ଭଞ୍ଜନଗର,୨୯।୯(ଡି.ଏନ୍.ଏ): ଭଞ୍ଜନଗର ବ୍ଲକ ଭାଲିଆଖାଇ ଉଚ୍ଚ ପ୍ରାଥମିକ ବିଦ୍ୟାଳୟରେ ଅବ୍ୟବସ୍ଥା ଲାଗି ରହିଛି। ମଧ୍ୟାହ୍ନ ଭୋଜନ ଓ ଅନ୍ୟାନ୍ୟ ସୁବିଧା ଠିକ୍ ଭାବେ ମିଳିପାରୁ ନାହିଁ। ଏହାକୁ ନେଇ ଅଭିଭାବକମାନେ ଅସନ୍ତୋଷ ପ୍ରକାଶ କରି ବିଭାଗୀୟ ଉଚ୍ଚ କର୍ତ୍ତୃପକ୍ଷଙ୍କୁ ପୂର୍ବରୁ ଏକାଧିକ ଥର ଜଣାଇଛନ୍ତି। ତଥାପି ସମସ୍ୟା ନ ସୁଧୁରିବାରୁ ଛାତ୍ରୀଛାତ୍ରଙ୍କ ସହ ଅଭିଭାବକମାନେ ଗୁରୁବାର ବିଦ୍ୟାଳୟ ମୁଖ୍ୟ ଫାଟକରେ ତାଲା ପକାଇ ଆନ୍ଦୋଳନ କରିଥିଲେ। ଏବିଇଓ ସୂର୍ଯ୍ୟ ନାୟକ ଏହା ଜାଣିବା ପରେ ଘଟଣାସ୍ଥଳରେ ପହଞ୍ଚି ଆନ୍ଦୋଳନକାରୀଙ୍କୁ ବୁଝାଶୁଝା କରିବା ପରେ ମୁଖ୍ୟ ଫାଟକ ଖୋଲିଥିଲା । ତେବେ ବିଦ୍ୟାଳୟ ଭିତରେ ଅଭିଭାବକମାନେ ପୁଣି ହୋହାଲ୍ଲା କରିଥିବା ଦେଖାଯାଇଥିଲା।
ଅଭିଭାବକ ତଥା ଗ୍ରାମବାସୀଙ୍କ ଅଭିଯୋଗ ଯେ, ବିଦ୍ୟାଳୟରେ ପିଲାଙ୍କୁ ଠିକ୍ ଭାବେ ମଧ୍ୟାହ୍ନ ଭୋଜନ ମିଳୁନାହିଁ । ପରୀକ୍ଷା ହେଲେ କାଗଜ କିଣି ଆଣିବା ପାଇଁ କୁହାଯାଉଛି। ଗୋଟିଏ ଶ୍ରେଣୀକୁ ଗୋଟିଏ ପ୍ରଶ୍ନପତ୍ର ଦିଆଯାଉଛି । ଏହାଦ୍ୱାରା ସମୟ ଅପଚୟ ସହ ଛାତ୍ରୀଛାତ୍ରଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଉଛି । ତେଣୁ ଏଠାରେ ଦାୟିତ୍ୱରେ ଥିବା ପ୍ରଧାନ ଶିକ୍ଷୟିତ୍ରୀଙ୍କୁ ତୁରନ୍ତ ବଦଳି କରିବାକୁ ଅଭିଭାବକମାନେ ଦାବି କରିଥିଲେ। ନଚେତ ଆଗାମୀ ଦିନରେ ପୁଣି ଆନ୍ଦୋଳନ କରାଯିବ ବୋଲି ବିଦ୍ୟାଳୟ ପରିଚାଳନା କମିଟି ସଭ୍ୟ ଗୌରାଙ୍ଗ ଚରଣ ବେହେରା କହିଛନ୍ତି। ଏବିଇଓ ଶୁକ୍ରବାର ପୁଣି ଆସି ସମସ୍ୟାର ସମାଧାନ କରିବେ ବୋଲି ଗ୍ରାମବାସୀଙ୍କୁ ପ୍ରତିଶ୍ରୁତି ଦେଇ ଅପରାହ୍ନରେ ଫେରିଛନ୍ତି। ଏନେଇ ଏବିଇଓଙ୍କ ମତାମତ ନେବାକୁ ଚେଷ୍ଟା କରାଯାଇଥିଲେ ମଧ୍ୟ ସେ ଫୋନ ନ ଉଠାଇବାରୁ ସମ୍ଭବ ହୋଇପାରିନାହିଁ ।
