ଇସଲାମା,୫।୨ : ସେ ୧୯୯୯ ମସିହାରେ ନୱାଜ ସରିଫଙ୍କ ଗଣତାନ୍ତ୍ରିକ ସରକାରଙ୍କ ପତନ ଘଟାଇ ପରଭେଜ ମୁଶାରଫ କ୍ଷମତା ଦଖଲ କରି ପାକିସ୍ତାନର ଶାସନ ଗ୍ରହଣ କରିଥିଲେ ଏବଂ ୨୦ ଜୁନ ୨୦୦୧ ରୁ ୧୮ ଅଗଷ୍ଟ ୨୦୦୮ ପର୍ଯ୍ୟନ୍ତ ପାକିସ୍ତାନର ରାଷ୍ଟ୍ରପତି ଥିଲେ।
ପୁରୁଣା ଦିଲ୍ଲୀର ଯେଉଁ ଘରେ ମୁଶରଫ ଜନ୍ମ ହୋଇଥିଲେ, ତାହା ବର୍ତ୍ତମାନ ବହୁତ ପୁରୁଣା ଏବଂ ପରିତ୍ୟକ୍ତ ହୋଇଯାଇଛି। ତେବେ ସେହି ବିଳାସପୂର୍ଣ୍ଣ ଘରକୁ ଦେଖିଲେ ମଧ୍ୟ ଅନୁମାନ କରାଯାଇପାରେ ଯେ ମୁଶରଫଙ୍କ ପରିବାର ସେତେବେଳେ ପୁରୁଣା ଦିଲ୍ଲୀର ଦରିଆଗଞ୍ଜ ଅଞ୍ଚଳରେ ଏକ ଜଣାଶୁଣା ପରିବାରର ଥିଲେ। ବର୍ତ୍ତମାନ ସେହି ମହଲରେ ଆଠଟି ପରିବାର ବାସ କରୁଛନ୍ତି। ୨୦୦୧ରେ ଭାରତ ଗସ୍ତର ପ୍ରଥମ ଦିନରେ ମୁଶରଫ ପୁରୁଣା ଦିଲ୍ଲୀର ନିଜ ପୈତୃକ ଘର ପରିଦର୍ଶନ କରିଥିଲେ। ଯେଉଁଠାରେ ସେ ତାଙ୍କ ପିଲାଦିନ ବିତି ଥିଲା। ବିଭାଜନ ପରେ ମୁଶରଫଙ୍କ ପରିବାର ପାକିସ୍ତାନ ଯିବାକୁ ସ୍ଥିର କଲେ ଏବଂ ସମସ୍ତେ ପୁରୁଣା ଦିଲ୍ଲୀର ସେହି ଘର ଛାଡି ପାକିସ୍ତାନ ପଳାଇଗଲେ। ସେତେବେଳେ ମୁଶରଫଙ୍କୁ ମାତ୍ର ଚାରି ବର୍ଷ ବୟସ ହୋଇଥିଲା।
୨୦୦୧ ମସିହାରେ, ସେହି ଘରେ ରହୁଥିବା ଅଧିକାଂଶ ଲୋକ ଜାଣି ନ ଥିଲେ ଯେ ଏହାର ପ୍ରକୃତ ମାଲିକ କିଏ? ସମସ୍ତ ତଥ୍ୟ ଉର୍ଦ୍ଦୁରେ ଘରର ମୂଳ କାଗଜପତ୍ରରେ ଲେଖାଯାଇଛି, ଯାହା ମୁଶରଫଙ୍କ ପିତାଙ୍କ ନାମରେ ଇଂରାଜୀରେ ସ୍ବାକ୍ଷରିତ ହୋଇଛି। ଆଶ୍ଚର୍ଯ୍ୟର କଥା, ଆଲିଗଡ ମୁସଲିମ ବିଶ୍ୱବିଦ୍ୟାଳୟର ପ୍ରତିଷ୍ଠାତା ତଥା ସଂଖ୍ୟାଲଘୁ ସମ୍ପ୍ରଦାୟର ନେତା ସାର୍ ସୟଦ ଅହମ୍ମଦ ମୁଶରଫଙ୍କ ପାଖରେ ଥିବା ଘରେ ରହୁଥିଲେ। ମୁଶରଫଙ୍କ ପୁରୁଣା ଘର ଚାରିପାଖ, ପୋଖରୀ, ସଂକୀର୍ଣ୍ଣ ଏବଂ ମଇଳାରେ ଭରପୁର ରହିଛି।
