ରୂପସା, ୨୨।୯(ଡି.ଏନ.ଏ.): ବାଲେଶ୍ୱର ଜିଲା ବସ୍ତା ବ୍ଲକ ଅଞ୍ଚଳରେ ଏକ ଦନ୍ତା ହାତୀ ୬ ମାସ ଧରି ଉତ୍ପାତ ଚଳାଇଛି। ବ୍ଲକ ଅଧୀନ ପଣିସାପଡ଼ା, ବଡ଼ଚରଣେଶ୍ୱରପୁର, ହଦମୌଦ, ଚାଷୀପଡ଼ା ଆଦି ଗ୍ରାମରେ ହାତୀ ପଶି ବ୍ୟାପକ ଭଙ୍ଗାରୁଜା କରୁଥିବା ନଜରକୁ ଆସିଛି। ଜୁନ୍ରେ ପଣିସାପଡ଼ା ଗ୍ରାମର ସାପ୍ତାହିକ ହାଟ, ଗତ ମାସ ବଡ଼ଚରଣେଶ୍ୱରପୁରର ସୀତାରାମ ଦଳେଇଙ୍କ ମାଟି ଘର କାନ୍ଥକୁ ଭାଙ୍ଗିଥିବା ବେଳେ ସୋମବାର ରାତିରେ ନଟାକଟା ପଞ୍ଚାୟତ ଅଧୀନ ଚାଷୀପଡ଼ା, ହଦମୌଦ, ନରଣପୁର ଆଦି ଗ୍ରାମକୁ ପଶିଥିଲା। ହାତୀକୁ ଘଉଡ଼ାଇବା ପାଇଁ ଗାଁ ଲୋକଙ୍କୁ ନାକେଦମ୍ ହେବାକୁ ପଡ଼ିଛି। ତେବେ ଉକ୍ତ ହାତୀ ପଡ଼ୋଶୀ ମୟୂରଭଞ୍ଜ ଜିଲାର ଜଙ୍ଗଲ ଦେଇ ପ୍ରଥମେ ଚାଷୀପଡ଼ା ବଜାର, ହଦମୌଦ ଗ୍ରାମରେ ପଶି ଗୌରହରି ପୁରୀଙ୍କ ଘର ଭାଙ୍ଗିବାକୁ ଉଦ୍ୟମ କରିଥିଲା। ଗ୍ରାମବାସୀ ନିଆଁ ଦେଖାଇ ହାତୀକୁ ଗ୍ରାମ ମଧ୍ୟରୁ ଘଉଡାଇବାକୁ ସକ୍ଷମ ହୋଇଥିଲେ। ଏହା ପରେ ସନ୍ଧ୍ୟାରେ ହାତୀ ଅମର୍ଦ୍ଦାରୋଡ଼ ବାରିପଦା ଦେଇ ଯାଇଥିବା ମୁଖ୍ୟ ରାସ୍ତା ଦେଇ ଗେଟ୍ ବଜାର ପର୍ଯ୍ୟନ୍ତ ପହଞ୍ଚତ୍ ରେଳଧାରଣା ଅତିକ୍ରମ କରିଥିଲା। ଗ୍ରାମବାସୀ କୌଶଳ କ୍ରମେ ହାତୀକୁ କାନପୁର ଜଙ୍ଗଲ ମୁହାଁ ଲେଉଟାଇବାକୁ ସକ୍ଷମ ହୋଇଥିଲେ। ବନ ବିଭାଗ କର୍ମଚାରୀ ବାଇକ ଯୋଗେ ଆସି ପଇଁତରା ମାରିଥିଲେ। ତେବେ ପରିସ୍ଥିତିକୁ ଲକ୍ଷ୍ୟ କରି ରାଜଘାଟ ବିଦ୍ୟୁତ ଗ୍ରୀଡ୍ରୁ ବିଦ୍ୟୁତ୍ ସରବରାହ ବିଚ୍ଛିନ୍ନ କରାଯାଇଥିଲା। ହାତୀ ଭୟ ସହ ବିଦ୍ୟୁତ କାଟ୍ ପାଇଁ ଗ୍ରାମବାସୀ ଅତିଷ୍ଠ ହୋଇପଡିଛନ୍ତି। ୬ ମାସ ଧରି ଉକ୍ତ ହାତୀ ଆଖପାଖ ଅଞ୍ଚଳରେ ଆତଙ୍କ ଖେଳାଇଥିବା ବେଳେ ବନବିଭାଗ ହାତୀ ଘଉଡ଼ାଇବାରେ ଫେଲ୍ ମାରିଥିବା ଅଭିଯୋଗ ହୋଇଛି।
