ଭୁବନେଶ୍ୱର,୨୯ା୭(ବ୍ୟୁରୋ): ମାଟ୍ରିକ୍ ପରୀକ୍ଷା ପାଇଁ ଫର୍ମ ପୂରଣ ନ ହୋଇପାରିବାରୁ ମଙ୍ଗଳବାର କ୍ୟାପିଟାଲ ହାଇସ୍କୁଲ୍ ଗେଟ୍ ସାମ୍ନାରେ ଜଣେ ମା’ ଓ ତାଙ୍କ ପୁଅ ଆତ୍ମହତ୍ୟା ଉଦ୍ୟମ କରିଥିଲେ। ବୁଧବାର ପୁଣି ସେମାନେ ବିଦ୍ୟାଳୟ ଓ ଗଣଶିକ୍ଷା ମନ୍ତ୍ରୀ ସମୀର ରଞ୍ଜନ ଦାଶଙ୍କ ବାସଭବନ ଆଗରେ ଆତ୍ମହତ୍ୟା ଉଦ୍ୟମ କରିବାକୁ ଯାଇଥିବାବେଳେ କ୍ୟାପିଟାଲ ଥାନା ପୋଲିସ କାବୁ କରିଛି। ସ୍କୁଲ୍ କର୍ତ୍ତୃପକ୍ଷ ତାଙ୍କ କଥା ଶୁଣୁ ନ ଥିବାରୁ ଗଣଶିକ୍ଷାମନ୍ତ୍ରୀଙ୍କ ଦୃଷ୍ଟି ଆକର୍ଷଣ ପାଇଁ ଆସିଥିବା ସେମାନେ କହିଛନ୍ତି। ତେବେ ପରେ ପୋଲିସ ସେମାନଙ୍କୁ ବୁଝାଶୁଝା କରି ଘରେ ଛାଡିଥିବା ଜଣାପଡିଛି।
ଖାରବେଳ ନଗର ଥାନା ଭଗବତୀ ବସ୍ତିରେ ରହୁଥିବା ମା’ ଜସ୍ମିନଙ୍କ ଅଭିଯୋଗ ଅନୁଯାୟୀ, ତାଙ୍କ ପୁଅ ୟୁନିଟ୍-୩ କ୍ୟାପିଟାଲ ହାଇସ୍କୁଲରୁ ଚଳିତବର୍ଷ ମାଟ୍ରିକରେ ୨୭୨ ନମ୍ବର ରଖିଛନ୍ତି। ବିନା ପରୀକ୍ଷାରେ ପ୍ରକାଶ ପାଇଥିବା ଏହି ମାଟ୍ରିକ ଫଳକୁ ନେଇ ସେ ଅସନ୍ତୁଷ୍ଟ ଥିଲେ। ତେଣୁ ସେ ଫର୍ମ ପୂରଣ କରି ପୁନର୍ବାର ପରୀକ୍ଷା ଦେବାକୁ ଚାହିଁଥିଲେ। ମାତ୍ର ସ୍କୁଲ କର୍ତ୍ତୃପକ୍ଷ ତାଙ୍କ ପାଇଁ ଫର୍ମ ପୂରଣ କରିଦେବେ ବୋଲି କହିଥିଲେ। ଜୁଲାଇ ୧୦ରେ ଅବଧି ସରିଥିବାବେଳେ ପରୀକ୍ଷା ପାଇଁ ସେମାନେ ଆଡମିଟ୍ କାର୍ଡ ନେବାକୁ ସ୍କୁଲକୁ୍ ଆସିଥିଲେ। ତେବେ ତାଙ୍କର ଫର୍ମ ପୂରଣ ହୋଇ ନ ଥିବା ଜାଣିବା ପରେ ମଙ୍ଗଳବାର ସେ ତାଙ୍କ ପୁଅଙ୍କ ସହ ଆସି ସ୍କୁଲ ସାମ୍ନାରେ ବିଷ ପିଇ ଆତ୍ମହତ୍ୟା ଉଦ୍ୟମ କରିଥିଲେ। ଅନ୍ୟପକ୍ଷରେ, କ୍ୟାପିଟାଲ ହାଇସ୍କୁଲ ପ୍ରଧାନ ଶିକ୍ଷକ ଅମର କୁମାର ବେହେରା ତାଙ୍କ ଅଭିଯୋଗକୁ ଖଣ୍ଡନ କରି କହିଛନ୍ତି, ଛାତ୍ରଙ୍କ ଅଭିଭାବକ ଦୁଇଥର ଆସି ଯୋଗାଯୋଗ କରିଥିଲେ। କିନ୍ତୁ ଫର୍ମ ପୂରଣ ଶେଷଦିନ ପର୍ଯ୍ୟନ୍ତ କେହି ଆସି ନ ଥିଲେ। ଏବେ ଆଉ ଫର୍ମ ପୂରଣ ସମ୍ଭବ ନୁହେଁ। ତେବେ ଏଥିରେ ଆମ ପକ୍ଷରୁ କୌଣସି ଭୁଲ ନାହିଁ ବୋଲି ବେହେରା କହିଛନ୍ତି।
