ଭୁବନେଶ୍ୱର,୧୧ା୧(ବ୍ୟୁରୋ):ତ୍ରିସ୍ତରୀୟ ପଞ୍ଚାୟତ ନିର୍ବାଚନ ପାଇଁ ପ୍ରସ୍ତୁତି ଚୂଡ଼ାନ୍ତ ପର୍ଯ୍ୟାୟରେ ପହଞ୍ଚତ୍ଛି। ରାଜ୍ୟ ନିର୍ବାଚନ କମିଶନର (ଏସ୍ଇସି) ଭୋଟଗ୍ରହଣ ତାରିଖ ଘୋଷଣା ପୂର୍ବରୁ ଶନିବାର ରାଜ୍ୟ ସରକାରଙ୍କ ସହ ଆଲୋଚନା କରିଥିବା ବେଳେ ସୋମବାର ବିଭିନ୍ନ ରାଜନୈତିକ ଦଳର ମତାମତ ଲୋଡ଼ିଛନ୍ତି। କେବଳ ତାରିଖ ଘୋଷଣାକୁ ଅପେକ୍ଷା କରାଯାଇଛି। ଗୋଟିଏ ପଟେ ନିର୍ବାଚନ କମିଶନ ଏବଂ ରାଜ୍ୟ ସରକାର ନିର୍ବାଚନ ମୁଡ୍ରେ ଥିବା ବେଳେ ବିରୋଧୀ ଦଳ ଅମଙ୍ଗ ହେଉଛନ୍ତି। ରାଜ୍ୟରେ କୋଭିଡ୍ ସଂକ୍ରମଣ ଉପରମୁହଁା ହୋଇଥିବାରୁ ନିର୍ବାଚନକୁ କିଛିମାସ ପାଇଁ ସ୍ଥଗିତ କରିବାକୁ ବିରୋଧୀ ଭାଜପା, କଂଗ୍ରେସ ସମେତ ଅନ୍ୟାନ୍ୟ ରାଜନୈତିକ ଦଳ ଏକ ସ୍ବରରେ ଦାବି କରିଛନ୍ତି।
ରାଜ୍ୟ ନିର୍ବାଚନ କମିଶନର ଆଦିତ୍ୟ ପ୍ରସାଦ ପାଢ଼ୀଙ୍କ ଅଧ୍ୟକ୍ଷତାରେ ସୋମବାର ଅନୁଷ୍ଠିତ ସର୍ବଦଳୀୟ ବୈଠକରେ ରାଜ୍ୟର ସମସ୍ତ ରାଜନୈତିକ ଦଳର ପ୍ରତିନିଧି ଯୋଗଦେଇ ବର୍ତ୍ତମାନ ବର୍ଦ୍ଧିତ କରୋନା ସଂକ୍ରମଣ ପରିସ୍ଥିତିରେ ନିର୍ବାଚନ ନ କରିବାକୁ ପ୍ରସ୍ତାବ ଦେଇଛନ୍ତି। ଅତି କମ୍ରେ ଏହାକୁ ଆସନ୍ତା ୩ ମାସ ଯାଏ ଘୁଞ୍ଚାଯାଉ।
ପଛୁଆ ବର୍ଗଙ୍କ ଲାଗି ଆସନ ସଂରକ୍ଷଣ ମାମଲା ନ ତୁଟିବା ଯାଏ ନିର୍ବାଚନ ସ୍ଥଗିତ ରହୁ ବୋଲି ଦାବି କରିଛନ୍ତି। ଏଥିସହିତ ଭୋଟର ତାଲିକାରେ ଥିବା ତ୍ରୁଟିକୁ ସଂଶୋଧନ କରିବା, ଭୋଟଗ୍ରହଣ କେନ୍ଦ୍ରରେ ସିସିଟିଭି ଲଗାଇବା ସହ ଦୀର୍ଘଦିନ ଧରି ଗୋଟିଏ ଜାଗାରେ ରହିଥିବା ଅଧିକାରୀମାନଙ୍କୁ ବଦଳି କରିବାକୁ ଦାବି କରିଛନ୍ତି। ଅନ୍ୟପକ୍ଷରେ ବିଜେଡି କିନ୍ତୁ ନିର୍ବାଚନ ଘୁଞ୍ଚାଇବା ସପକ୍ଷରେ ନାହିଁ। ମାର୍ଚ୍ଚ ସୁଦ୍ଧା ପଞ୍ଚାୟତ ପ୍ରତିନିଧିମାନଙ୍କ କାର୍ଯ୍ୟକାଳ ଶେଷ ହେଉଥିବାରୁ ଏହା ପୂର୍ବରୁ ନିର୍ବାଚନ ଶେଷ ହେବା ଆବଶ୍ୟକ ବୋଲି ପ୍ରସ୍ତାବ ଦେଇଛି। କୋଭିଡ୍ ନିୟମ ଆଧାରରେ ମତଦାନ ବ୍ୟବସ୍ଥା କରି ନିର୍ବାଚନକୁ ନିର୍ଦ୍ଧାରିତ ସମୟରେ ଶେଷ କରିବାକୁ କମିଶନଙ୍କ ନିକଟରେ ଦାବି ଜଣାଇଛି। ବୈଠକ ଶେଷରେ ଗଣମାଧ୍ୟମକୁ ସୂଚନା ଦେଇ ରାଜ୍ୟ ନିର୍ବାଚନ କମିଶନର