ନୂଆଦିଲ୍ଲୀ,୧୫।୧୨: ପାର୍ଲାମେଣ୍ଟ ସୁରକ୍ଷାରେ ତ୍ରୁଟି ମାମଲାର ମାଷ୍ଟରମାଇଣ୍ଡ ହେଉଛନ୍ତି ଲଳିତ ଝା। ଶୁକ୍ରବାର ଆତ୍ମସମର୍ପଣ କରିବା ପରେ ପୋଲିସ ତାଙ୍କୁ ଗିରଫ କରିଛି। ତେବେ ଲଳିତଙ୍କ ବାପା ଜଣେ ସାଧାରଣ କୃଷକ ବୋଲି ଜଣାପଡ଼ିଛି। ଏବେ ସେ ୭ ଦିନ ଲାଗି ପୋଲିସ ରିମାଣ୍ଡରେ ଥିବା ବେଳେ କେଉଁ କାରଣରୁ ଏଭଳି ଷଡ଼ଯନ୍ତ୍ର କଲେ ପଚରାଉଚରା କରାଯାଉଛି।
ଲଳିତଙ୍କ ପୈତୃକ ଗାଁ ଦରଭଙ୍ଗା ଜିଲାର ବହେଡ଼ା ଥାନାର ରାମପୁର ଉଦୟ। ତାଙ୍କ ବାପା ଜଣେ କୃଷକ। ଲଳିତ ନିଜେ କୋଲକାତାରେ ମା’ବାପାଙ୍କ ରହୁଥିଲେ। ପାର୍ଲାମେଣ୍ଟ ଘଟଣା ପରେ ସେମାନେ ତାଙ୍କ ଗାଁକୁ ଚାଲିଯାଇଛନ୍ତି। ଏପରିକି ପୁରା ପରିବାର କିଛି ବି ବିଶ୍ୱାସ କରିପାରୁନାହାନ୍ତି।
ଲଳିତଙ୍କ ଭାଇ ମୋହନ ଝା କହିଛନ୍ତି ଯେ, ସେ ଏସବୁରେ କିଭଳି ଫସିଲେ କେହି ବି ଜାଣିନାହୁଁ। କାରଣ ସେ ସବୁବେଳେ ଝଗଡ଼ାଠାରୁ ଦୂରରେ ରହୁଥିଲେ। ପିଲାଦିନରୁ ହିଁ ସେ ଶାନ୍ତ ରହୁଥିଲେ। କାହାସାଙ୍ଗରେ ବେଶି ମିଶୁ ନ ଥିଲେ। ଶିକ୍ଷକତା କରିବା ସହ ସେ ଏନ୍ଜିଓ ସହ ଜଡ଼ିତ ଥିଲେ। ଏବେ ତାଙ୍କୁ ଟିଭି ଚ୍ୟାନେଲରେ ଦେଖି ସ୍ତବ୍ଧ ହୋଇଛୁ ବୋଲି ସେ କହିଛନ୍ତି।
ତେବେ ଦିଲ୍ଲୀ ପୋଲିସ ପ୍ରାଥମିକ ତଦନ୍ତରୁ ଜାଣିବାକୁ ପାଇଛି ଯେ ଭିଜିଟର୍ସ ପାସ୍ ଜରିଆରେ ପାର୍ଲାମେଣ୍ଟରେ ପ୍ରବେଶ କରିବାକୁ ସେମାନେ ଯୋଜନା କରିଥିଲେ। ଏପରିକି ସାଙ୍ଗରେ ସ୍ମୋକ୍ କ୍ୟାନ୍ ନେବା ଲାଗି ସ୍ବତନ୍ତ୍ର ଜୋତା ପିନ୍ଧିଥିଲେ।
