ଦିଗପହଣ୍ଡି,୫।୧୧(ଡି.ଏନ.ଏ.): ଦିଗପହଣ୍ଡି ବନ ବିଭାଗ ରେଞ୍ଜ କାର୍ଯ୍ୟାଳୟ ପରିସରରେ ଜଣେ ଅସ୍ଥାୟୀ ପାରା ବନ କର୍ମଚାରୀ କୃଷ୍ଣଚନ୍ଦ୍ର ଜେନାଙ୍କୁ ଜଣେ ଫରେଷ୍ଟ ଗାର୍ଡଙ୍କ ସ୍ବାମୀ ମୀନକେତନ ଶବର ଆକ୍ରମଣ କରିଥିବା ଅଭିଯୋଗ ହୋଇଛି। ଏହାର ପ୍ରତିବାଦରେ ଶୁକ୍ରବାର ସମସ୍ତ ପାରା ବନ କର୍ମଚାରୀ ରେଞ୍ଜ କାର୍ଯ୍ୟାଳୟ ସମ୍ମୁଖରେ ଧାରଣାରେ ବସିଥିଲେ। ଖବର ପାଇ ଗଞ୍ଜାମ ଜିଲା ବନ ବିଭାଗ ପାରା ସ୍କ୍ବାର୍ଡ ସଂଘର ସମସ୍ତ କାର୍ଯ୍ୟକର୍ତ୍ତା ପହଞ୍ଚି ଆନ୍ଦୋଳନକୁ ସମର୍ଥନ ଜଣାଇଥିଲେ। ଆକ୍ରମଣକାରୀଙ୍କୁ ତୁରନ୍ତ ଗିରଫ କରିବା ସହ ସମ୍ପୃକ୍ତ ଫରେଷ୍ଟ ଗାର୍ଡଙ୍କୁ ନିଲମ୍ବିତ କରିବା ପାଇଁ ରେଞ୍ଜର କାହ୍ନୁ ଚରଣ ପଟ୍ଟନାୟକଙ୍କୁ ସଂଘ ପକ୍ଷରୁ ଦାବିପତ୍ର ପ୍ରଦାନ କରାଯାଇଥିଲା। ବ୍ରହ୍ମପୁର ଜୋନାଲ ଅସ୍ଥାୟୀ ପାରା ବନ କର୍ମଚାରୀ ସ୍କୁଆର୍ଡ ସଂଘର କର୍ମକର୍ତ୍ତା କୃଷ୍ଣଚନ୍ଦ୍ର ପାତ୍ର, ଦେବାଷୀଶ ତ୍ରିପାଠୀ, ସନୋଜ କୁମାର ଶଙ୍ଖୁଆ ଓ ମୁରାରୀ ପ୍ରସାଦ ରଥ ପ୍ରମୁଖ ରେଞ୍ଜରଙ୍କ ସହ ସବିଶେଷ ଆଲୋଚନା କରିଥିଲେ। ରେଞ୍ଜର ଏନେଇ ଦିଗପହଣ୍ଡି ଥାନାରେ ମୀନକେତନଙ୍କ ନଁାରେ ଏତଲା ଦେବା ସହ ସମ୍ପୃକ୍ତ ଫରେଷ୍ଟ ଗାର୍ଡଙ୍କ ବିରୋଧରେ ବିଭାଗୀୟ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ପ୍ରତିଶ୍ରୁତି ଦେବା ପରେ ଧାରଣା ପ୍ରତ୍ୟାହୃତ ହୋଇଛି। ଗୁରୁବାର ସନ୍ଧ୍ୟାରେ ରେଞ୍ଜ କାର୍ଯ୍ୟାଳୟ ପରିସରରେ କିଛି ପାରା ବନ କର୍ମଚାରୀ ପରସ୍ପରଙ୍କ ମଧ୍ୟରେ କଥା ବାର୍ତ୍ତା ହେଉଥିବା ବେଳେ ନୂଆପଡ଼ା ବନବିଭାଗ ସେକ୍ସନ ବୋମକେଇ ବିଟର ଫରେଷ୍ଟ ଗାର୍ଡ ଯମୁନା ଜାନି ସେହି ରାସ୍ତାରେ ଘରକୁ ଫେରୁଥିଲେ। ପାରା ବନ କର୍ମଚାରୀମାନେ ତାଙ୍କୁ କେନ୍ଦ୍ରକରି କଥାବାର୍ତ୍ତା ହେଉଥିବା ସେ ସନ୍ଦେହ କରିଥିଲେ। ପରେ ସେ ଫୋନ କରି ତାଙ୍କ ସ୍ବାମୀ ମୀନକେତନଙ୍କୁ ସମସ୍ତ ଘଟଣା ଜଣାଇଥିଲେ। ମୀନକେତନ ବନ ବିଭାଗ ରେଞ୍ଜ କାର୍ଯ୍ୟାଳୟରେ ପହଞ୍ଚିବା ପୂର୍ବରୁ ସମସ୍ତ ପାରା ବନ କର୍ମଚରୀ ଚାଲିଯାଇଥିବା ବେଳେ କେବଳ ପାରା ବନ କର୍ମଚାରୀ କୃଷ୍ଣଚନ୍ଦ୍ର ରେଞ୍ଜରଙ୍କ ପ୍ରକୋଷ୍ଠରେ ରେଞ୍ଜରଙ୍କ ସହ କଥା ହେଉଥିଲେ। ଫରେଷ୍ଟ ଗାର୍ଡଙ୍କ ସାମୀ କିଛି ବୁଝି ନ ବିଚାରି ରେଞ୍ଜରଙ୍କ ପ୍ରକୋଷ୍ଠରେ ଧସେଇ ପଶିବା ସହ ରେଞ୍ଜରଙ୍କ ସମ୍ମୁଖରେ ପାରା ବନ କର୍ମଚାରୀ କୃଷ୍ଣଚନ୍ଦ୍ରଙ୍କୁ ଅତର୍କିତ ଆକ୍ରମଣ କରିଥିଲେ। ରେଞ୍ଜର ସମୁଦାୟ ଘଟଣା ବ୍ରହ୍ମପୁର ବନଖଣ୍ଡ ଅଧିକାରୀ ଅମ୍ଳାନ କୁମାର ନାୟକଙ୍କୁ ଅବଗତ କରିବା ପରେ ତାଙ୍କ ସୁପାରିଶ ଅନୁଯାୟୀ ଦିଗପହଣ୍ଡି ଥାନାରେ ରେଞ୍ଜର ଏତଲା ଦେଇଥିବା କହିଛନ୍ତି।