କହିଛନ୍ତି, କୋଭିଡ୍ ସ୍ଥିତିରେ ପଞ୍ଚାୟତ ନିର୍ବାଚନ କରାଯିବ କି ନାହିଁ ସେ ନେଇ ସବୁ ଦଳ ସେମାନଙ୍କ ମତାମତ ଦେଇଛନ୍ତି। ନିର୍ବାଚନ ନେଇ ଭାରତର ନିର୍ବାଚନ କମିଶନ (ସିଇସି) ଗାଇଡ୍ଲାଇନ କରିଛନ୍ତି। ସେହି ଆଧାରରେ ଆମେ ଗାଇଡ୍ଲାଇନ କରୁଛୁ। ଖୁବ୍ଶୀଘ୍ର ଏହା ଜାରି କରିବୁ। କୋଭିଡ୍ ନିୟମ ଆଧାରରେ ଅବାଧ ଓ ନିରପେକ୍ଷ ନିର୍ବାଚନ କରାଯିବ ବୋଲି ସେ କହିଛନ୍ତି।
ବିରୋଧୀ ଦଳ ମୁଖ୍ୟ ସଚେତକ ମୋହନ ଚରଣ ମାଝି କହିଛନ୍ତି, ବୈଠକରେ ଓବିସି ସଂରକ୍ଷଣ ସମେତ ୯ଟି ପ୍ରସ୍ତାବ ଦିଆଯାଇଛି। ରାଜ୍ୟରେ କୋଭିଡ୍ ସଂକ୍ରମଣ ବଢ଼ିବା ନେଇ ସ୍ବାସ୍ଥ୍ୟ ବିଶେଷଜ୍ଞ ମତ ଦେଉଥିବାରୁ ଆସନ୍ତା ୩ ମାସ ଯାଏ ନିର୍ବାଚନକୁ ସ୍ଥଗିତ ରଖିବାକୁ ଦାବି କରାଯାଇଛି। କଂଗ୍ରେସର ବରିଷ୍ଠ ନେତା ଗଣେଶ୍ୱର ବେହେରା କହିଛନ୍ତି, ଆଦିବାସୀ ଏବଂ ପଛୁଆ ବର୍ଗଙ୍କ ଲାଗି ଆବଶ୍ୟକ ସଂରକ୍ଷଣ ବ୍ୟବସ୍ଥା ହୋଇ ନ ଥିବାରୁ ରାଜ୍ୟର ବିଭିନ୍ନ ଜିଲାରେ ବିରୋଧ ହେଉଛି। ସେମାନଙ୍କୁ ନ୍ୟାୟ ନ ଦେଇ ନିର୍ବାଚନ କରିବା ଉଚିତ ନୁହେଁ। କୋଭିଡ୍ ସଂକ୍ରମଣ ବଢୁଥିବାରୁ ଆଉ ୩ ମାସ ନିର୍ବାଚନ ଘୁଞ୍ଚାଇ ଦେବାକୁ କଂଗ୍ରେସ ଦାବି କରିଛି। ହେଲେ ଏହାକୁ କମିଶନର ଶୁଣୁ ନାହାନ୍ତି ବୋଲି ସେ କହିଛନ୍ତି। ବିଜେଡି ବରିଷ୍ଠ ନେତା ଅମର ପଟ୍ଟନାୟକ କହିଛନ୍ତି, ଲୋକମାନଙ୍କୁ ସେମାନଙ୍କ ସାମ୍ବିଧାନିକ ଅଧିକାରରୁ ବଞ୍ଚିତ କରିବା ଉଚିତ ନୁହେଁ। କୋଭିଡ୍ ନିୟମ ଅନୁସାରେ ନିର୍ବାଚନ କରିବାକୁ କମିଶନଙ୍କ ନିକଟରେ ପ୍ରସ୍ତାବ ଦିଆଯାଇଛି।
ବୈଠକରେ କଂଗ୍ରେସରୁ ଗଣେଶ୍ୱର ବେହେରା ଓ ଶିବାନନ୍ଦ ରାୟ ଯୋଗ ଦେଇଥିବା ବେଳେ ଭାଜପାରୁ ମୋହନ ଚରଣ ମାଝି, ବିଜେଡିରୁ ଅମର ପଟ୍ଟନାୟକ, ସିପିଆଇରୁ ରମେଶ ଚନ୍ଦ୍ର ପାଢ଼ୀ, ସିପିଆଇଏମ୍ରୁ ଦୁଷ୍ମନ୍ତ କୁମାର ପାଢ଼ୀ, ସମତା କ୍ରାନ୍ତି ଦଳରୁ ପ୍ରଭାସ ସାମନ୍ତରାୟ, ଝାଡ଼ଖଣ୍ଡ ମୁକ୍ତିମୋର୍ଚ୍ଚାରୁ ରାମଚନ୍ଦ୍ର ହଁାସଦା, ଏନ୍ବିଏନ୍ଏସ୍ପିରୁ ଜଳଧର ନାୟକ, କଳିଙ୍ଗ ସେନାରୁ ହେମନ୍ତ ରଥ, ଆମ୍ ଆଦ୍ମୀ ପାର୍ଟିରୁ ସୌମ୍ୟରଞ୍ଜନ ସ୍ବାଇଁଙ୍କ ସମେତ ଅନ୍ୟାନ୍ୟ ଦଳର ପ୍ରତିନିଧିମାନେ ଯୋଗ ଦେଇଥିଲେ।
