କେସିଙ୍ଗା,୧୯।୭(ତୁମେଶ୍ୱର ସାହୁ): କଳାହାଣ୍ଡି ଜିଲା କେସିଙ୍ଗା ବ୍ଲକର ଦୁଇଟି ପଞ୍ଚାୟତକୁ ଗ୍ରାମ ଉନ୍ନୟନ, ପଞ୍ଚାୟତ ରାଜ ଓ ପାନୀୟଜଳ ବିଭାଗ ମନ୍ତ୍ରୀ ରବିନାରାୟଣ ନାଏକ ଭେଟି ଦେଇଛନ୍ତି। କିକିଆ ପଞ୍ଚାୟତ ସ୍ଥିତ ଭେଜାପଦର ଗ୍ରାମରେ ଓଭରହେଡ ପାଣି ଟାଙ୍କି ଓ ଗାଈଗା ପଞ୍ଚାୟତ ସ୍ଥିତ କେରୋକୁଡ଼ା ଗ୍ରାମରେ ଗ୍ରାମୀଣ ହାଟକୁ ମନ୍ତ୍ରୀ ଶନିବାର ଉଦଘାଟନ କରିଛନ୍ତି।
ମନ୍ତ୍ରୀ ପ୍ରଥମେ ଭବାନୀପାଟଣା ସର୍କିଟ ହାଉସରୁ ଗାଡିରେ ବାହାରି କିକିଆ ଗ୍ରାମ ପଞ୍ଚାୟତର ଭେଜାପଦର ଗ୍ରାମରେ ପହଞ୍ଚିଥିଲେ। ସେଠାରେ ଆର.ଡବ୍ଲୁ,ଏସ୍.ଏସ୍.ବିଭାଗ ପକ୍ଷରୁ ୭୭ଲକ୍ଷ ୮୬ ହାଜର ବ୍ୟୟ ଅଟକଳରେ ନିର୍ମିତ ଓଭରହେଡ ପାଣି ଟାଙ୍କିକୁ ମନ୍ତ୍ରୀ ଉଦଘାଟନ କରିଥିଲେ। ତେବେ ଗ୍ରାମର ୫୩୦ଟି ପରିବାରକୁ ପାନୀୟଜଳ ଯୋଗାଇ ଥିବାରୁ ମନ୍ତ୍ରୀଙ୍କୁ ଗ୍ରାମବାସୀ ଧନ୍ୟବାଦ ଜଣାଇଥିଲେ। ଏହି ଗ୍ରାମରେ ୧୨୭ଟି ଟ୍ୟାପ୍ ସଂଯୋଗ କରାଯାଇଛି। ଏଥିଯୋଗୁ ଗ୍ରାମର ପ୍ରତ୍ୟେକ ପରିବାର ପାନୀୟଜଳ ସୁବିଧାରେ ପାଇପାରିବେ ବୋଲି ବିଭାଗୀୟ ଉପଖଣ୍ଡ ଅଧିକାରୀ ଧର୍ମେନ୍ଦ୍ର ସେଠୀ ପ୍ରକାଶ କରିଥିଲେ।
ପରେ ଭେଜାପଦରରୁ ଗାଈଗା ଗ୍ରାମ ପଞ୍ଚାୟତ ଅଭିମୁଖେ ପରିଦର୍ଶନ କରି କେରୋକୁ ଗ୍ରାମରେ ସାପ୍ତାହିକ ବୁଧବାର ବଜାର କୁ ମନ୍ତ୍ରୀ ଉଦ୍ଘାଟନ କରିଥିଲେ। ଏହି ଗ୍ରାମୀଣ ହାଟ ଯୋଗୁ ଆଖପାଖ ଅଞ୍ଚଳର ଆଦିବାସୀ ଅଧ୍ୟୁଷିତ ଜନସାଧାରଣ ସୁବିଧାରେ ବଜାର କରି ପାରିବେ ବୋଲି ମନ୍ତ୍ରୀ ପ୍ରକାଶ କରିଥିଲେ। ଏହା ଗତ ୨୦୨୪-୨୫ ଆର୍ଥିକ ବର୍ଷର ଯୋଜନାରୁ ୧୦ ଲକ୍ଷ ବ୍ୟୟ ଅଟକଳ ରେ ଶେଡ଼ ନିର୍ମାଣ କରାଯାଇଥିବାର ଯନ୍ତ୍ରୀ ଜଳେଶ୍ୱର ନାଏକ ପ୍ରକାଶ କରିଥିଲେ।
ପରିଶେଷରେ ଜିଲାପାଳ ଶ୍ରୀପ୍ରକାଶ ମନ୍ତ୍ରୀଙ୍କୁ ଗଣେଷ ମୂର୍ତ୍ତି ଦେଇ ସ୍ବାଗତ ଓ ସମ୍ବର୍ଦ୍ଧନା କରିଥିଲେ। ସେଠାରୁ ଭବାନୀପାଟଣା ଅଭିମୁଖେ ଯାଇଥିଲେ। ଏହି କାର୍ଯ୍ୟକ୍ରମରେ ଜିଲାପାଳ ସଚିନ ପାୱାର ପ୍ରକାଶ,ଜିଲାପରିଷଡ଼ ଅଧ୍ୟକ୍ଷ ପୁଷ୍ପେନ୍ଦ୍ର ସିଂ ଦେଓ, ବିଡ଼ିଓ ଜନ୍ମେଜୟ ସ୍ବାଇଁ,ବ୍ଲକ ଅଧ୍ୟକ୍ଷ ଚନ୍ଦନ ସେନାପତି, ପ୍ରମୁଖ ବିଭାଗୀୟ ଅଧିକାରୀ ମାନେ ଅଂଶଗ୍ରହଣ କରିଥିଲେ।
