ଇସଲାମାବାଦ,୧୭।୮ : ଭାରତ ଭଳି ପାକିସ୍ତାନରେ ମଧ୍ୟ କ୍ରିକେଟ ପ୍ରେମୀଙ୍କ ଅଭାବ ନାହିଁ। ୨୦୦୯ରେ ଶ୍ରୀଲଙ୍କା ଦଳ ଉପରେ ଆକ୍ରମଣ ପରେ ଦେଶରେ କୌଣସି ଅନ୍ତର୍ଜାତୀୟ କ୍ରିକେଟ ମ୍ୟାଚ୍ ଖେଳାଯାଉ ନ ଥିଲା। କିନ୍ତୁ ଏବେ ସ୍ଥିତି ସୁଧୁରିଲାଣି। ଆଗାମୀ କିଛି ମାସରେ ନ୍ୟୁଜିଲାଣ୍ଡ ଓ ଇଂଲଣ୍ଡ ଭଳି ଦଳ ପାକିସ୍ତାନ ଗସ୍ତ କରିବାକୁ ଯାଉଛନ୍ତି।
କୌତୁହଳର କଥା ହେଲା ଯେ, କୋଭିଡ୍-୧୯ ମହାମାରୀ କାରଣରୁ ଗତବର୍ଷ ଠାରୁ ପ୍ରାୟତଃ ମ୍ୟାଚ୍ ଲାହୋର ଓ କରାଚୀରେ ଖେଳାଯାଉଛି। ପୂର୍ବରୁ ମୁଲତାନ ଓ ଫୈସଲାବାଦରେ ମଧ୍ୟ ମ୍ୟାଚ୍ ଖେଳାଯାଉ ଥିଲା। କିନ୍ତୁ ଅନ୍ୟ ଷ୍ଟାଡିୟମରେ ଦୀର୍ଘ ବର୍ଷ ହେଲା ମ୍ୟାଚ୍ ଖେଳାଯାଉ ନ ଥିବାରୁ ସେଗୁଡ଼ିକ ଅବସ୍ଥା ଏବେ ଭଲ ନାହିଁ। ପାକିସ୍ତାନର ପଞ୍ଜାବ ପ୍ରୋଭିନ୍ସର ଖାନଓ୍ବୋଲରେ ଥିବା ଷ୍ଟାଡିୟମରେ ଏବେ ପରିବା ଚାଷ କରାଯାଉଛି। ଷ୍ଟାଡିୟମରେ ପ୍ରାକ୍ଟିସ ଏରିଆ, ପ୍ୟାଭିଲିଅନ ଓ ଗ୍ରାଉଣ୍ଡ ରହିଛି। ଏସବୁ ମାଡ଼ି ବସିଛନ୍ତି ସ୍ଥାନୀୟ କୃଷକ। ଅତିକମ୍ରେ ଘରୋଇ ମ୍ୟାଚ୍ ଯେଉଁଠାରେ ଖେଳାଯାଇ ପାରିଥାନ୍ତା, ସେଠାରେ ଏବେ ଲଙ୍କା, କଖାରୁ ପ୍ରଭୃତି ଚାଷ ହେଉଛି।
