ମାଲକାନଗିରି, ୧୮ା୪ (ଡି.ଏନ୍.ଏ.): କେନ୍ଦ୍ର ଏବଂ ରାଜ୍ୟ ସରକାରଙ୍କ ବିଭିନ୍ନ ଜନକଲ୍ୟାଣମୂଳକ ଯୋଜନା ମାଲକାନଗିରି ଜିଲାରେ କାର୍ଯ୍ୟକାରୀ ହେଉଛି। ହେଲେ କେତେ ଜଣ ଠିକାଦାର, ଯନ୍ତ୍ରୀ ଅଳ୍ପ ସମୟରେ କାର୍ଯ୍ୟ ଶେଷକରିବା ଲାଗି କମ୍ସଂଖ୍ୟକ ଶ୍ରମିକଙ୍କୁ ନେଇ ରାତିଦିନ ମେଶିନ ବ୍ୟବହାର କରୁଥିବା ଦେଖାଯାଉଛି। ଫଳରେ ଅଧିକାଂଶ ଶ୍ରମିକ ଏଠାରେ କାମ ନ ପାଇ ଜିଲାର ବିଭିନ୍ନ ସ୍ଥାନରୁ ଦାଦନ ଖଟିବାକୁ ଆନ୍ଧ୍ର ପ୍ରଦେଶ ଯାଉଛନ୍ତି। ମାତ୍ର ସେଠାରେ ଅଳ୍ପ କିଛି ଦିନ କାମ କରିବା ପରେ ନିର୍ଯାତନାର ଶିକାର ହେଉଛନ୍ତି। ଏପରିକି ସେମାନଙ୍କୁ ଆନ୍ଧ୍ରରୁ ମାଡ଼ ଖାଇ ଲୁଚି ନିଜ ଭିଟାମାଟିକୁ ଖାଲି ହାତରେ ଫେରିବାକୁ ପଡିଛି।
ଖବରରୁ ଜଣାପଡିଛି, ମାଲକାନଗିରି ପଡ଼ିଆ ବ୍ଳକ ନିଲିଗୁଡା ଗ୍ରାମର ଜଗା ପଡିଆମି, ଇର୍ମା ମାଡି, ଗଙ୍ଗା କରାମୀ, ଉଙ୍ଗା ମାଡି ଓ ଇର୍ମା ବାଞ୍ଜାମୀଙ୍କୁ ତେଲଙ୍ଗାନା ଭଦ୍ରାଚଳମର ରାବମା ଓ ବାବନା ନାମକ ଦୁଇଜଣ ଠିକାଦାର ଆନ୍ଧ୍ରର କାଡପା ଜିଲାର ଗାଦବାଲଠାରେ ଶ୍ରମିକ ଭାବେ କାମ କଲେ ମାସିକ ୧୨ ହଜାର ଟଙ୍କା ମିଳିବ ବୋଲି କହି ସେମାନଙ୍କୁ ନେଇଥିଲେ। ଗାଦବାଲର ଜଣେ ମାଛ ବ୍ୟବସାୟୀଙ୍କ ନିକଟରେ ସେମାନଙ୍କୁ ରାବମା ଓ ବାବନା ଛାଡିଥିଲେ। ମାଛ ବ୍ୟବସାୟୀ ଜଣକ ସେଠାକାର ଏକ ପୋଖରୀରୁ ମାଛ ଧରିବା ଓ ଅନ୍ୟାନ୍ୟ କାର୍ଯ୍ୟରେ ସେହି ଶ୍ରମିକଙ୍କୁ ନିୟୋଜିତ କରିଥିଲେ। ସେମାନଙ୍କୁ ମଜୁରି ନ ଦେଇ କେବଳ ଖାଇବାକୁ ଦେଇ ରଖିଥିଲେ। ଟଙ୍କା ମାଗିଲେ ଘରକୁ ଯିବାସମୟରେ ହିସାବ କରି ଦେବି ବୋଲି କହି ଏଡ଼ାଇ ଯାଉଥିଲେ। ବର୍ତ୍ତମାନ କେନ୍ଦୁପତ୍ର ଓ ମହୁଲ ଫୁଲ ସଂଗ୍ରହ କରିବାର ସମୟ ହୋଇଥିବାରୁ ସେମାନେ ଗାଁକୁ ଯିବାକୁ କହୁଥିଲେ ମଧ୍ୟ ମାଛ ବ୍ୟବସାୟୀ ସେମାନଙ୍କୁ ଛାଡୁ ନ ଥିଲେ। ଫଳରେ ୫ଜଣ ଶ୍ରମିକଙ୍କ ମଧ୍ୟରୁ ଉଙ୍ଗା ମାଡି ଓ ଇରମା ବାଞ୍ଜାମି ଗୁରୁବାର ରାତିରେ ଲୁଚି ଗାଦବାଲରୁ ବିଜୟଓ୍ବାଡା ପର୍ଯ୍ୟନ୍ତ ଚାଲିଚାଲି ଆସିଥିଲେ। ପରେ ସେଠାରୁ ଜଣଙ୍କ ସହାୟତାରେ ଉଭୟେ ବସ୍ ଯୋଗେ ଛତିଶଗଡ଼ର ସୁକ୍ମା ଜିଲାର ଦର୍ନାପାଲ ଆସି ସେଠାରୁ ନିଜ ଗ୍ରାମକୁ ଶନିବାର ଆସିଥିଲେ। ଘଟଣା ସମ୍ପର୍କରେ ସେମାନେ ଗ୍ରାମବାସୀଙ୍କୁ କହିବା ପରେ ଆନ୍ଧ୍ରରେ ରହିଯାଇଥିବା ୩ ଶ୍ରମିକଙ୍କୁ ଫେରାଇ ଆଣିବା ଏବଂ ସେମାନଙ୍କ ପ୍ରାପ୍ୟ ପ୍ରଦାନ ଦିଗରେ ପଦକ୍ଷେପ ନେବାକୁ ପରିବାର ଲୋକେ ଶ୍ରମ ଶ୍ରମ ବିଭାଗର ଦ୍ୱାରସ୍ଥ ହୋଇଛନ୍ତି।
