ପଦ୍ମପୁର,୧୩।୬ (ଡି.ଏନ୍.ଏ.): ଦୁର୍ଘଟଣା କିମ୍ବା କୌଣସି ରୋଗରେ ଗୁରୁତର ଥିବା ବ୍ୟକ୍ତିଙ୍କୁ ଠିକ୍ ସମୟରେ ଡାକ୍ତରଖାନାରେ ପହଞ୍ଚାଇ ଜୀବନ ରକ୍ଷା କରିବା ଉଦ୍ଦେଶ୍ୟରେ ସରକାର ୧୦୮ ଆମ୍ବୁଲାନ୍ସ ସେବା ଯୋଗାଇଛନ୍ତି। ତେବେ ଅନେକ ଲୋକ ଏହାର ଅପବ୍ୟବହାର କରୁଥିବା ଖବର ବାରମ୍ବାର ସାମ୍ନାକୁ ଆସୁଛି। ଶନିବାର ରାୟଗଡ଼ା ଜିଲା ପଦ୍ମପୁର ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଏଭଳି ଏକ ଘଟଣା ଦେଖିବାକୁ ମିଳିଛି।
ସୂଚନାଯୋଗ୍ୟ, ବାଇକ୍ରୁ ପଡ଼ି ସାମାନ୍ୟ ଆହତ ହୋଇଥିବା ଜଣେ ବ୍ୟକ୍ତି ଶନିବାର ପଦ୍ମପୁର ସ୍ବାସ୍ଥ୍ୟକେନ୍ଦ୍ରକୁ ଚିକିତ୍ସା ପାଇଁ ଆସିଥିଲେ। ସାମାନ୍ୟ ଆହତ ହୋଇଥିବାରୁ ଦାୟିତ୍ୱରେ ଥିବା ସର୍ଜରୀ ବିଭାଗ ପ୍ରଫେସର୍ ରାମକୃଷ୍ଣ ଧଳ ତାଙ୍କର ଚିକିତ୍ସା କରିବା ସହ ଔଷଧ ଲେଖିଦେଇ ଘରକୁ ଯିବାକୁ ପରାମର୍ଶ ଦେଇଥିଲେ। ହେଲେ ବ୍ୟକ୍ତି ଜଣଙ୍କ ନିଜ ଘର ଗୁଣପୁରକୁ ଯିବା ପାଇଁ ମିଛ କଥା କହି ଆମ୍ବୁଲାନ୍ସକୁ ଡାକିଥିଲେ। ପଦ୍ମପୁର ଅଞ୍ଚଳରେ ସେତେବେଳେ ଆମ୍ବୁଲାନ୍ସ ଉପଲବ୍ଧ ନ ଥିଲା। ଡାକ୍ତର ଗୁଣପୁରକୁ ରେଫର କରିଥିବା କହି ଡାକିବାରୁ ୨୦ କି.ମି. ଦୂର ରାମନାଗୁଡ଼ା ବ୍ଲକରୁ ଆମ୍ବୁଲାନ୍ସ ଆସି ପଦ୍ମପୁର ସ୍ବାସ୍ଥ୍ୟକେନ୍ଦ୍ରରେ ପହଞ୍ଚିଥିଲା। ଏହା ଜାଣିବା ପରେ ସ୍ବାସ୍ଥ୍ୟକେନ୍ଦ୍ରର ଡାକ୍ତର ଧଳ ଆହତ ବ୍ୟକ୍ତିଙ୍କୁ ତାଗିଦ କରିବା ସହ ଆମ୍ବୁଲାନ୍ସକୁ ପଠାଇ ଦେଇଥିଲେ। କିଛି ସମୟ ପରେ ଆହତ ବ୍ୟକ୍ତି ପରିବାର ଲୋକଙ୍କୁ ଡାକି ବାଇକ୍ରେ ଗୁଣପୁର ଯାଇଥିଲେ।
କିଛି ଲୋକଙ୍କ ଆମ୍ବୁଲାନ୍ସର ଅପବ୍ୟବହାର ଯୋଗୁ ଅନେକ ସମୟରେ ଜରୁରୀସେବା ଉଦ୍ଦେଶ୍ୟରେ ଥିବା ୧୦୮ ଆମ୍ବୁଲାନ୍ସ ଗୁରୁତରଙ୍କ ନିକଟରେ ପହଞ୍ଚି ପାରୁନାହିଁ। ଏଭଳି ଅଯଥାରେ ଆମ୍ବୁଲାନ୍ସର ଅପବ୍ୟବହାର ନ କରିବାକୁ ବୁଦ୍ଧିଜୀବୀଙ୍କ ମଧ୍ୟରେ ମତପ୍ରକାଶ ପାଇଛି।
