କୋଲାକାତା,୨୬।୪: ପହଲଗାମ ଆତଙ୍କବାଦୀ ଆକ୍ରମଣ ବିରୋଧରେ ପୋଷ୍ଟ କରିବାରୁ ପଶ୍ଚିମବଙ୍ଗର ଉତ୍ତର ୨୪ ପରଗନା ଜିଲାର ଅଶୋକନଗରର ଜଣେ ଯୁବତୀଙ୍କୁ ବଳାତ୍କାର ଧମକ ଦିଆଯାଇଛି। ପୀଡିତା ନିଜେ ଫେସବୁକରେ ଲାଇଭ ଆସି କାନ୍ଦି କାନ୍ଦି ଏ ବିଷୟରେ ସୂଚନା ଦେଇଥିଲେ।
ଖବର ପାଇବା ପରେ ସ୍ଥାନୀୟ ଥାନାର ପୋଲିସ ଝିଅଟିର ଘରକୁ ଯାଇ ଘଟଣା ବିଷୟରେ ସୂଚନା ନେଇଥିଲେ। ଭାଜପା ବିଧାୟକ ଏବଂ ପଶ୍ଚିମବଙ୍ଗ ବିଧାନସଭାର ବିରୋଧୀ ଦଳ ନେତା ଶୁଭେନ୍ଦୁ ଅଧିକାରୀ ମଧ୍ୟ ପୀଡିତାଙ୍କ ସହ ଫୋନରେ କଥା ହୋଇଥିଲେ।
ପ୍ରାଥମିକ ତଦନ୍ତରୁ ଜଣାପଡ଼ିଛି ଯେ ଦୁଇଟି ନକଲି ଫେସବୁକ ଆକାଉଣ୍ଟରୁ ଏହି ଧମକ ଦିଆଯାଇଛି। ଯେଉଁମାନେ ଧମକ ଦେଇଥିଲେ ସେମାନେ ଝିଅଟିର ପୋଷ୍ଟକୁ ଧାର୍ମିକ ଘୃଣା ପ୍ରସାର କରୁଥିବା ଭାବରେ ବର୍ଣ୍ଣନା କରିଛନ୍ତି।
ପୀଡିତା କହିଛନ୍ତି ଯେ Pahalgam Terror Attackରେ ଯେପରି ହିନ୍ଦୁ ପର୍ଯ୍ୟଟକଙ୍କୁ ବାଛି ବାଛି ହତ୍ୟା କରାଯାଇଥିଲା ତାହା ଅତ୍ୟନ୍ତ ନିନ୍ଦନୀୟ। ସେ ଏହାର ପ୍ରତିବାଦରେ ପୋଷ୍ଟ କରିଥିଲେ। ଅଧିକାଂଶ ଲୋକ ତାଙ୍କ ପୋଷ୍ଟକୁ ସମର୍ଥନ କରିଛନ୍ତି।
ଅନ୍ୟପକ୍ଷରେ, କୋଲକାତା ସ୍ଥିତ ଏକ ସଂଗଠନ ଭବାନୀପୁର ଗୁଜରାଟୀ ଶିକ୍ଷା ସମାଜ, ୧୦ ଲକ୍ଷ ଟଙ୍କାର ଆର୍ଥିକ ସହାୟତା ଘୋଷଣା କରିଛି। ଆତଙ୍କବାଦୀ ଆକ୍ରମଣରେ ପ୍ରାଣ ହରାଇଥିବା ପଶ୍ଚିମବଙ୍ଗର ତିନି ଜଣଙ୍କ ପିଲାଙ୍କ ଶିକ୍ଷା ପାଇଁ ପ୍ରତ୍ୟେକଙ୍କୁ ୧୦ ଲକ୍ଷ ଟଙ୍କା। ମୃତକଙ୍କ ମଧ୍ୟରେ ୨ ଜଣ କୋଲକାତାର ଏବଂ ଜଣେ ପୁରୁଲିଆ ଜିଲାର ଝାଲଦାର ବୋଲି ଜଣା ପଡ଼ିଛି।
