ଛତ୍ରପୁର,୧୬।୧୨(ଡି.ଏନ୍.ଏ.): ଗଞ୍ଜାମ ଜିଲାରେ ଖରିଫ ଧାନ ସଂଗ୍ରହ ଶୁକ୍ରବାରଠାରୁ ଆରମ୍ଭ ହେବ। ପ୍ରଥମ ପର୍ଯ୍ୟାୟରେ ଜିଲାକୁ ୩୬ ଲକ୍ଷ ୭୪ ହଜାର ୩୮ କୁଇଣ୍ଟାଲ ଧାନ ତଥା ୨୪ ଲକ୍ଷ ୬୧ ହଜାର ୬ଶହ କୁଇଣ୍ଟାଲ ଚାଉଳ ସଂଗ୍ରହ ପାଇଁ ଟାର୍ଗେଟ୍ ଆସିଛି। ୧ଲକ୍ଷ ୩୨ହଜାର ୬୫୧ ଚାଷୀଙ୍କ ଠାରୁ ଧାନ କିଣାଯିବ। ଜିଲାରେ ୩୬୫ ପ୍ୟାକ୍ସ,୧୦୩ ମହିଳା ସ୍ବୟଂ ସହାୟକ ଗୋଷ୍ଠୀ ଓ ଗୋଟିଏ ପାଣି ପଞ୍ଚାୟତ ଦ୍ୱାରା ଧାନ ସଂଗ୍ରହ କରାଯିବ ବୋଲି ଜିଲା ଭାରପ୍ରାପ୍ତ ମୁଖ୍ୟ ଯୋଗାଣ ଅଧିକାରୀ ପୁଷା ମୁଣ୍ଡା ସୂଚନା ଦେଇଛନ୍ତି । ଶୁକ୍ରବାର ଶେରଗଡ ବ୍ଲକ ଡେଙ୍ଗାପଦର ସୋସାଇଟିରେ କାର୍ଯ୍ୟକ୍ରମ ଶୁଭାରମ୍ଭ ହେବ। ପରେ ପର୍ଯ୍ୟାୟକ୍ରମେ ଜିଲାର ବିଭିନ୍ନ ସୋସାଇଟିରେ ଧାନ ସଂଗ୍ରହ କରାଯିବ । ୩୬୪ ମିଲର ଏହି ଧାନକିଣାରେ ନିୟୋଜିତ ରହିବେ। ୨୦୨୧/୨୨ରେ ୧ ଲକ୍ଷ ୨୨ ହଜାର ୮୩୪ ଜଣ ଚାଷୀ ପଞ୍ଜୀକରଣ କରିଥିବା ବେଳେ ୯୬ ହଜାର ୪୯୧ ଚାଷୀଙ୍କଠାରୁ ୪୦ ଲକ୍ଷ ୨୫ ହଜାର ୩୭୪ କୁଇଣ୍ଟାଲ ଧାନ ସଂଗ୍ରହ ହୋଇଥିଲା । ୨୬ ହଜାର ୩୪୩ ଜଣ ପଞ୍ଜୀକୃତ ଚାଷୀ ଧାର୍ଯ୍ୟ ସମୟରେ ଧାନ ସରକାରୀ ଦରରେ ବିକ୍ରି କରିପାରି ନ ଥିଲେ । ଉକ୍ତ ବର୍ଷ ଧାନକିଣାରେ ନାନା ସମସ୍ୟା ଉପୁଜିବା ସହ ବହୁ ସ୍ଥାନରେ ଠିକଣା ସମୟରେ ଧାନ ଉଠୁ ନ ଥିବାରୁ ଚାଷୀ ଆନ୍ଦୋଳନ ଦେଖିବାକୁ ମିଳିଥିଲା । ବିଶେଷକରି ମିଲରଙ୍କ ମର୍ଜିରେ ଧାନ ଉଠାଯାଉଥିବା ଦେଖିବାକୁ ମିଳିଥିଲା । ଅଧିକାଂଶ ସ୍ଥାନରେ କଟନୀ ଛଟନି ସମସ୍ୟା ସହ କ୍ୱାଲିଟି ଧାନ ଆଳ ଦେଖାଇ ମିଲରମାନେ ଚାଷୀଙ୍କ ଧାନ ଉଠାଇବାକୁ ରାଜି ହୋଇ ନ ଥିଲେ। ଫଳରେ ଚାଷୀଙ୍କ ଟୋକନ ଅବଧି ଶେଷ ହୋଇଯାଇଥିଲା। ଚାଷୀ ଧାନକୁ ସରକାରୀ ଧାର୍ଯ୍ୟରେ ଧାନ ବିକ୍ରି କରିବା ସହଜ ହେଉନଥିବା ବେଳେ ଏହାର ସୁଯୋଗ ନେଇଥିଲେ ଦଲାଲ । ଅନ୍ୟପକ୍ଷରେ ସମସ୍ତ ପଞ୍ଜୀକୃତ ଚାଷୀ କିପରି ସୁରୁଖୁରୁରେ ସରକାରୀ ଦରରେ ଧାନ ବିକ୍ରି କରିପାରିବେ ସେନେଇ ବ୍ୟବସ୍ଥା କରିବାକୁ ଚାଷୀ ନେତା ସୀମାଞ୍ଚଳ ନାହାକ ଦାବି କରିଛନ୍ତି। ଯେହେତୁ ପ୍ରତ୍ୟେକ ବର୍ଷ ଜିଲାରେ ବହୁ ଚାଷୀ ସରକାରୀ ଦରରେ ଧାନ ବିକ୍ରି ନ କରି ପାରି ଦଲାଲଙ୍କ ଶିକାର ହେଉଛନ୍ତି । ତେଣୁ ଚଳିତବର୍ଷ ଯେପରି ଏହି ସମସ୍ୟା ନ ହୁଏ ସେଥିପ୍ରତି ଜିଲା ଯୋଗାଣ ବିଭାଗ ଧ୍ୟାନ ଦେବା ଜରୁରୀ ବୋଲି କହିଛନ୍ତି । ଧାନକିଣା ପ୍ରକ୍ରିୟା ମାର୍ଚ୍ଚ ୩୧ ତାରିଖ ପର୍ଯ୍ୟନ୍ତ ଜାରି ରହିବ ।
