ମସ୍କୋ/କିଭ୍,୨୯।୯: ରୁଷିଆ ଏବଂ ୟୁକ୍ରେନ ମଧ୍ୟରେ ଗତ ୭ ମାସ ଧରି ଯୁଦ୍ଧ ଜାରି ରହିଛି। ଯୁଦ୍ଧ ସମୟରେ ରୁଷିଆ ୟୁକ୍ରେନର ଅନେକ ଅଞ୍ଚଳକୁ ଜବରଦଖଲ କରିଥିବା ଦାବି କରିଥିଲା। ଏହି ଅଧିକୃତ ଅଞ୍ଚଳଗୁଡ଼ିକୁ ରୁଷିଆ ସହିତ ମିଶାଇବା ପାଇଁ ରାଷ୍ଟ୍ରପତି ଭ୍ଲାଡିମିର ପୁଟିନ ଏକ ଜନମତ ସଂଗ୍ରହ କରିଥିଲେ। ସେପ୍ଟେମ୍ବର ୩୦ ତଥା ଶୁକ୍ରବାର ପୁଟିନ ଏହି ଜନମତର ଫଳାଫଳ ଘୋଷଣା କରିବେ। ଏଥିସହ ଅଧିକୃତ ଅଞ୍ଚଳଗୁଡିକୁ ନିଜ ଦେଶ ସହ ବିଲୟ କରିବା ପାଇଁ ଚୁକ୍ତିନାମା ସ୍ବାକ୍ଷର କରିବେ। ରୁଷିଆ ରାଷ୍ଟ୍ରପତି କାର୍ଯ୍ୟାଳୟ କ୍ରେମଲିନ୍ ପକ୍ଷରୁ ଗୁରୁବାର ଏନେଇ ସୂଚନା ଦିଆଯାଇଛି। ଏଥିସହ ସ୍ଥାନୀୟ ସମୟ ୩ଟାରେ କ୍ରେମଲିନ୍ର ସେଣ୍ଟ ଜର୍ଜ ହଲ୍ରେ ରୁଷିଆ ଫେଡେରେଶନରେ ଅଞ୍ଚଳଗୁଡ଼ିକୁ ବିଲୟ କରିବା ଚୁକ୍ତିନାମା ସ୍ବାକ୍ଷରିତ ହେବ ବୋଲି କ୍ରେମଲିନ୍ର ମୁଖପାତ୍ର ଦିମିତ୍ରୀ ପେସ୍କୋଭ ଗଣମାଧ୍ୟମକୁ ସୂଚନା ଦେଇଛନ୍ତି। ସୂଚନାଯୋଗ୍ୟ, ରୁଷିଆ ଯୁଦ୍ଧ ସମୟରେ ୟୁକ୍ରେନର ୪ଟି ପ୍ରମୁଖ ଅଞ୍ଚଳରେ ନିଜର ନିୟନ୍ତ୍ରଣ ସ୍ଥାପନ କରିଥିଲା। ପରେ ଏହି ଅଞ୍ଚଳରେ ଜନମତ ସଂଗ୍ରହ ହୋଇଥିଲା। ତେବେ ଜବରଦଖଲ ହୋଇଥିବା ଅଞ୍ଚଳ ଗୁଡ଼ିକ ହେଲା ଲୁହାନସ୍କ, ଜେପୋରିଝିଆ, ଖେରସନ୍, ଡୋନେଟସ୍କ।
