କେନ୍ଦୁଝର, ୭।୫ (ସ୍ବ.ପ୍ର.): କରୋନାର ଦ୍ୱିତୀୟ ଲହର ଏବେ ସାରା ଦେଶରେ ସଙ୍ଗୀନ ପରିସ୍ଥିତି ସୃଷ୍ଟି କରିଛି। ମେଡିକାଲ ଭିତ୍ତିଭୂମି ଥିଲେ ମଧ୍ୟ ଅକ୍ସିଜେନ ଅଭାବ ସମସ୍ୟାକୁ ଜଟିଳ କରିଦେଉଛି। ଯେଉଁଥିପାଇଁ ବହୁ କରୋନା ଅକ୍ରାନ୍ତ ମୃତ୍ୟୁବରଣ କରୁଛନ୍ତି। ସେଥିଲାଗି ସରକାରଙ୍କ ଆହ୍ବାନ କ୍ରମେ ପ୍ଲାଣ୍ଟରେ ମେଡିକାଲ ବ୍ୟବହାର ଉପଯୋଗୀ ଅକ୍ସିଜେନ ପ୍ରସ୍ତୁତ କରାଯାଉଥିବାବେଳେ ବିଭିନ୍ନ ସ୍ବେଚ୍ଛାସେବୀ ସଂଗଠନ ଏବଂ ସାମାଜିକକର୍ମୀ ଏହି କାର୍ଯ୍ୟରେ ଆଗକୁ ଆସିଛନ୍ତି। ସେମାନଙ୍କ ମଧ୍ୟରୁ କେନ୍ଦୁଝର ସହରରେ ଜଣେ ସାମାଜିକକର୍ମୀ ହେଲେ ଅଶୋକ ଶର୍ମା(ମୁନା)। ଜିଲା ମୁଖ୍ୟାଳୟରେ ବିନା ମୂଲ୍ୟରେ କରୋନା ଆକ୍ରାନ୍ତ ଗୁରୁତର ରୋଗୀଙ୍କୁ ଅକ୍ସିଜେନ ଯୋଗାଇ ସ୍ବତନ୍ତ୍ର ପରଚୟ ସୃଷ୍ଟି କରିଛନ୍ତି । ତାଙ୍କ ପାଖରେ ୩ଟି ଛୋଟ ସିଲିଣ୍ଡର ମିଶାଇ ୨୩ଟି ସିଲିଣ୍ଡର ଏବଂ ୬ଟି ରେଗୁଲେଟର ରହିଛି।
କେନ୍ଦୁଝର ସହରରେ ୪୬ବର୍ଷ ବୟସ୍କ ମୁନା ଆରମ୍ଭ କରିଛନ୍ତି ଏହି ମହତ ସେବା। ଶଟ୍ଡାଉନ ସମୟରେ ତେଲ ଭର୍ତ୍ତି କରି ଘରକୁ ଫେରୁଥିବା ବେଳେ ଜଣେ ପୋଲିସ ତାଙ୍କୁ ଅଟକାଇଥିଲେ। କ’ଣ ଅକ୍ସିଜେନ ପରିବହନ କରୁଛ ବୋଲି ଏଭଳି ପ୍ରଶ୍ନ ପଚାରିଥିଲେ! ସେତେବେଳେ ମନରେ ଗୁରୁତର ତଥା ଅଭାବୀ କରୋନା ରୋଗୀଙ୍କୁ ଅକ୍ସିଜେନ ଯୋଗାଇବା କଥା ମନକୁ ଆସିଥିଲା। ତା’ପରଠୁ ସେ ଏହି ସେବାରେ ଲାଗିପଡ଼ିଛନ୍ତି। ପ୍ରତ୍ୟେକ ଛୋଟ ସିଲିଣ୍ଡରରେ ୧୦୦ ଟଙ୍କା ଓ ବଡ ସିଲିଣ୍ଡରରେ ୩୦୦ ଟଙ୍କା ଅକ୍ସିଜେନ ଭର୍ତ୍ତି କରିବାକୁ ଖର୍ଚ୍ଚ ହୋଇଥାଏ ା ତେବେ ଏହି ଅକ୍ସିଜେନ ଆଣିବା ପାଇଁ ପ୍ରାୟ ୨୦ କି.