ଧାମନଗର,୧୫।୩(ସ୍ବ.ପ୍ର.): ଗ୍ରାମାଞ୍ଚଳରେ ଲୋକଙ୍କ ଘରକୁ ସିଧାସଳଖ ବିଶୁଦ୍ଧ ପାନୀୟ ଜଳ ଯୋଗାଣ ନିମନ୍ତେ ରାଜ୍ୟ ସରକାରଙ୍କ ପକ୍ଷରୁ କୋଟି କୋଟି ଟଙ୍କା ବ୍ୟୟରେ ଓଭରହେଡ୍ ପାଣିଟାଙ୍କି ନିର୍ମାଣ କରାଯାଉଛି। କିନ୍ତୁ କେଉଁଠି ନିମ୍ନମାନର କାର୍ଯ୍ୟ ତ ଆଉ କେଉଁଠି ମନ୍ଥର ଗତିରେ କାମ ଚାଲିଥିବାରୁ ଅଦ୍ୟାବଧି ସମ୍ପୂର୍ଣ୍ଣ ହୋଇପାରୁ ନାହିଁ। ସେହିପରି ଟାଙ୍କି ନିର୍ମାଣ ସରିଥିଲେ ହେଁ କାର୍ଯ୍ୟକ୍ଷମ ହେଉ ନ ଥିବାରୁ ଲୋକଙ୍କ ପାଖରେ ପାଣି ପହଞ୍ଚତ୍ପାରୁ ନାହିଁ। ଭଦ୍ରକ ଜିଲା ଧାମନଗର ବ୍ଲକରେ ଏଭଳି ସମସ୍ୟା ଦେଖିବାକୁ ମିଳିଛି। ବ୍ଲକର ଅନେକ ପଞ୍ଚାୟତରେ ପୂର୍ବରୁ ଜରାଜୀର୍ଣ୍ଣ ଅବସ୍ଥାରେ ଥିବା ପାଣିଟାଙ୍କିକୁ ମରାମତି ଓ ରଙ୍ଗ ଦେଇ ଲକ୍ଷାଧିକ ଟଙ୍କା ହେର୍ଫେର କରାଯାଉଥିବା ମଧ୍ୟ ଅଭିଯୋଗ ହେଉଛି। ପଧାନି ପଞ୍ଚାୟତରେ ୨ଟି ପାଣିଟାଙ୍କି ନିର୍ମାଣ ହୋଇଥିଲେ ମଧ୍ୟ ଏପର୍ଯ୍ୟନ୍ତ ପାଣି ବୁନ୍ଦାଏ ବି ବାହାରିନି। ପଞ୍ଚାୟତ କାର୍ଯ୍ୟାଳୟ ନିକଟରେ ପ୍ରାୟ ୨ କୋଟି ଟଙ୍କା ବ୍ୟୟରେ ୧ ଲକ୍ଷ ଲିଟର କ୍ଷମତା ବିଶିଷ୍ଟ ପାଣିଟାଙ୍କି ୨୦୧୭ରୁ ନିର୍ମାଣ ହୋଇଥିଲେ ମଧ୍ୟ ଷ୍ଟାଣ୍ଡପୋଷ୍ଟ ନିର୍ମାଣ ସମ୍ପୂର୍ଣ୍ଣ ହୋଇନାହିଁ। ଜଳ ଯୋଗାଣ ପାଇଁ ବିଛାଯାଇଥିବା ପାଇପ୍ ଅଧିକାଂଶ ଜାଗାରେ ଫାଟିଯାଇଛି। ଏହି ଟାଙ୍କି ଦ୍ୱାରା ପଧାନି, ରାମରାକୁଳ, ଆଠଗଡ଼ିଆ, ଦଶନ୍ଧିକୂଳ ଆଦି ଗ୍ରାମର ୪ ହଜାର ଲୋକଙ୍କୁ ପାନୀୟ ଜଳ ଯୋଗାଇବା ପାଇଁ ନିର୍ମାଣ କରାଯାଇଛି।
