ପାଟଣା,୨୯।୭ (ବୀର କିଶୋର ଦାଶ): କେନ୍ଦୁଝର ଜିଲା ପାଟଣା ଥାନା ଅନ୍ତର୍ଗତ କପୁଣ୍ଡି ଗ୍ରାମର ରୁଗୁଡ଼ିଭାଡ଼ି ସାହି ନିକଟ ଦେଇ ପ୍ରବାହିତ ବୈତରଣୀ ନଦୀରେ ଏକ ବଡ଼ଧରଣର ମାଛ ଧରାପଡ଼ିଛି। ଗ୍ରାମର ତପନ କୁମାର ମହାନ୍ତ ନଦୀରେ ଟେକା ଜାଲ ପକାଇ ମାଛ ଧରୁଥିବା ସମୟରେ ଜାଲରେ ଦୁଇଟି ବଡ଼ ମାଛ ପଡ଼ିଥିଲେ। ସେଥିରୁ ଗୋଟିଏ ମାଛ ଜାଲରୁ ଡେଇଁ ପୁଣି ନଦୀ ପାଣିକୁ ଚାଲିଯାଇଥିବା ବେଳେ, ଅନ୍ୟ ଏକ ବିଶାଳକାୟ ମାଛକୁ ସେ ଏବଂ ତାଙ୍କ ସାଙ୍ଗ ମିଶି ଅକ୍ଳାନ୍ତ ପରିଶ୍ରମ କରି କାବୁ କରିବାରେ ସଫଳ ହୋଇଥିଲେ।
ଧରାପଡ଼ିଥିବା ମାଛଟି ଏକ ଭାକୁଡ଼ ମାଛ ଥିଲା, ଯାହାର ଓଜନ ପ୍ରାୟ ୨୫ କିଲୋଗ୍ରାମ ହେବ। ଏତେ ବଡ଼ ମାଛ ଧରାପଡ଼ିବା ପରେ ସ୍ଥାନୀୟ ଅଞ୍ଚଳରେ ଚର୍ଚ୍ଚାର ବିଷୟ ପାଲଟିଥିଲା। ପରେ କିଛି ଯୁବକ ମାଛଟିକୁ ପାଟଣା ବଜାର ସ୍ଥିତ ବିଶ୍ୱକର୍ମା ଫିଲିଂ ଷ୍ଟେଶନ ନିକଟ ଏକ ଦୋକାନକୁ ଆଣି କାଟିଥିଲେ ଏବଂ କିଲୋ ପ୍ରତି ୨୨୦ ଟଙ୍କା ହିସାବରେ ବିକ୍ରି କରିଥିଲେ। ତେବେ ଲଗାଣ ବର୍ଷା ଯୋଗୁ କାନପୁର ଡ୍ୟାମରୁ ବଢ଼ି ପାଣି ଆସିବା କାରଣରୁ ଏହି ବଡ଼ ମାଛଟି ନଦୀର ଉପରମୁଣ୍ଡରୁ ଭାସି ଆସିଥିବା ବୋଲି ସ୍ଥାନୀୟ ଲୋକେ ଅନୁମାନ କରୁଛନ୍ତି।