ମି. ଦୂର ଏମଏସପି କାରଖାନାର ଅକ୍ସିଜେନ ପ୍ଲାଣ୍ଟକୁ ଯିବାକୁ ପଡିଥାଏ ା ତାଙ୍କ ବାପା ସ୍ବର୍ଗତ ବିଶ୍ୱନାଥ ଶର୍ମାଙ୍କ ନାମରେ ସେ ଏହି ସେବା ଯୋଗାଇଦେଉଛନ୍ତି। ଘରେ ୨୩ଟି ପୁରୁଣା ଅକ୍ସିଜେନ ସିଲିଣ୍ଡର ଥିଲା। ସେସବୁକୁ ସଫା କରି ରଙ୍ଗ ମାରି ସେ ବ୍ୟବହାର ଆରମ୍ଭ କରିଥିଲେ। ପ୍ରଥମେ ଜଣାଶୁଣା ରୋଗୀଙ୍କୁ ସହାୟତା କରୁଥିଲେ। ଏବେ ସମସ୍ତଙ୍କୁ ସହାୟତା ଦେବାକୁ ପ୍ରସ୍ତୁତି ଚଳାଇଛନ୍ତି। ଅନେକ ସମୟରେ ରାତି ଅନିଦ୍ରା ହେବାକୁ ପଡୁଥିଲେ ହେଁ ଏହି କାର୍ଯ୍ୟକୁ ସେ ଜାରି ରଖିଛନ୍ତି।
ତେବେ ୨୩ ସିଲିଣ୍ଡର ପାଇଁ ବହୁ କଷ୍ଟରେ ୬ ଟି ରେଗୁଲେଟର ଓ ମାସ୍କ କିଣିଥିବା ବେଳେ ଅବଶିଷ୍ଟ ସିଲିଣ୍ଡର ପାଇଁ ରେଗୁଲେଟର ଓ ମାସ୍କ ଯୋଗାଡ କରିବାକୁ ପଡୁଛି ା ଏଣୁ ଅନୂ୍ୟନ ଏହି ରେଗୁଲେଟର ଓ ମାସ୍କ ପ୍ରଶାସନ ବା ଅନ୍ୟ କେହି ଯୋଗାଇଦେଲେ ସବୁ ସିଲିଣ୍ଡର ଏକ ସମୟରେ କାର୍ଯ୍ୟକ୍ଷମ ହୋଇପାରନ୍ତା ବୋଲି ସେ କହିଛନ୍ତି। ଏ ସମ୍ପର୍କରେ କେନ୍ଦୁଝର ଜିଲାପାଳ କେନ୍ଦୁଝର ଆଶିଷ ଠାକରେ କହିଛନ୍ତି ଯେ ତାଙ୍କ ବିଷୟରେ ଖବର ରଖି ଆମେ ତାଙ୍କ ସହିତ ଯୋଗାଯୋଗ କରିବୁ ା ଏହା ବ୍ୟତୀତ କେନ୍ଦୁଝର ସହରରେ ବିଭିନ୍ନ ସ୍ଥାନରେ ୫ଟି ଥଣ୍ଡା ପାନୀୟ ଜଳ ବ୍ୟବସ୍ଥା କରିଛନ୍ତି। ତାଙ୍କ ଭାଇ ଓ ପରିବାର ସଦସ୍ୟଙ୍କ ସହଯୋଗ ଏବଂ ପ୍ରେରଣାରେ ଏହି ସବୁ ସେବା କରୁଥିବା କହିଛନ୍ତି। ବର୍ଷର ସବୁ ସମୟରେ ଲୋକଙ୍କ ସେବା କରିଆସୁଥିବା ମୁନାଙ୍କ ଏଭଳି ଉଦ୍ୟମ ରୋଗୀଙ୍କ ପାଇଁ ବରଦାନ ସଦୃଶ୍ୟ ହୋଇଛି।
