କାଠମାଣ୍ଡୁ,୨୬।୨(ପି.ଟି.): ନେପାଳୀ କଂଗ୍ରେସର ବରିଷ୍ଠ ନେତା ରାମଚନ୍ଦ୍ର ପୌଡେଲ୍ ନେପାଳର ପରବର୍ତ୍ତୀ ରାଷ୍ଟ୍ରପତି ହେବାକୁ ଯାଉଛନ୍ତି। ପ୍ରଧାନମନ୍ତ୍ରୀ ପୁଷ୍ପ କମଲ ଦହଲ ‘ପ୍ରଚଣ୍ଡ’ଙ୍କ ସିପିଏନ୍-ମାଓଇଷ୍ଟ ସେଣ୍ଟର ସମେତ ୮ଟି ଦଳ ତାଙ୍କ ପ୍ରାର୍ଥତ୍ତ୍ୱକୁ ସମର୍ଥନ କରିଛନ୍ତି। ମାର୍ଚ୍ଚ ୯ରେ ହେବାକୁ ଥିବା ରାଷ୍ଟ୍ରପତି ନିର୍ବାଚନରେ ତାଙ୍କ ସହ ସିପିଏନ୍-ୟୁଏମ୍ଏଲ୍ ପ୍ରାର୍ଥୀ ସୁବାସ ନେମବାଙ୍ଗ୍ଙ୍କର ପ୍ରତିଦ୍ୱନ୍ଦ୍ୱିତା ହେବ। ଶନିବାର ଉଭୟ ନାମାଙ୍କନପତ୍ର ଦାଖଲ କରିଛନ୍ତି। ପୌଡେଲଙ୍କ ନାମାଙ୍କନପତ୍ରରେ ୮ଟି ଦଳର ସମର୍ଥନ ରହିଥିବାବେଳେ କଂଗ୍ରେସ ଅଧ୍ୟକ୍ଷ ଶେର ବାହାଦୁର ଦେଉବା, ସିପିଏନ୍ (ୟୁନିଫାଏଡ୍ ସୋସିଆଲିଷ୍ଟ) ଅଧ୍ୟକ୍ଷ ମାଧବ କୁମାର ନେପାଳ, ମାଓବାଦୀ ସେଣ୍ଟର ବରିଷ୍ଠ ଉପାଧ୍ୟକ୍ଷ ନାରାୟଣ କାଜି ଶ୍ରେଷ୍ଠ, ଜନତା ସମାଜବାଦୀ ପାର୍ଟି ଫେଡେରାଲ କାଉନସିଲ୍ ଅଧ୍ୟକ୍ଷ ଅଶୋକ ରାୟ ଏବଂ ଜନମତ ପାର୍ଟି ନେତା ଅବଦୁଲ ଖାନ୍ ପ୍ରସ୍ତାବକ ରହିଥିଲେ। ପୌଡେଲ ନିର୍ବାଚିତ ହେବା ଏକପ୍ରକାର ନିଶ୍ଚିତ ବୋଲି କୁହାଯାଉଛି। ବର୍ତ୍ତମାନର ରାଷ୍ଟ୍ରପତି ବିଦ୍ୟାଦେବୀ ଭଣ୍ଡାରୀଙ୍କ କାର୍ଯ୍ୟକାଳ ମାର୍ଚ୍ଚ ୧୨ରେ ଶେଷ ହେବ।
