ନୂଆଦିଲ୍ଲୀ, ୧୮।୧୧: ପାକିସ୍ତାନ ଜେଲରେ କଏଦ ଥିବା ଭାରତର ପୂର୍ବତନ ନୌସେନା ଅଧିକାରୀ କୁଳଭୂଷଣ ଯାଦବଙ୍କୁ ମିଳିବାକୁ ଯାଉଛି ମୃତ୍ୟୁଦଣ୍ଡକୁ ବିରୋଧ କରିବାର ଅଧିକାର। ବୁଧବାର ପାର୍ଲାମେଣ୍ଟର ମିଳିତ ଅଧିବେଶନରେ ଏହି ସମ୍ପର୍କିତ ଏକ ବିଲ୍ ଗୃହୀତ ହୋଇଛି। ମୃତ୍ୟୁ ଦଣ୍ଡାଦେଶ ବିରୋଧରେ କୁଳଭୂଷଣଙ୍କୁ ଅପିଲ ଅଧିକାର ଦେବା ନିମନ୍ତେ ଅନ୍ତର୍ଜାତୀୟ ନ୍ୟାୟିକ ଅଦାଲତ (ଆଇସିଜେ) ପାକ୍ ସରକାରଙ୍କୁ ନିର୍ଦ୍ଦେଶ ଦେଇଥିଲା।
ଗୁପ୍ତଚରଗିରି ଏବଂ ଆତଙ୍କବାଦ ସହ ସମ୍ପୃକ୍ତି ଅଭିଯୋଗରେ ଭାରତୀୟ ନୌସେନାର ଅବସରପ୍ରାପ୍ତ ଅଧିକାରୀ କୁଳଭୂଷଣ (୫୧)ଙ୍କୁ ୨୦୧୭ ଏପ୍ରିଲରେ ପାକିସ୍ତାନ ସାମରିକ ଅଦାଲତ ମୃତ୍ୟୁ ଦଣ୍ଡାଦେଶ ଦେଇଥିଲା। ଭାରତ ସରକାର ଏହି ଦଣ୍ଡାଦେଶକୁ ଆଇସିଜେରେ ଚ୍ୟାଲେଞ୍ଜ କରିଥିଲେ। ଏଥିସହିତ କୁଳଭୂଷଣଙ୍କୁ ନିଜ ଦେଶର ଦୂତାବାସ ଜରିଆରେ ଆଇନଗତ ସହାୟତାକୁ ପାକିସ୍ତାନ ଅନୁମତି ଦେଉ ନ ଥିବା ସମ୍ପର୍କରେ ନୂଆଦିଲ୍ଲୀ ଜାତିସଂଘ ଅଦାଲତଙ୍କୁ ଜଣାଇଥିଲା। ଆଇସିଜେଙ୍କ ନିର୍ଦ୍ଦେଶ ଅନୁଯାୟୀ କୁଳଭୂଷଣଙ୍କୁ ଅପିଲ୍ ଅଧିକାର ଦେବା ଲାଗି ଗତ ଜୁନ୍ରେ ପାକିସ୍ତାନ ଏକ ବିଲ୍ ଆଣିଥିଲା।
ତେବେ ଏହି ପ୍ରସ୍ତାବିତ ଆଇନରେ ଆଇସିଜେଙ୍କ ନିର୍ଦ୍ଦେଶନାମା କାର୍ଯ୍ୟକାରୀ କରିବା ଲାଗି ବ୍ୟବସ୍ଥା ନ ଥିବା କହି ନୂଆଦିଲ୍ଲୀ ଏହାର ବିରୋଧ କରିଥିଲା। ଦଣ୍ଡାଦେଶର ଉପଯୁକ୍ତ ସମୀକ୍ଷା କରିବା ସହ ପୁନର୍ବିଚାର କରିବା ଲାଗି ଆଇସିଜେ ପାକ୍ ପାର୍ଲାମେଣ୍ଟକୁ ନିର୍ଦ୍ଦେଶ ଦେଇଥିଲେ। ଗତବର୍ଷ ପାକ୍ ସରକାର ଆଇସିଜେ ରୁଲିଂକୁ ନେଇ ପାର୍ଲାମେଣ୍ଟରେ ଏକ ଅଧ୍ୟାଦେଶ ଉପସ୍ଥାପନ କରିଥିଲେ। ସେହିବର୍ଷ ମେ’ ୨୦ରେ ଉକ୍ତ ଅଧ୍ୟାଦେଶ କାର୍ଯ୍ୟକାରୀ ହୋଇଥିଲା। କୁଳଭୂଷଣଙ୍କ ମାମଲାରେ ଏହା ଫଳପ୍ରଦ ସମୀକ୍ଷା ଓ ପୁନର୍ବିଚାର ପାଇଁ ଉପଯୁକ୍ତ ବ୍ୟବସ୍ଥା ନୁହେଁ ବୋଲି ବହିର୍ବ୍ୟାପାର ମନ୍ତ୍ରଣାଳୟ ମୁଖପାତ୍ର ଅରିନ୍ଦମ ବାଗ୍ଚୀ ସେତେବେଳେ କହିଥିଲେ।
