ନୂଆଦିଲ୍ଲୀ,୧୮ା୩:କର୍ମଚାରୀ ଭବିଷ୍ୟନିଧି ପାଣ୍ଠି (ଇପିଏଫ୍) ବାର୍ଷିକ ଜମା ୨.୫୦ ଲକ୍ଷରୁ ଊର୍ଦ୍ଧ୍ୱ ହେଲେ ଏହା ଉପରେ ଟିକସ ଲଗାଇବାକୁ କେନ୍ଦ୍ର ସରକାର ଯୋଜନା କରିଛନ୍ତି। ସରକାରୀ କର୍ମଚାରୀଙ୍କ ପାଇଁ ଏହି ସୀମା ୫ ଲକ୍ଷ ରଖାଯାଇଛି। ନୂଆ ଆୟକର ଆଇନ ନିୟମାବଳୀରେ ଏପ୍ରିଲ ୧ରୁ କର୍ମଚାରୀଙ୍କ ପିଏଫ୍ ଆକାଉଣ୍ଟକୁ ଟିକସଯୋଗ୍ୟ ଏବଂ ଅଣଟିକସଯୋଗ୍ୟ ଜମା ଆକାଉଣ୍ଟ ଭାବେ ବିଭକ୍ତ କରାଯିବ। ପିଏଫ୍ ଜମା ଉପରେ ସୁଧହାର ୪ ଦଶନ୍ଧି ମଧ୍ୟରେ ସର୍ବନିମ୍ନ କରାଯାଇଥିବାବେଳେ ଏବେ ଅଧିକ ଜମା ଉପରେ ଟିକସ ଲଗାଇବାକୁ ଇପିଏଫ୍ଓ ଯୋଜନା କରୁଛି। ନୂଆ ନିୟମ ଅନୁଯାୟୀ ଜଣେ ଘରୋଇ କର୍ମଚାରୀ ପିଏଫ୍ରେ ବାର୍ଷିକ ୫ ଲକ୍ଷ ଟଙ୍କା ଜମା କରୁଥିଲେ, ୨.୫୦ ଲକ୍ଷ ଟଙ୍କା ଉପରେ ଟିକସ ଲାଗିବ। ସେହିପରି ଜଣେ ସରକାରୀ କର୍ମଚାରୀଙ୍କ ପିଏଫ୍ ଆକାଉଣ୍ଟରେ ୬ ଲକ୍ଷ ଟଙ୍କା ଜମା ହେଉଥିଲେ, ସେ ୧ ଲକ୍ଷ ଟଙ୍କା ଉପରେ ଟିକସ ଦେବେ। ଉଚ୍ଚ ଆୟକାରୀ ବ୍ୟକ୍ତି ଯେପରି ସରକାରଙ୍କ କଲ୍ୟାଣକାରୀ ଯୋଜନାର ଫାଇଦା ନ ନେବେ, ସେଥିପାଇଁ ଏଭଳି ଟିକସ ବ୍ୟବସ୍ଥା କରାଯାଇଛି। ଏହା ୧ ପ୍ରତିଶତ ଟିକସଦାତାଙ୍କୁ ପ୍ରଭାବିତ କରିବ ବୋଲି ପୂର୍ବରୁ କୁହାଯାଇଥିଲା।
କେନ୍ଦ୍ରୀୟ ପ୍ରତ୍ୟକ୍ଷ ଟିକସ ବୋର୍ଡ (ସିବିଡିଟି) ପକ୍ଷରୁ ଜାରି ବିଜ୍ଞପ୍ତି ଅନୁଯାୟୀ ଆୟକର ନିୟମାବଳୀ, ୧୯୬୨ରେ ଏକ ନୂଆ ଧାରା ୯ଡି ଯୋଡ଼ାଯାଇଛି। ୨୦୨୧ ମାର୍ଚ୍ଚ ୩୧ ପର୍ଯ୍ୟନ୍ତ ସମସ୍ତ ଇପିଏଫ୍ ହିତାଧିକାରୀଙ୍କୁ ଅଣଟିକସ ଜମାକାରୀ ବିବେଚନା କରାଯିବ। ଅର୍ଥାତ୍ ଚଳିତ ଆର୍ଥତ୍କ ବର୍ଷ (୨୦୨୧ ଏପ୍ରିଲ୍ ୧ରୁ ୨୦୨୨ ମାର୍ଚ୍ଚ ୩୧ ମଧ୍ୟରେ) ଇପିଏଫ୍ ଜମାକୁ ଟିକସଯୋଗ୍ୟ ବିବେଚିତ ହେବ। ସୂଚନାଯୋଗ୍ୟ, ଘରୋଇ ବା ବେସରକାରୀ ସଂସ୍ଥାରେ କାର୍ଯ୍ୟରତ କମର୍ଚାରୀଙ୍କ ମାସିକ ମୂଳ ବେତନର ୧୨ ପ୍ରତିଶତ ଇପିଏଫ୍ ଯୋଗଦାନ ଭାବେ ଜମା କରାଯାଇଥାଏ। ଏଥିରେ ନିଯୁକ୍ତିଦାତା ସମାନ ପରିମାଣ ଅର୍ଥ ଜମା କରିଥାନ୍ତି। ମାସିକ ୧୫,୦୦୦ ଟଙ୍କା ପର୍ଯ୍ୟନ୍ତ ବେତନ ପାଉଥିବା କର୍ମଚାରୀଙ୍କ ଇପିଏଫ୍ ଜମାକୁ ବାଧ୍ୟତାମୂଳକ କରାଯାଇଛି। ସେହିପରି କୌଣସି ସଂସ୍ଥାରେ ୨୦ରୁ ଅଧିକ କର୍ମଚାରୀ ନିୟୋଜିତ ଥିଲେ ସେମାନଙ୍କ ଇପିଏଫ୍ ଆକାଉଣ୍ଟ ଖୋଲିବା ବାଧ୍ୟତାମୂଳକ।
