ପୋଲସରା,୧୯।୫: ଦୀଘବର୍ଷ ଧରି ପୋଲସରା ଗୋପବନ୍ଧୁ ହାଇସ୍କୁଲ ଛକ ଠାରେ ସୁନା ବ୍ୟବସାୟ କରୁଥିବା ଶ୍ରୀରାମ ଜୁଏଲର୍ସର ମାଲିକ ବିନୋଦ ବିହାରୀ ପଣ୍ଡା ଜଣେ ଗ୍ରାହକଙ୍କୁ ୨୨ କ୍ୟାରେଟର ସୁନା କହି ନିମ୍ନମାନର ସୁନା ଦେଇ ହରଡ଼ଘଣାରେ ପଡ଼ିଛନ୍ତିି । ଉକ୍ତ ଗ୍ରାହକ ସେହି ନିମ୍ନମାନର ସୁନାର କ୍ରୟ ଓ ଟଙ୍କା ଫେରସ୍ତକୁ ନେଇ ଶ୍ରୀରାମ ଜୁଏଲର୍ସକୁ ଆସିଥିବା ବେଳେ ମାଲିକ ସେମାନଙ୍କୁ ଅତର୍କିତ ଆକ୍ରମଣ କରଥିବା ନେଇ ପୋଲସରା ଥାନାରେ ମାମଲା ରୁଜୁ ହୋଇଛି। ଯାହାକୁ ନେଇ ପୋଲସରା ପୋଲିସ ଘଟଣାର ତଦନ୍ତ କରି ଶ୍ରୀରାମ ଜୁଏଲର୍ସର ମାଲିକ ବିନୋଦ ବିହାରୀ ପଣ୍ଡା ଓ ପୁଅ ଆଶୁତୋଷ ପଣ୍ଡାଙ୍କୁ ଗିରଫ କରି କୋର୍ଟ ଚାଲାଣ କରିଥିବା ଜଣାପଡିଛି ।
ସୂଚନାଯୋଗ୍ୟ, ପୋଲସରା ଅଞ୍ଚଳର ବବିତା ବେହେରା ମେ ୪ ୨୦୧୯ରେ ବିନୋଦଙ୍କ ଜୁଏଲର୍ସ ଦୋକାନରୁ ୧୩ ଗ୍ରାମ ୯୦୦ ମିଲିଗ୍ରାମ ଓଜନର ସୁନାହାର ଓ ୫ ଗ୍ରାମ ୬୮୦ ମିଲିଗ୍ରାମ ଓଜନର ଦୁଇଟି ସୁନା ଅଳଙ୍କାର ୨୨ କ୍ୟାରେଟ ସୁନାର ବିଲିଙ୍ଗ୍ରେ ୬୧ହଜାର ୮୪୬ ଟଙ୍କାରେ କ୍ରୟ କରିଥିଲେ । ହେଲେ ସମୟ ଅନୁସାରେ ସେହି ୨୨ କ୍ୟାରେଟ କ୍ରୟ କରାଯାଇଥିବା ସୁନା ଗହଣା ଗୁଡ଼ିକ କଳା ପଡ଼ି ଯାଇଥିଲା । ଏନେଇ ବବିତା ବେହେରା ନିଜ ସ୍ବାମୀ ମନୋଜ କୁମାର ଘଡେଇ ଓ କ୍ରୟ କରିଥିବା କଳା ସୁନା ଗୁଡିକୁ ସାଙ୍ଗରେ ନେଇ ୧୫ ତାରିଖ ସଂଧ୍ୟା ୫ଟାରେ ଶ୍ରୀରାମ ଜୁଏଲର୍ସ ଯାଇ ଉକ୍ତ ସୁନାର ମାନ ଏବଂ ୨୨ କ୍ୟାରେଟ ସୁନାର ଶୁଦ୍ଧତା ନେଇ ଟଙ୍କା ଫେରସ୍ତ କରିବା ପାଇଁ ଅନୁରୋଧ କରିଥିଲେ । କିନ୍ତୁ ଦୋକାନ ମାଲିକ ନିଜ ଦୋଷ ଦୁର୍ବଳତାକୁ ଲୁଚାଇବା ସହିତ କ୍ରୟ କରିଥିବା ଗ୍ରାହକଙ୍କୁ ଅଶ୍ଳୀଳ ଭାଷାରେ ଗାଳି ଗୁଲଜ କରିଥିଲେ । ଯାହାକୁ ନେଇ ମହିଳା ଗ୍ରାହକଙ୍କ ସ୍ବାମୀ ପ୍ରତିବାଦ କରିବାରୁ ଉଭୟ ବାପା ପୁଅ ମିଶି ଉକ୍ତ ସୁନା ଦୋକାନରେ ହିଁ ଅତର୍କିତ ଆକ୍ରମଣ କରିଥିଲେ । ଏନେଇ ପୋଲସରା ଥାନାରେ ୨୭୧/୨୩ରେ କେସ ରୁଜୁ କରାଯାଇ ବାପା ଓ ପୁଅଙ୍କୁ ଗିରଫ କରାଯାଇଛି ବୋଲି ଥାନା ଅଧିକାରୀ ସୂଚନା ଦେଇଛନ୍ତି । ଏପରିକି ପୋଲସରା ଅଞ୍ଚଳରେ ଶ୍ରୀରାମ ଜୁଏଲର୍ସର ଏଭଳି ୨୨ କ୍ୟାରେଟ ସୁନା କିଣା ବିକାକୁ ନେଇ ପୂର୍ବରୁ ବହୁ ଅଭିଯୋଗ ହୋଇଛି । ହେଲେ ଏଭଳି ପରିସ୍ଥିତିରେ ଗ୍ରାହକଙ୍କୁ ଆକ୍ରମଣ କରି ଗିରଫ ହୋଇ ଜେଲ ଯିବା ପ୍ରଥମ ଘଟଣା ବୋଲି ପୋଲସରା ସହରରେ ଚର୍ଚ୍ଚାର ବିଷୟ ପାଲଟିଛି ।
