାହାରି ସାଜିଥିଲେ। ସେମାନେ କର୍ତ୍ତବ୍ୟରତ ଫଟୋ ସାମ୍ବାଦିକଙ୍କୁ ସୁରକ୍ଷା ନ ଦେଇ ଆକ୍ରମଣକାରୀ ସୁରକ୍ଷା କର୍ମୀଙ୍କୁ ସହଯୋଗ କରିବା ଭଳି ଆଚରଣ ଦେଖାଇବା ଘଟଣାକୁ ନେଇ ତୀବ୍ର ପ୍ରତିକ୍ରିୟା ପ୍ରକାଶ ପାଇଛି। ଆକ୍ରମଣରେ ରାକେଶଙ୍କ ଆଙ୍ଗୁଠି, ଆଣ୍ଠୁ, ଅଣ୍ଟା ଓ ଶରୀରରେ ଆଘାତ ଲାଗିଛି। ଏପରିକି ପୂରା ଘଟଣାକୁ ଜଣେ ବ୍ୟକ୍ତି ତାଙ୍କ ମୋବାଇଲ୍ ଫୋନ୍ରେ ଶୁଟ୍ କରୁଥିବା ଦେଖି ସୁରକ୍ଷା କମର୍ର୍ୀ ଜଣକ ଉକ୍ତ ମୋବାଇଲ୍କୁ ମଧ୍ୟ ଛଡ଼ାଇ ନେଇଥିଲେ। ସୁରକ୍ଷା କର୍ମୀଙ୍କ ଏଭଳି ଦାଦାଗିରିକୁ ନିନ୍ଦା କରାଯାଇଥିବାବେଳେ ତାଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ବିଭିନ୍ନ ସାମ୍ବାଦିକ ସଂଘ ପକ୍ଷରୁ ଦାବି କରାଯାଇଛି। ଏନେଇ ସାମ୍ବାଦିକ ସଂଘର ପ୍ରତିନିଧିମାନେ ଗୁରୁବାର ରାତିରେ ଏସିପି ସଞ୍ଜୀବ ଶତପଥୀଙ୍କୁ ଭେଟି ଘଟଣା ସମ୍ପର୍କରେ ଜଣାଇଛନ୍ତି। ଏହାସହ ନୂଆ କ୍ୟାମେରା ଫେରାଇବା, ସମ୍ପୃକ୍ତ ସୁରକ୍ଷା କର୍ମୀଙ୍କୁ ସସ୍ପେଣ୍ଡ, ଉପସ୍ଥିତ ଥାଇ ସୁରକ୍ଷା ଦେଇ ନ ଥିବା ନୟାପଲ୍ଲୀ ଥାନା ଅଧିକାରୀ କ୍ଷମା ପ୍ରାର୍ଥନା ପାଇଁ ଦାବି କରାଯାଇଛି। ତଦନ୍ତ ପରେ କାର୍ଯ୍ୟାନୁଷ୍ଠାନ ନିଆଯିବ ବୋଲି ଏସିପି ଶତପଥୀ କହିଛନ୍ତି। ରାଜଧାନୀ ରାସ୍ତାରେ ଏହି ଘଟଣାକୁ ନେଇ ସାମ୍ବାଦିକଙ୍କ ସୁରକ୍ଷା ଉପରେ ପ୍ରଶ୍ନବାଚୀ ସୃଷ୍ଟି ହୋଇଛି। ସମ୍ପୃକ୍ତ ସୁରକ୍ଷା କର୍ମୀଙ୍କ ବିରୋଧରେ ୨୪ ଘଣ୍ଟା ଭିତରେ କାର୍ଯ୍ୟାନୁଷ୍ଠାନ ଗ୍ରହଣ କରା ନ ଗଲେ ପରିସ୍ଥିତିି ଭୟଙ୍କର ହେବ ବୋଲି ସାମ୍ବାଦିକ ପକ୍ଷରୁ ଚେତାବନୀ ଦିଆଯାଇଛି।
