ମୁମ୍ବାଇ, ୧୨।୨ : ଏଣିକି ମୁମ୍ବାଇର ଲୋକାଲ ଟ୍ରେନରେ ଯାତ୍ରା କରିବା ସମୟରେ ଯାତ୍ରୀ ଫିଲ୍ମ ଏବଂ ଟିଭି ଶୋ ଦେଖିପାରିବେ। ଭାରତୀୟ ରେଳ ଅଧିକାରୀ କହିଛନ୍ତି ଯେ କେନ୍ଦ୍ରୀୟ ରେଳବାଇ ଏବଂ ସୁଗାରବକ୍ସ ନେଟୱାର୍କ ସ୍ଥାନୀୟ ଟ୍ରେନରେ ‘କଣ୍ଟେଣ୍ଟ ଅନ ଡିମାଣ୍ଡ’ ସେବା ଆରମ୍ଭ କରିଛି। ଏହା ଯାତ୍ରୀମାନଙ୍କୁ ଫିଲ୍ମ, ଟିଭି ଶୋ ଏବଂ ନ୍ୟୁଜ୍ ସେବା ମାଗଣାରେ ଯୋଗାଇ ଦେବ। ମୁମ୍ବାଇର ଲୋକାଲ୍ ଟ୍ରେନରେ ପ୍ରତିଦିନ ଲକ୍ଷ ଲକ୍ଷ ଲୋକ ଯାତ୍ରା କରନ୍ତି।
କେନ୍ଦ୍ରୀୟ ରେଳବାଇର ଜେନେରାଲ ମ୍ୟାନେଜର ଅନୀଲ କୁମାର ଲାହୋଟି କହିଛନ୍ତି ଯେ କେନ୍ଦ୍ରୀୟ ରେଳବାଇ ହେଉଛି ମୁମ୍ବାଇର ଜନସାଧାରଣଙ୍କର ପରିବହନର ମେରୁଦଣ୍ଡ। ସେ କହିଛନ୍ତି, କରୋନା ପୂର୍ବରୁ ଉପନଗର ନେଟୱାର୍କରେ ପ୍ରତିଦିନ ୪୫ ଲକ୍ଷ ଯାତ୍ରୀ ଯିବା ଆସିବା କରୁଥିବାର ରେକର୍ଡ ରହିଛି।
ସୁଗାରବକ୍ସ ନେଟୱାର୍କର ସହ-ପ୍ରତିଷ୍ଠାତା ତଥା ସିଇଓ ରୋହିତ ପରଞ୍ଜପେ କହିଛନ୍ତି ଯେ ଏନେଇ ଯାତ୍ରୀମାନଙ୍କୁ ‘ସୁଗାରବକ୍ସ ଆପ’ ଡାଉନଲୋଡ କରିବାକୁ ପଡିବ। ଏହି ସେବା ସମ୍ପୂର୍ଣ୍ଣ ମାଗଣା, ଯାତ୍ରୀମାନଙ୍କୁ ଏଥିପାଇଁ କୌଣସି ଅତିରିକ୍ତ ଦେୟ ଦେବାକୁ ପଡିବ ନାହିଁ।
ଅଧିକାରୀମାନେ କହିଛନ୍ତି ଯେ କେନ୍ଦ୍ରୀୟ ରେଳବାଇ ଏବଂ ସୁଗାରବକ୍ସ ନେଟୱାର୍କର ସହାୟତାରେ କେନ୍ଦ୍ରୀୟ ରେଳବାଇର କେବଳ ୧୦ଟି ଲୋକାଲ ଟ୍ରେନରେ ଏହି ସେବା ଆରମ୍ଭ ହୋଇଛି। ଏହି ସେବା ଆସନ୍ତା କିଛି ମାସ ମଧ୍ୟରେ ସମସ୍ତ ଟ୍ରେନରେ ଆରମ୍ଭ ହେବ।
