ମହାକାଳପଡ଼ା,୩ା୪ (ପ୍ରତାପ ଚନ୍ଦ୍ର ସ୍ବାଇଁ): କେନ୍ଦ୍ରାପଡ଼ା ଜିଲା ମହାକାଳପଡ଼ା ବ୍ଲକ ଉପକୂଳ ଅଞ୍ଚଳର ସାମୁଦ୍ରିକ ଝଡ଼, ସୁନାମି, ଭୂକମ୍ପ ପ୍ରବଣରୁ ସୁରକ୍ଷା ପାଇଁ ଜନବସତି ପାର୍ଶ୍ୱରେ ସୁଉଚ୍ଚ ମାଟି ବନ୍ଧ ନିର୍ମାଣରେ ପଥର ପ୍ୟାକିଂ କାର୍ଯ୍ୟ ହେଉଛି। ବ୍ଲକ ଅଧୀନ ସ୍ଥାନୀୟ ରଡ଼ିଆ, କଂସାର, ବଡ଼ଦାଣ୍ଡୁଆ, ବଗ ଗହନ, ବତିଘର, ଖରିନାସୀ, ଜମ୍ବୁ, ସୁନିତି, ବାବର ଆଦି ଅଞ୍ଚଳରେ ରାଜ୍ୟ ସରକାରଙ୍କ ନଦୀ ତଟବନ୍ଧ (ଜଳସମ୍ପଦ) ବିଭାଗ ପକ୍ଷରୁ ବହୁ କୋଟି ଟଙ୍କାର ନିର୍ମାଣ କାର୍ଯ୍ୟ ଆରମ୍ଭ ହୋଇଛି। ହେଲେ ବେଆଇନ ଭାବେ ନଦୀରୁ ବାଲି ଓ ପାହାଡ଼ରୁ ପଥର ବୋଝେଇ ହାଇଓ୍ବାଗୁଡ଼ିକ ବିନା କାଗଜପତ୍ରରେ ଖୁଲମଖୁଲା ଚାଲାଣ କରାଯାଉଥିଲା। ଏହାକୁ ଦୃଷ୍ଟିରେ ରଖି ଜିଲା ଖଣି ବିଭାଗ ଓ ସ୍ଥାନୀୟ ପୋଲିସ ପକ୍ଷରୁ ଏକ ସ୍ବତନ୍ତ୍ର ସ୍କ୍ବାଡ୍ ଗଠନ କରି ଚଢ଼ାଉ କରାଯାଇ ୧୧ଟି ହାଇଓ୍ବା ଜବତ ପରେ ବ୍ଲକ ପରିସରରେ ରଖାଯାଇଛି। ବ୍ଲକ ପରିସରରେ ଜବତ ହାଇଓ୍ବା ଅଟକ ରଖିବା ଯୋଗୁ ଆସୁଥିବା ଜନସାଧାରଣ ଯାତାୟାତ ଓ ପାର୍କିଂ ସମସ୍ୟା ରହୁଛି ବୋଲି ସ୍ଥାନୀୟ ବୁଦ୍ଧିଜୀବୀ ଓ ସଧାରଣ ଲୋକମାନେ କହିଛନ୍ତି। ନଦୀ ବନ୍ଧ ନିର୍ମାଣରେ ପଥର ବୋଝେଇ ଗାଡ଼ି ଅଟକ ଯୋଗୁ ଉନ୍ନୟନମୂଳକ କାର୍ଯ୍ୟ ବାଧାପ୍ରାପ୍ତ ହେଉଛି ବୋଲି ନଦୀକୂଳିଆ ଅଞ୍ଚଳର ଲୋକମାନେ କହିଛନ୍ତି। ବେଆଇନ ନଦୀ ବାଲି ଓ ପଥର ଚାଲାଣ ଯୋଗୁ ସରକାର ରାଜସ୍ବ ହରାଉଛନ୍ତି ବୋଲି ବୁଦ୍ଧିଜୀବୀ ନରୋତ୍ତମ ପାର୍ଥ ସାରଥୀ ଓ ନବ ନିର୍ମାଣ କୃଷକ ସଙ୍ଗଠନର ନେତା ଅଙ୍କୁର ପଲେଇ କହିଛନ୍ତି।
ସୂଚନା ଯୋଗ୍ୟ, ଜିଲା ଖଣି ବିଭାଗ, ମହାକାଳପଡ଼ା ପୋଲିସ ପକ୍ଷରୁ ଜାନୁଆରୀ ୧୮ରେ ୮ ଟି ପଥର ବୋଝେଇ ହାଇୱାକୁ ଥାନା ଅଧୀନ ଅଳାଇଲୋ-ଓରତ ମୁଖ୍ୟ ରାସ୍ତାରେ ଜବତ କରାଯାଇଥିଲା। ପରେ ଜବତ ହାଇୱାଗୁଡ଼ିକ ଓଭର୍ ଲୋଡ୍ କରିବା ଓ ଆବଶ୍ୟକ କାଗଜପତ୍ର ଅଭାବ ଯୋଗୁ ବ୍ଲକ ପରିସରରେ ପୋଲିସ ଅଟକ ରଖିଛି। ସେହିଭଳି ଏହି ଗାଡ଼ିଗୁଡ଼ିକ ଜବତର ୨ ସପ୍ତାହ ପରେ ଅନ୍ୟ ୩ଟି ଗାଡ଼ିକୁ ସ୍କ୍ବାଡ ଜବତ କରିଥିଲା। ଏ ସମ୍ପର୍କରେ ମହାକାଳପଡ଼ା ଥାନା ଅଧିକାରୀ ମାନସ କୁମାର ମଲିକଙ୍କୁ ପଚାରିବାରେ ଜବତ ଗାଡ଼ିଗୁଡ଼ିକ ବିନା କାଗଜ ପତ୍ର ଓ ଓଭର ଲୋଡ ଯୋଗୁ କେସ୍ କରାଯାଇ କୋର୍ଟଙ୍କୁ ଅବଗତ କରାଯାଇଛି। ଆଇନ ଅନୁସାରେ କୋର୍ଟରୁ ଆବଶ୍ୟକ କାଗଜପତ୍ର ଯାଞ୍ଚ ପରେ ରିଲିଜ୍ ଅର୍ଡର ପ୍ରଦାନ କରାଯିବ ବୋଲି ସେ କହିଛନ୍ତି। କିଛିଦିନ ପୂର୍ବରୁ ୨ଟି ଅଟକ ହାଇଓ୍ବା କୋର୍ଟରୁ ରିଲିଜ୍ ଅର୍ଡର ମିଳିଛି, ଅବଶିଷ୍ଟ ୯ଟି ଗାଡ଼ି ଅଟକ ରହିଛି। ଏ ସଂକ୍ରାନ୍ତରେ କେନ୍ଦ୍ରାପଡ଼ା ଜିଲାପାଳ ରଘୁରାମ ଆର ଆୟରଙ୍କ ମତାମତ ନେବାରେ ଜବତ ହୋଇଥିବା ପଥର ବୋଝେଇ ହାଇଓ୍ବାଗୁଡ଼ିକ ଖବର ନାହିଁ। ଆଇନ ଅନୁସାରେ ଜବତ ଗାଡ଼ିଗୁଡ଼ିକର କାଗଜ ପତ୍ର ଯାଞ୍ଚ ପରେ ରିଲିଜ୍ କରାଯିବ ବୋଲି ସେ କହିଛନ୍ତି।
