ରାଓ୍ବଲପିଣ୍ଡି: ଅନ୍ତର୍ଜାତୀୟ ଦିନିକିଆରେ ଇଫ୍ତିଖର ଅହମ୍ମଦଙ୍କ ପ୍ରଥମ ୫ଉଇକେଟ ସଫଳତା ଏବଂ ବାବର ଆଜାମଙ୍କ ଆକର୍ଷଣୀୟ ଅପରାଜିତ ୭୭ରନ ସହାୟତାରେ ପାକିସ୍ତାନ ଏଠାରେ ରବିବାର ଅନୁଷ୍ଠିତ ଦ୍ୱିତୀୟ ଅନ୍ତର୍ଜାତୀୟ ଦିନିକିଆ କ୍ରିକେଟ ମ୍ୟାଚରେ ଜିମ୍ବାଓ୍ବେକୁ ୬ ଉଇକେଟରେ ପରାସ୍ତ କରିଛି। ଏଥିସହ ଦଳ ୨-୦ରେ ଅଗ୍ରଣୀ ଲାଭ କରିଥିବାବେଳେ ୩ ମ୍ୟାଚବିଶିଷ୍ଟ ସିରିଜ ଆଗୁଆ ଜିତିନେଇଛି। ଅନ୍ତର୍ଜାତୀୟ ଦିନିକିଆରେ ପାକିସ୍ତାନର ଏହା ହେଉଛି କ୍ରମାଗତ ୮ମ ବିଜୟ। ଟସ୍ ଜିତି ପ୍ରଥମେ ବ୍ୟାଟିଂ କରିଥିବା ଜିମ୍ବାଓ୍ବେ ସିନ୍ ଓ୍ବିଲିୟମ୍ସ (୭୦ବଲ୍ରୁ ୭୫ ରନ)ଙ୍କ ଲଢୁଆ ପ୍ରଦର୍ଶନ ସତ୍ତ୍ୱେ ୨୦୬ ରନ କରି ଅଲଆଉଟ ହୋଇଯାଇଥିଲା। ପାକିସ୍ତାନ ପକ୍ଷରୁ ଇଫତିକର ୪୦ ରନ ବିନିମୟରେ ୫ ଉଇକେଟ ଅକ୍ତିଆର କରିଥିବା ବେଳେ ମହମ୍ମଦ ମୁସା ୨ ଏବଂ ହାରିସ ରଫ୍, ଫହିମ ଅଶ୍ରଫ ଓ ଇମାଦ ଓ୍ବାସିମ ଗୋଟିଏ ଲେଖାଏ ଉଇକେଟ ନେଇଥିଲେ। ଜବାବରେ ପାକିସ୍ତାନ ୩୫.୨ ଓଭରରେ ୪ଉଇକେଟ ବିନିମୟରେ ୨୦୮ରନ କରି ମ୍ୟାଚ ଜିତି ନେଇଥିଲା।
ସଂକ୍ଷିପ୍ତ ସ୍କୋର
ଜିମ୍ବାଓ୍ବେ:୪୫.୧ ଓଭରରେ ୨୦୬/ଅଲ୍ଆଉଟ୍ (ସିନ୍ ଓ୍ବିଲିୟମ୍ସ-୭୫, ଇଫ୍ତିଖର ଅହମ୍ମଦ-୫/୪୦, ମହମ୍ମଦ ମୁସା-୨/୨୧)।
ପାକିସ୍ତାନ: ୩୫.୨ ଓଭରରେ ୨୦୮/୪ (ବାବର ଆଜାମ-୭୭*, ଇମାମୁଲ ହକ୍-୪୯, ଟେଣ୍ଡାଇ ଚିସୋରେ-୨/୪୯)।
