ମୁମ୍ବାଇ, ୨୪।୯ : ପୁଣେର କଲେକ୍ଟର ଭବନରେ ପାକିସ୍ତାନ ଜିନ୍ଦାବାଦ ସ୍ଲୋଗାନକୁ ନେଇ ମହାରାଷ୍ଟ୍ରର ରାଜନୀତିରେ ଆରୋପ ପ୍ରତ୍ୟାରୋପ ତୀବ୍ର ହେବାରେ ଲାଗିଛି। ଭାଜପା ନେତାଙ୍କ ପରେ ଏବେ ମୁଖ୍ୟମନ୍ତ୍ରୀ ଏକନାଥ ଶିନ୍ଦେ ମଧ୍ୟ ଏ ସମ୍ପର୍କରେ କଠୋର ଆଭିମୁଖ୍ୟ ଗ୍ରହଣ କରିଛନ୍ତି। ଏଭଳି ଲୋକଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଶିନ୍ଦେ ଖୋଲାଖୋଲି ଭାବେ କହିଛନ୍ତି। ଶିବାଜୀଙ୍କ ମାଟିରେ ଏଭଳି ସ୍ଲୋଗାନକୁ ବରଦାସ୍ତ କରାଯିବ ନାହିଁ। ତେବେ ପ୍ରଶାସନ ଏଭଳି ସ୍ଲୋଗାନକୁ ଅସ୍ବୀକାର କରିଛି।
ସୂଚନାନୁସାରେ, ଗୁରୁବାର ଏନଆଇଏ ପିଏଫଆଇର ଅନେକ ସ୍ଥାନରେ ଚଢ଼ାଉ କରିଥିଲା। ଏହାକୁ ବିରୋଧ କରି ପିଏଫଆଇ ଅନେକ ସ୍ଥାନରେ ବିକ୍ଷୋଭ ପ୍ରଦର୍ଶନ କରିଥିଲା। ସୋସିଆଲ ମିଡିଆରେ ଏକ ଭିଡିଓ ସାମ୍ନାକୁ ଆସିଛି। ଯେଉଁଥିରେ ଦର୍ଶାଯାଇଛି ଯେ ଶୁକ୍ରବାର ପୁଣେରେ ପିଏଫଆଇ ଦ୍ୱାରା ଆୟୋଜିତ ଏକ ବିକ୍ଷୋଭରେ ପାକିସ୍ତାନ ଜିନ୍ଦାବାଦର ସ୍ଲୋଗାନ ଦିଆଯାଇଥିଲା। ଯେଉଁଥିରେ ଭାଜପା ଏବଂ ମହାରାଷ୍ଟ୍ର ସରକାରଙ୍କ ତୀବ୍ର ପ୍ରତିକ୍ରିୟା ସାମ୍ନାକୁ ଆସିଛି।
ଶିନ୍ଦେ ଟୁଇଟ କରି କହିଛନ୍ତି, ପାକିସ୍ତାନ ଜିନ୍ଦବାଦର ସ୍ଲୋଗାନ ଦେଉଥିବା ସାମାଜିକ କର୍ମୀଙ୍କ ଧାରାକୁ ବିରୋଧ କରିବା ପୁଣେରେ ଠିକ ନୁହେଁ। ପୋଲିସ ବ୍ୟବସ୍ଥା ସେମାନଙ୍କ ବିରୋଧରେ ଉପଯୁକ୍ତ କାର୍ଯ୍ୟାନୁଷ୍ଠାନ ଗ୍ରହଣ କରିବ। ଶିବାଜୀଙ୍କ ମାଟିରେ ଏଭଳି ସ୍ଲୋଗାନକୁ ବରଦାସ୍ତ କରାଯିବ ନାହିଁ।
ଅପରପକ୍ଷରେ, ଏହି ମାମଲା ଆସିବା ପରେ ଭାଜପା ନେତାଙ୍କ ପ୍ରତିକ୍ରିୟା ମଧ୍ୟ ସାମ୍ନାକୁ ଆସିଛି। ପୁଣେରେ ପାକିସ୍ତାନ ସମର୍ଥକ ସ୍ଲୋଗାନ ଦେଉଥିବା ଲୋକଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରାଯିବା ଉଚିତ ବୋଲି ଭାଜପା ବିଧାୟକ ନୀତୀଶ ରାଣେ ଚେତାବନୀ ଦେଇଛନ୍ତି। ପପୁଲାର ଫ୍ରଣ୍ଟ ଅଫ ଇଣ୍ଡିଆ (ପିଏଫଆଇ) ଉପରେ ମଧ୍ୟ ପ୍ରତିବନ୍ଧକ ଲଗାଇବାକୁ ସେ ଦାବି କରିଛନ୍ତି।
ଉଲ୍ଲେଖନୀୟ ଯେ, ପ୍ରଦର୍ଶନ ସମୟରେ ପୋଲିସ ପ୍ରାୟ ୪୦ ଜଣ ବିକ୍ଷୋଭକାରୀଙ୍କୁ ଅଟକ ରଖିଥିଲା। ପୁଣେ ପୋଲିସ କହିଛି ଯେ ସେମାନେ ଏହି ଘଟଣାର ଅନୁସନ୍ଧାନ କରୁଛନ୍ତି। ଡେପୁଟି କମିଶନର ସାଗର ପାଟିଲ କହିଛନ୍ତି ଯେ ବେଆଇନ ସମାବେଶ ପାଇଁ ଆମେ ପିଏଫଆଇ ସଦସ୍ୟଙ୍କ ବିରୋଧରେ ମାମଲା ରୁଜୁ କରିସାରିଛୁ ଏବଂ ସ୍ଲୋଗାନ ଦେବା ପ୍ରସଙ୍ଗରେ ମଧ୍ୟ ଦୃଷ୍ଟି ରଖିଛୁ।
