ଭୁବନେଶ୍ୱର,୧୫ା୫(ବ୍ୟୁରୋ): ଆଇସିଏସ୍ଇ ଦଶମ ଓ ଆଇଏସ୍ସି ଦ୍ୱାଦଶ ପରୀକ୍ଷାରେ ଭୁବନେଶ୍ୱରସ୍ଥିତ ଲୟୋଲା ସ୍କୁଲ ଉଲ୍ଲେଖନୀୟ ସଫଳତା ହାସଲ କରିଛି। ଦଶମରେ ୨୧୩ଜଣ ଛାତ୍ରୀଛାତ୍ର ପରୀକ୍ଷା ଦେଇଥିବାବେଳେ ୨୧୨ଜଣ ଉତ୍ତୀର୍ଣ୍ଣ ହୋଇଛନ୍ତି। ଛାତ୍ରୀ ପ୍ରିତିକା ମିଶ୍ର ଓ ଛାତ୍ର ଆୟୁଷ ନନ୍ଦ ୯୯.୨୦ ପ୍ରତିଶତ ମାର୍କ ସହ ବିଦ୍ୟାଳୟର ଯୁଗ୍ମ ଟପ୍ପର ହୋଇଥିବାବେଳେ ରାଜ୍ୟରେ ଦ୍ୱିତୀୟ ସ୍ଥାନରେ ରହିଛନ୍ତି। ଆୟୁଷ ମେଡ଼ିକାଲ ପାଇଁ ପ୍ରସ୍ତୁତି ଆରମ୍ଭ କରିଥିବାବେଳେ ପ୍ରିତିକା ଆଇଆଇଟି ପଢ଼ିବାକୁ ଲକ୍ଷ୍ୟ ରଖିଛନ୍ତି। ତେବେ ଏମାନେ ନିଜର ସଫଳତାର ଶ୍ରେୟ ଅଭିଭାବକ ଓ ବିଦ୍ୟାଳୟକୁ ଦେଇଛନ୍ତି। କଠିନ ପରିଶ୍ରମ ସଫଳତାର ମୂଳମନ୍ତ୍ର ବୋଲି ସେମାନେ କହିଛନ୍ତି। ସେହିଭଳି ବିଦ୍ୟାଳୟର ଦ୍ୱିତୀୟ ସ୍ଥାନରେ ତ୍ରିଶା ରଥ ଓ ହଂସ ଦାରୁକା ରହିଛନ୍ତି। ଉଭୟେ ୯୮.୮ ପ୍ରତିଶତ ମାର୍କ ରଖିଛନ୍ତି। ଆର୍ଯ୍ୟ ମହାପାତ୍ର ଓ ଆନଭି ସମ୍ପଦ ୯୮.୪ ପ୍ରତିଶତ ମାର୍କ ସହ ତୃତୀୟ ସ୍ଥାନରେ ରହିଛନ୍ତି।
ଅନ୍ୟପଟେ ଦ୍ୱାଦଶ ପରୀକ୍ଷା ଦେଇଥିବା ସମସ୍ତ ୭୨ଜଣ ଛାତ୍ରୀଛାତ୍ର ଉତ୍ତୀର୍ଣ୍ଣ ହୋଇଛନ୍ତି। ବାୟୋସାଇନ୍ସ ଛାତ୍ରୀ ଆଦ୍ୟାଶା ପ୍ରାଣିଗ୍ରାହୀ ପ୍ରଥମ ସ୍ଥାନରେ ରହିଥିବାବେଳେ ଦ୍ୱିତୀୟ ସ୍ଥାନରେ ଲିଖିତା ପ୍ରିୟଦର୍ଶିନୀ ଓ ଶରଣ ଦେବ ଏବଂ ତୃତୀୟରେ ଶୁଭଲକ୍ଷ୍ମୀ ବେହେରା ରହିଛନ୍ତି। ସେହିପରି ପିଓର ସାଇନ୍ସରେ ପ୍ରଥମ ସ୍ଥାନରେ ସୁମନ୍ତ କୁମାର ଦତ୍ତ, ଦ୍ୱିତୀୟ ସ୍ଥାନରେ ସାନିଆ ମନ୍ଧ୍ୟାନ ଓ ତୃତୀୟ ସ୍ଥାନରେ ସୋଫିଆ ପ୍ରଧାନ ଅଛନ୍ତି। କଳାରେ ଅର୍ଚ୍ଚିତା ଷଡ଼ଙ୍ଗୀ ପ୍ରଥମ ସ୍ଥାନରେ ରହିଥିବାବେଳେ, ଦ୍ୱିତୀୟରେ ସୁହାନୀ ପରିଆ ଓ ତୃତୀୟରେ ଶ୍ରୁତି ଦାଶ ରହିଛନ୍ତି। ସେହିପରି ବାଣିଜ୍ୟରେ କୋମଲ ପେରିଓ୍ବାଲ୍ ପ୍ରଥମ ସ୍ଥାନରେ, ବର୍ଣ୍ଣାଳି ସେନାପତି ଦ୍ୱିତୀୟ ଏବଂ ନେହା ବର୍ମା ତୃତୀୟ ସ୍ଥାନରେ ରହିଛନ୍ତି।