ଏପ୍ରିଲରୁ ଜୁନ ୧୯୯୯ ମଧ୍ୟରେ ଭାରତ ଏବଂ ପାକିସ୍ତାନ ମଧ୍ୟରେ କାର୍ଗିଲ ଯୁଦ୍ଧ ସମୟରେ ପରଭେଜ ମୁଶରଫ ଚର୍ଚ୍ଚାର କେନ୍ଦ୍ର ହୋଇଥିଲେ। କାରଣ ସେହି ସମୟରେ ମୁଶରଫ ପାକିସ୍ତାନର ସେନା ମୁଖ୍ୟ ଥିଲେ। ସେନା ମୁଖ୍ୟ ଥିବାବେଳେ ସେ ଜନ୍ମଭୂମି ଭାରତକୁ ଏପରି ଅନେକ କ୍ଷତ ଦେଇଥିଲେ, ଯାହାକୁ କେବେ ବି ଭାରତ ଭୁଲିପାରିବ ନାହିଁ। ପୂର୍ବତନ ପ୍ରଧାନମନ୍ତ୍ରୀ ଅଟଳ ବିହାରୀ ବାଜପେୟୀ ପାକିସ୍ତାନ ସହ ସମ୍ପର୍କକୁ ସୁଦୃଢ଼ ଼ କରି ସମ୍ପର୍କକୁ ଏକ ନୂତନ ଦିଗକୁ ନେଇଥିଲେ, କିନ୍ତୁ ତାଙ୍କର ଏହି ପଦକ୍ଷେପ ଦୀର୍ଘ ଦିନ ଧରି ରହିପାରି ନ ଥିଲା। ବିଶ୍ୱାସ କରାଯାଏ ଯେ ପରଭେଜ ମୁଶରଫ ଅଟଳ ବିହାରୀଙ୍କୁ ସମର୍ଥନ କରିବାରେ ପଛଘୁଞ୍ଚା ଦେଇଥିଲେ।
ଜେନେରାଲ ପରଭେଜ ମୁଶରଫ ୧୯୬୧ ମସିହାରେ ପାକିସ୍ତାନ ସେନାରେ ଯୋଗ ଦେଇଥିଲେ। ସେ ଜଣେ ଭଲ ଖେଳାଳି ମଧ୍ୟ ଥିଲେ। ୧୯୬୫ ମସିହାରେ ସେ ଭାରତ ବିରୁଦ୍ଧରେ ତାଙ୍କ ଜୀବନର ପ୍ରଥମ ଯୁଦ୍ଧ କରିଥିଲେ ଏବଂ ଏଥିପାଇଁ ତାଙ୍କୁ ପାକିସ୍ତାନ ସରକାର ମଧ୍ୟ ସାହସିକତାର ପୁରସ୍କାର ପ୍ରଦାନ କରିଥିଲେ। ତାଙ୍କ ନେତୃତ୍ୱରେ ୧୯୭୧ ମସିହାରେ ଦ୍ୱିତୀୟ ଭାରତ-ପାକିସ୍ତାନ ଯୁଦ୍ଧରେ ପାକିସ୍ତାନକୁ ପରାଜୟର ସାମ୍ନା କରିବାକୁ ପଡିଥିଲା। ୧୯୯୯ ରେ କାର୍ଗିଲ ଯୁଦ୍ଧ ସମୟରେ ମଧ୍ୟ ପାକିସ୍ତାନକୁ ବିଶ୍ୱ ସାମ୍ନାରେ ଲଜ୍ଜିତ ହେବାକୁ ପଡିଥିଲା।
