ଭୁବନେଶ୍ୱର,୧୨।୭(ବ୍ୟୁରୋ):କଳାହାଣ୍ଡି ଜିଲା କୋକସରା ବ୍ଲକ ସାହାଜଖୋଲ ଜଙ୍ଗଲର ଗୋତାମୁଣ୍ଡାଠାରେ ବସବାସ କରୁଥିବା ଆଦିବାସୀଙ୍କ ଉପରେ ଜୁନ୍ ୩୦ରେ ଆକ୍ରମଣ ହୋଇଥିଲା। ଦୀର୍ଘ ୨୦ବର୍ଷରୁ ଅଧିକ ଦିନ ଧରି ସେଠାରେ ରହିଆସୁଥିବା ଏହି ଆଦିବାସୀଙ୍କୁ କେତେଜଣ ଦୁର୍ବୃତ୍ତ ସଂଘବଦ୍ଧ ଆକ୍ରମଣ କରିବା ସହ ଟଙ୍କା, ଛେଳିମେଣ୍ଢା ନେଇଯାଇ ସେମାନଙ୍କ ଘର ଜାଳିଦେଇଥିଲେ। ନିରୀହ ଆଦିବାସୀଙ୍କ ଉପରେ ଅତ୍ୟାଚାର କରିଥିବା ଦୋଷୀଙ୍କ ଉପରେ ଦୃଢ କାର୍ଯ୍ୟାନୁଷ୍ଠାନ ନେବାକୁ ଲୋକଶକ୍ତି ଅଭିଯାନର ସଭାପତି ପ୍ରଫୁଲ୍ଲ ସାମନ୍ତରାୟ ରାଜ୍ୟ ମାନବାଧିକାର କମିଶନ (ଓଏଚ୍ଆର୍ସି)ଙ୍କ ନିକଟରେ ପିଟିଶନ କରିଛନ୍ତି।
ତାଙ୍କ ଅଭିଯୋଗ ଅନୁଯାୟୀ, ଘଟଣା ସମୟରେ ବନ ବିଭାଗର କେତେଜଣ କର୍ମଚାରୀ ଉପସ୍ଥିତ ଥିଲେ ମଧ୍ୟ ବିରୋଧ କରିବା ପରିବର୍ତ୍ତେ ଏହି ବର୍ବରତାକୁ ଉପଭୋଗ କରିଥିଲେ। ଏଥିରେ ଅନେକ ଆଦିବାସୀ ମହିଳା ଓ ପୁରୁଷ ଆହତ ହୋଇଥିଲେ। ଆକ୍ରମଣକାରୀଙ୍କ ହିଂସାରୁ ରକ୍ଷା ପାଇବା ପାଇଁ ଶେଷରେ ସେମାନେ ପଡୋଶୀ ଜିଲା ନବରଙ୍ଗପୁର ଚନ୍ଦାହାଣ୍ଡି ବ୍ଲକର ଏକ ସ୍ଥାନରେ ଆଶ୍ରୟ ନେଇଥିଲେ। ନିରୀହ ଆଦିବାସୀଙ୍କୁ ସେମାନଙ୍କ ଜାଗାରୁ ବିସ୍ଥାପିତ କରାଯିବାକୁ ଏଭଳି ଚକ୍ରାନ୍ତ କରାଯାଇଥିବା ନେଇ ପ୍ରଫୁଲ୍ଲ ତାଙ୍କ ପିଟିଶନରେ ଉଲ୍ଲେଖ କରିଛନ୍ତି। ତେଣୁ ଘଟଣାର ତଦନ୍ତ କରି ଆଦିବାସୀ ପରିବାରଗୁଡ଼ିକୁ ନ୍ୟାୟ ଦେବା ସହ ଦୋଷୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ନେବା ପଇଁ ସେ କମିଶନଙ୍କ ନିକଟରେ ପ୍ରାର୍ଥନା କରିଛନ୍ତି।
