ପୁରୁଷୋତ୍ତମପୁର,୨୮।୧୦(ସୀମାଞ୍ଚଳ ମିଶ୍ର): ଗଞ୍ଜାମ ଜିଲା ପୁରୁଷୋତ୍ତମପୁର ଅଞ୍ଚଳରେ ଟ୍ରକ, ବସ୍ଗୁଡିକରୁ ଡିଜେଲ ଚୋରି କରୁଥିବା ୩ ଜଣିଆ ଚୋର ଗ୍ୟାଙ୍ଗକୁ ଧରି ଲୋକେ ପୋଲିସରେ ଜିମା ଦେଇଛନ୍ତି। ଏହାସହ ସେମାନେ ଆଣିଥିବା ଏକ ବ୍ୟାରେଲ, ପଲସର ବାଇକ୍(ନଂ.ଓଡି୦୭ଏଜେ-୭୦୨୯)କୁ ଲୋକେ ଜବତ କରି ପୋଲିସକୁ ହସ୍ତାନ୍ତର କରିଛନ୍ତି।
ଧରାପଡ଼ିଥିବା ଚୋରମାନେ ପୁରୁଷୋତ୍ତମପୁର ଥାନା ଅନ୍ତର୍ଗତ ରାଜପୁର ଗ୍ରାମର ପର୍ଶୁ ନାୟକ, ଉତ୍ତମ ନାହାକ ଏବଂ ଶୁଶାନ୍ତ ନାହାକା ବୋଲି ଜଣାପଡିଛି। ଏ ନେଇ ଟ୍ରକ ମାଲିକ ଶୁସାନ୍ତ କୁମାର ଦଳେଇ ଥାନାରେ ଏକ ଲିଖିତ ଅଭିଯୋଗ କରିଛନ୍ତି। ତାଙ୍କ ଗାଡ଼ିରୁ ଏକ ମାସ ହେଲା ଡିଜେଲ ଚୋରି ହେଉଥିଲା। ଏହାକୁ ନେଇ ସେ ଚୋରଙ୍କୁ ଧିରିବା ଲାଗି ଉଦ୍ୟମ ଆରମ୍ଭ କରିଥିଲେ। ହେଲେ ଶୁକ୍ରବାର ରାତିରେ ଚୋର ଦଳ ଭୂତସରସିଙ୍ଗିଠାରେ ତାଙ୍କର ଟ୍ରକ(ନଂ.ଓଡି୦୭ଏଏ-୩୨୭୭)ରୁ ଡିଜେଲ ଚୋରି ଲାଗି ଉଦ୍ୟମ କରିଥିଲେ। ଏପରିକି ଗତ ୨୪ ତାରିଖରେ ମଧ୍ୟ ତାଙ୍କ ଗାଡି ପୁରୁଷୋତ୍ତମପୁରଠାରେ ଥିବାବେଳେ ଡିଜେଲ ଚୋରି ହୋଇଥିଲା। ଏହି ଘଟଣା ଏନ୍ଏସି ପକ୍ଷରୁ ଲଗାଯାଇଥିବା ସିସିଟିଭି କ୍ୟାମେରାରେ କଏଦ ହୋଇଛି। ଏନେଇ ପୋଲିସ ଏକ ମାମଲା ରୁଜୁ କରି ଘଟଣାର ତଦନ୍ତ ଚଳାଇଛି।