ପଞ୍ଚାୟତର କଣ୍ଟଦାଠାରେ ଆଉ ଏକ ଟାଙ୍କି ନିର୍ମାଣ କରାଯାଇଛି। ଏହି ଟାଙ୍କିରୁ କଣ୍ଟିଦୋଳ, ଭଗତପୁର, ଶାସନ ଆଦି ଗ୍ରାମର ୩ ହଜାର ଲୋକଙ୍କୁ ପାନୀୟ ଜଳ ଯୋଗାଇବାକୁ ଲକ୍ଷ୍ୟ ରଖାଯାଇଛି। ମନ୍ଥର ଗତିରେ କାମ ଚାଲୁଥିବାରୁ ୬ବର୍ଷ ହେଲା କାର୍ଯ୍ୟ ସରୁନାହିଁ। ଏହି ପଞ୍ଚାୟତ ବୈତରଣୀ, ଗେଙ୍ଗୁଟି ଓ କୋଚିଳା ନଦୀର ମଧ୍ୟବର୍ତ୍ତୀ ଅଞ୍ଚଳ ହୋଇଥିବାରୁ ସରକାର ଏହାକୁ ଲୁଣି ଅଞ୍ଚଳ ଘୋଷଣା କରିଛନ୍ତି। ଏହି ଅଞ୍ଚଳରେ ନଳକୂପରୁ ଲୁଣିପାଣି ବାହାରୁଥିବାରୁ ମଧୁର ପାନୀୟ ଜଳ ଯୋଗାଣ ପାଇଁ ଗ୍ରାମ୍ୟ ଜଳ ଯୋଗାଣ ଯୋଜନାରେ ଟାଙ୍କି ନିର୍ମାଣ କରାଯାଉଛି। ମାତ୍ର ଏହା କାର୍ଯ୍ୟକ୍ଷମ ହୋଇପାରୁ ନ ଥିବାରୁ ଲୋକେ ପିଇବା ପାଣି ପାଇଁ ନାନା ସମସ୍ୟାର ସମ୍ମୁଖୀନ ହେଉଛନ୍ତି। ଅପରପକ୍ଷେ ପଞ୍ଚାୟତ କାର୍ଯ୍ୟାଳୟ ନିକଟରେ ହୋଇଥିବା ଟାଙ୍କିକୁ ବିଦ୍ୟୁତ୍ ସଂଯୋଗ କରାଯାଇଛି। ହେଲେ ଜଳ ଯୋଗାଣ ହେଉ ନ ଥିଲେ ମଧ୍ୟ ମାସିକ ୨୫ ଶହ ଟଙ୍କା ବିଲ୍ ଦେବାକୁ ପଡ଼ୁଛି। ଏନେଇ ବାରମ୍ବାର ବିଡିଓ, ଜିଲାପାଳ ଓ ବିଭାଗୀୟ ଅଧିକାରୀଙ୍କୁ ଅବଗତ କରାଯାଇଥିଲେ ମଧ୍ୟ କୌଣସି ସୁଫଳ ମିଳିପାରୁ ନାହିଁ ବୋଲି ସରପଞ୍ଚ ଅଶୋକ ପୁହାଣ କହିଛନ୍ତି। ଏ ସମ୍ପର୍କରେ ବିଭାଗୀୟ କନିଷ୍ଠ ଯନ୍ତ୍ରୀ ଯସ୍ମିନ ଦାସ କହିଛନ୍ତି, ପଧାନି ପଞ୍ଚାୟତ କଣ୍ଟଦାଠାରେ ହୋଇଥିବା ପାଣି ଟାଙ୍କିକୁ ବିଦ୍ୟୁତ୍ ସଂଯୋଗ ହୋଇ ନ ଥିବାରୁ ପାଣି ଯୋଗାଣ ହୋଇପାରୁ ନାହିଁ। ତେବେ ତୁରନ୍ତ ପଦକ୍ଷେପ ନିଆଯାଇ ଲୋକଙ୍କୁ ପାଣି ଯୋଗାଣ ହେବ। ସେହିପରି ପଞ୍ଚାୟତ ଅଫିସ୍ ନିକଟ ପାଣି ଟାଙ୍କିରେ ପରୀକ୍ଷା ନିରୀକ୍ଷା ଚାଲିଥିବା ସେ କହିଛନ୍ତି।
