ବ୍ରହ୍ମପୁର ଅଫିସ,୧୨।୧୦: ମହାରାଜା କୃଷ୍ଣଚନ୍ଦ୍ର ଗଜପତି (ଏମକେସିଜି) ମେଡିକାଲ ଅଧୀକ୍ଷକଙ୍କ ଚାମ୍ବରରେ ମଙ୍ଗଳବାର ଏକ ବୈଠକ ଅନୁଷ୍ଠିତ ହୋଇଥିଲା। ଏଥିରେ ଏମକେସିଜି ଅଧୀକ୍ଷକ ପ୍ରଫେସର ଡା. ସନ୍ତୋଷ କୁମାର ମିଶ୍ର ଓ ଡ଼ିନ ଡା. ଅବନୀକାନ୍ତ ମିଶ୍ର ଅଧ୍ୟକ୍ଷତା କରିଥିଲେ। ସେହିପରି ବିଭିନ୍ନ ବିଭାଗୀୟ ମୁଖ୍ୟ, ହାଉସସର୍ଜନ ସଂଘର କର୍ମକର୍ତ୍ତା ଓ ନର୍ସିଂ ସଂଘର କର୍ମକର୍ତ୍ତା ମଧ୍ୟ ଯୋଗ ଦେଇଥିଲେ। ଅଗଷ୍ଟ ୨୬ ରେ ସୁପରସ୍ପେସାଲିଷ୍ଟ କୋଠାରେ ଥିବା ଓଟି କମ୍ପ୍ଲେକ୍ସରେ ଅଗ୍ନିକାଣ୍ଡ ଘଟିଥିଲା। ସେବେଠାରୁ ଉକ୍ତ ଓଟି ବନ୍ଦକରି ଦିଆଯାଇଥିଲା। ବୁଧବାରଠାରୁ ଉକ୍ତ ଓଟି କମ୍ପ୍ଲେକ୍ସ କାର୍ଯ୍ୟକ୍ଷମ ହେବ ବୋଲି ନିଷ୍ପତ୍ତି ହୋଇଥିଲା। ସେହିପରି ସେପ୍ଟେମ୍ବର ୨୯ରେ ରୋଗୀଙ୍କ ରକ୍ତ ସଂଗ୍ରହକୁ ନେଇ ଉତ୍ତେଜନା ଦେଖା ଦେଇଥିଲା। ଏନେଇ ଏହି ବୈଠକରେ ସରକାରଙ୍କ ଦ୍ୱାରା ପ୍ରତ୍ୟେକ ଅଧିକାରୀଙ୍କ ପାଇଁ ନିର୍ଦ୍ଧାରିତ ଥିବା କାର୍ଯ୍ୟ ସମ୍ପର୍କରେ ଆଲୋଚନା ହୋଇଥିଲା। ଉଭୟ ପକ୍ଷଙ୍କ ମଧ୍ୟରେ ଡ୍ୟୁଟି ମ୍ୟାନେଜମେଣ୍ଟକୁ ନେଇ ରହିଥିବା ଦ୍ୱନ୍ଦ୍ୱର ଆପୋଷ ବୁଝାମଣା ଜରିଆରେ ସମାଧାନ କରାଯାଇଥିଲା। ବିଶେଷକରି ଭେଷଜ ବିଭାଗରେ ପ୍ରତିଦିନ ପ୍ରାୟ ୧୫୦ ରୋଗୀ ଆସିଥାନ୍ତି। ସେମାନଙ୍କ ରକ୍ତ ନମୁନା ସଂଗ୍ରହ କିପରି ସହଜ ହୋଇପାରିବ ସେନେଇ ମଧ୍ୟ ଆଲୋଚନା କରାଯାଇଥିଲା। ଆବଶ୍ୟକ ପଡ଼ିଲେ ଉକ୍ତ ବିଭାଗରେ ଅଧିକ ନର୍ସିଂ ଅଫିସର କିମ୍ବା ଲେବୋରେଟୋରି ଟେକ୍ନିସିଆନ ଯୋଗାଇ ଦିଆଯିବ ବୋଲି ସ୍ଥିର କରାଯାଇଛି।
ଦିତ୍ୱୀୟ ପର୍ଯ୍ୟାୟରେ ଡ଼ିନ୍ ଡା.ମିଶ୍ରଙ୍କ କାର୍ଯ୍ୟାଳୟରେ ବିଭାଗୀୟ ଅଧିକାରୀଙ୍କ ଉପସ୍ଥିତିରେ ଏକ ବୈଠକ ଅନୁଷ୍ଠିତ ହୋଇଥିଲା। ଏମ୍କେସିଜ ମେଡିକାଲ ପରିସରରେ ଲାଗି ରହିଥିବା ଗାଡ଼ି ପାର୍କିଂ ସମସ୍ୟାର ସ୍ଥାୟୀ ସମାଧାନ ପାଇଁ ଆଲୋଚନା ହୋଇଥିଲା। ରୋଗୀ ସମ୍ପର୍କୀୟଙ୍କ ବାଇକ୍ ଓ ଅନ୍ୟାନ୍ୟ ଗାଡ଼ି ପାର୍କିଂ ପାଇଁ ଏକ ଘରୋଇ ସଂସ୍ଥାକୁ ଟେଣ୍ଡର ଦେବାକୁ ନିଷ୍ପତ୍ତି ହୋଇଥିଲା। ମେଡିକାଲର ବିଭିନ୍ନ ବିଭାଗ ସମ୍ମୁଖରେ ପାର୍କିଂ କରାଯାଉଥିବା ଗାଡ଼ିଗୁଡିକ ସେଠାରେ ପାର୍କିଂ ନ କରି ସୁପରସ୍ପେସାଲିଟି କୋଠା ସମ୍ମୁଖ ଭାଗରେ ଥିବା ଏକ ଖୋଲା ସ୍ଥାନରେ ଗାଡି ପାର୍କିଂ କରାଯିବା ପାଇଁ ସ୍ଥିର ହୋଇଥିଲା। ଏଥିରେ ଅନ୍ୟମାନଙ୍କ ମଧ୍ୟରେ ଏମ୍କେସିଜି ଉପ ଅଧୀକ୍ଷକ ଡା. କିରନ ପଟ୍ଟନାୟକ ଓ ପ୍ରଶାସନିକ ଅଧିକାରୀ ପ୍ରମୁଖ ଯୋଗ ଦେଇଥିଲେ।
