ନୂଆଦିଲ୍ଲୀ,୮।୨: ଦେଶର ପ୍ରମୁଖ ବାଣିଜି୍ୟକ ପ୍ରତିଷ୍ଠାନ ତଥା ପତଞ୍ଜଳି ଗ୍ରୁପ୍ର ଖାଦ୍ୟ ପ୍ରକ୍ରିୟାକରଣ ୟୁନିଟ୍ ପତଞ୍ଜଳି ଫୁଡ୍ସ ଲିମିଟେଡ୍ (ପିଏଫ୍ଏଲ୍) ପକ୍ଷରୁ ଚଳିତ ଆର୍ଥିକ ବର୍ଷର ୩ୟ ତ୍ରୈମାସିକ ଫଳାଫଳ ସମ୍ପର୍କରେ ଘୋଷଣା କରାଯାଇଛି। ଏପରିକି ୨୦୨୨-୨୩ ଆର୍ଥିକ ବର୍ଷର ୩ୟ ତ୍ରୈମାସିକ (ଅକ୍ଟୋବରରୁ ଡିସେମ୍ବର) ଅବଧିର ଶେଷ ସୁଦ୍ଧା କମ୍ପାନୀର ବ୍ୟବସାୟିକ ଅଭିବୃଦ୍ଧି ୨୬.୩୮% ହୋଇଥିବା ପିଏଫ୍ଏଲ୍ ପକ୍ଷରୁ କୁହାଯାଇଛି। ବିଶେଷକରି କମ୍ପାନୀ ୩ୟ ତ୍ରୈମାସ ମଧ୍ୟରେ ମୋଟ ୭୯୬୩.୭୫ କୋଟି ଟଙ୍କା ଆୟ କରିଥିବା ବେଳେ ଗତ ଆର୍ଥିକ ବର୍ଷର ସମାନ ଅବଧିରେ କମ୍ପାନୀର ଆୟ ୬୩୦୧.୧୯ କୋଟି ରହିଥିଲା। ଫଳରେ କମ୍ପାନୀ ଗତ ଆର୍ଥିକ ବର୍ଷର ସମାନ ଅବଧିର ଆୟ ତୁଳନାରେ ଚଳିତ ଆର୍ଥିକ ବର୍ଷର ଆୟରେ ୨୬.୩୮% ବୃଦ୍ଧି ଘଟାଇଛି। ସେହିଭଳି କମ୍ପାନୀର ଟିକସ ପରବର୍ତ୍ତୀ ଲାଭ (ପିଏଟି) ମଧ୍ୟ ଏକ ଦୃଢ଼ ଅଭିବୃଦ୍ଧି ସହ ୧୩୯.୭୩% ବୃଦ୍ଧି ପାଇଛି। ଏପରିକି ବର୍ଷକୁ ବର୍ଷ ଭିତ୍ତିରେ ପରିମାଣ ପ୍ରାୟ ୧୫% (୧୪.୯୬%) ବୃଦ୍ଧି ସହ ପଞ୍ଜୀକରଣ କରି ପ୍ରାୟ ୨୬୯.୧୮% ଆୟ କରିଥିବା ପିଏଫ୍ଏଲ୍ ପକ୍ଷରୁ ବିସ୍ତୃତ ମତ ପ୍ରକାଶ କରାଯାଇଛି। ଅପରପକ୍ଷରେ କମ୍ପାନୀ ୨୦୨୨ ଡିସେମ୍ବର ଶେଷ ସୁଦ୍ଧା ମୋଟ ଭାବରେ ୨୩,୮୫୮.୫୦ କୋଟି ଟଙ୍କାର ଆୟ କରିଛି। ଏପରିକି ଗତ ବର୍ଷ କମ୍ପାନୀ ମୋଟ ୬୨୩ (୬୨୨.୭୩) କୋଟି ଟଙ୍କାର ଆୟ କରିଥିବା ବେଳେ ଯଥାକ୍ରମେ ୩୫.୫୦% ଏବଂ ୮.୮୯% ରହିଥିଲା।
ଏ ସମ୍ପର୍କରେ ପିଏଫ୍ଏଲ୍ର ବରିଷ୍ଠ ଅଧିକାରୀଙ୍କ ସୂଚନା ଅନୁଯାୟୀ ଭାରତରେ କମ୍ପାନୀ ଏକ ପ୍ରକାର ବୃହତ୍ ମାର୍କେଟ ଲିଡର ହେବା ସହ ସର୍ବାଧିକ ଉତ୍ପାଦ ଯୋଗାଣକାରୀ ଏବଂ ଉତ୍ପାଦନକାରୀ ଭାବେ ବେଶ୍ ପରିଚିତ। ନିକଟରେ କମ୍ପାନୀ ବିଭିନ୍ନ ରାଜ୍ୟର ସରକାରଙ୍କ ସହ ଏମ୍ଓୟୁ କରିଥିବା ବେଳେ ଆଗାମୀ ଦିନରେ ମଧ୍ୟ ଅନେକ ରାଜ୍ୟରେ କୃଷିର ବିକାଶ ଓ ଉତ୍ପାଦନ ବୃଦ୍ଧି ପାଇଁ ଆବଶ୍ୟକ ପଦକ୍ଷେପ ଗ୍ରହଣ କରାଯିବ। ସୂଚନାଯୋଗ୍ୟ, ପତଞ୍ଜଳି ଫୁଡ୍ ଲିମିଟେଡ୍ ପୂର୍ବରୁ ରୁଚି ସୋୟା ଇଣ୍ଡଷ୍ଟ୍ରିଜ୍ ଭାବେ ଜଣାଶୁଣା ଥିଲା।
